ZEFANAAYA 2
2
1Ma tintee-la nɩaa hɩɩsɩŋ sɩ die,
má bɩɩnɛ wɩaa pɩ ma tɩtɩa, ma bɩɩnɛ wɩaa pɩ ma tɩtɩa
2ka dɩ bʋa-la ba sɩ daga-na yi,
chɛɛ-la peliŋ sɩ jaŋ paama a nagɛ mɩɩ-jɔrʋŋ,
ka dɩ tapʋlɩɩ-la La TƖƖNA sɩ jaŋ na baanɩŋ ma nyuŋ-na yi.
Chɛɛ-la La TƖƖNA baanɩŋ jaŋ faasa sii ma nyuŋ woruŋ.
3Má chɛ La TƖƖNA, ma nɩalɩŋ kala sɩ kɛŋ ma tɩtɩa muuri a hɛ tintee-la lɛ,
ma nɩalɩŋ sɩɩ ŋaa wɩalɩŋ ʋ sɩ daga,
má kɛŋ tʋɔpʋla, a kɛŋ ma tɩtɩa muuri,
ŋ bɩ pɔ ma jaŋ na leriŋ a kɛŋ ma nyusuŋ pɛllɛ
tapʋlɩɩ-la La TƖƖNA sɩ jaŋ na baanɩŋ.
Wɩalɩŋ Zefanaaya sɩ bʋla tɩgɛ Fɩlɩsɩtɩa tɩŋŋaa lɛ
4Ba jaŋ vɩa tabal-la ba sɩɩ yɩrɛ Gaza ta,
aŋ ka dɩ taŋ-la ma ba sɩɩ yɩrɛ Asɩkɛlɔŋ pɩŋ jikpeeŋ.
Ba jaŋ kiri taŋ-la ba sɩɩ yɩrɛ Asɩdɔd
nɩaa ta wɩɩhɛɛ siesee ka dɩ ʋ pɩŋ hoi,
a kiri taŋ-la ba sɩɩ yɩrɛ Ɛkʋrɔŋ nɩaa ma ta.
5Wɩɩŋ puu ma nɩalɩŋ sɩ hɔŋ mʋgʋ-balɩŋ niiŋ,
tintee-la ba sɩɩ yɩrɛ Kiriti tɩŋŋaa.
La TƖƖNA bʋla lɩɩ ma harɩŋ nɛ.
Ma Fɩlɩsɩtɩa tɩmma-la sɩ hɔŋ Kɛnaŋ tinteeŋ,
La TƖƖNA sɩ, “Mɩ jaŋ cheima,
ma kʋbala ma bɩ jaŋ ka.”
6Tintee-la sɩ kpagɛ mʋgʋ-balɩŋ, lee-la Kiriti tɩŋŋaa sɩɩ jʋʋ
jaŋ bɩrɩmɛ pie-daaraa arɩ piesee dɩjʋʋlʋŋ.
7Juda nɩkaanaa nɛ jaŋ hɔŋ tintee-la lɛ,
nɩmɛ nɛ ba pʋsʋŋ jaŋ didii yaŋ.
Dɩdaanɩŋ ba jaŋ pɩŋ
Asɩkɛlɔŋ tɩmma-la dɩɩsɩŋ lɛ.
Ba TƖƖNA Wɩa jaŋ beŋ ba nyuŋ,
ʋ jaŋ leŋ dɩ ba bɩra dʋa.
Wɩalɩŋ La TƖƖNA sɩ bʋla tɩgɛ Mʋab tɩŋŋaa arɩ Amɔŋ tɩŋŋaa lɛ
8La TƖƖNA sɩ, “Mɩ nɩɩ jomo-la Mʋab tɩŋŋaa fa sɩ tʋʋsɛ mɩ nɩaa
arɩ ŋɩɩ Amɔŋ tɩŋŋaa sɩ sieri mɩ nɩaa lɛ nɛ.
Ba tʋʋsɛ mɩ nɩaa
a fugisiba nɛ arɩ ba jaŋ kɛŋ ba tinteeŋ laa.
9Ŋɩɩ wɩaa, mɩ-na ma TƖƖNA doluŋ kala TƖƖNA
sɩ ŋaa Iziral tɩŋŋaa Wɩa ŋmɩɛsa nɛ, mɩ nɛ bʋla:
wʋtɩtɩɩ, mɩ jaŋ chei Mʋab dɩ ʋ nagɛ taŋ-la ba sɩɩ yɩrɛ Sodom
a chei Amɔŋ tɩŋŋaa dɩ ba ma nagɛ taŋ-la ba sɩɩ yɩrɛ Gomora.
Ba leriŋ kala jaŋ tɔ yaŋ arɩ kpesi bʋɔsʋŋ
a pɩŋ kʋŋkʋlʋŋ a kaa mʋ wuu.
Mɩ nɩalɩŋ sɩ ka jaŋ paa ba kɩaa,
mɩ tintee-la nɩalɩŋ sɩ bɩ sʋba jaŋ laa ba tinteeŋ tɩɩ.”
La TƖƖNA nɛ bʋla.
10Wɩɩ-la sɩ jaŋ ŋaa ba lɛ nɛ ŋɩɩ a tɩŋ ba sɩɩ-duoŋ wɩaa,
bɛɛ wɩaa ba tʋʋsɛ ba TƖƖNA Doluŋ kala Tɩɩna nɩaa nɛ a sieri ba lɛ.
11La TƖƖNA jaŋ chei vʋɩya-la kala sɩ hɛ tintee-la lɛ,
dɩ fawʋllʋŋ faasa jʋʋba.
Tinteyee kala sɩ hɛ dʋnɩa lɛ jaŋ kpirimi ʋ sɩpaaŋ,
nʋʋ na-kala jaŋ ŋaa ŋɩɩ ʋ tɩtɩa tinteeŋ lɛ.
Wɩalɩŋ La TƖƖNA sɩ bʋla tɩgɛ Kus tɩŋŋaa lɛ
12La TƖƖNA sɩ, “Ma Kus tɩŋŋaa ma,
mɩ jaŋ leŋ dɩ ba kpʋma laalɩŋ lɛ.”
Wɩalɩŋ Zefanaaya sɩ bʋla tɩgɛ Asiiria tɩŋŋaa lɛ
13La TƖƖNA jaŋ lɩɩsɛ ʋ nɩsɩŋ liesi wɩɩpɔsʋŋ nagʋa dɩɩrɩŋ
a chei Asiiria tinteeŋ,
aŋ ŋaa dɩ tabal-la ba sɩɩ yɩrɛ Nɩnɩvɛ pɩŋ hoi,
a hɩla nagɛ tintee-hɩlɩŋ.
14Piesee arɩ nɛsɩŋ jaŋ pɩpɩŋ nɩmɛ,
pʋŋ-doho na-kala jaŋ pɩŋ nɩmɛ.
Hajaaŋkuŋkumba-la sɩ hɛ tintee-hɩlɩŋ lɛ arɩ gʋra-nyilimiba
jaŋ chʋchʋa ʋ kɛrɩsɩŋ lɛ.
Ba huuno jaŋ to tokoro wuoloo a lɩɩ chɩchɩɩmɛ leriŋ.
Chosuŋ arɩ tɩɛrɩŋ jaŋ tele gɩbɛ boi-niiree lɛ,
ka dɩ kuolu doloo nyɩɩsɛ.
15Wɩɩ-la sɩ jaŋ ŋaa tabal-la nɩaa fa sɩ hɔnɔ ta jɩa,
wɩɩ bɩ baa walɩmɛ lɛ nɛ ŋɩɩ.
Tabal-la fa bʋl ʋ tɩtɩa lɛ,
“Mɩ-na nɛ hɛ nɩmɛ, kʋŋkala tuo a magɛmɛ.”
Ʋ nɛ mɩɩra pɩŋ jikpeeŋ ŋɩɩ
a ŋaa baga kɩaa dɩjʋʋlʋŋ.
Nɩalɩŋ kala sɩ tou bɩbal
yie sieri ʋ lɛ aŋ kɛŋ nɩsɩŋ liese dɩdagɛ.
Právě zvoleno:
ZEFANAAYA 2: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014