ZEFANAAYA 1
1
1La TƖƖNA fa bʋl wɩaa pɩ Zefanaaya sɩ ŋaa Kusi nanʋala, a ŋaa Gedalia ma nihiŋ, aŋ ŋaa Amarɩa nihi-lɩɛrɛ. Amarɩa nyɩmma nɛ fa ŋaa Hezikaaya. Bʋa-la lɛ dɩ Josaaya sɩ ŋaa Amɔŋ nanʋala nɛ fa dii kuoruŋ Juda tinteeŋ lɛ.
Wɩa jaŋ dii nɩaa sarɩya
2La TƖƖNA sɩ, “Mɩ jaŋ tii paa
kʋŋkala sɩ hɛ dʋnɩa lɛ.
3Mɩ jaŋ tii paa nuhuobiinee arɩ pʋsʋŋ,
diibiisiŋ
arɩ chenfilee sɩ hɛ mʋgʋ-balɩŋ tʋɔŋ.
Nɩbɔŋŋɔɔ jaŋ daŋ dɔŋɔ lɛ a sii chʋɔrɛ,
dɩ mɩ nɛ kpʋ dʋnɩa nɩaa kala.”
La TƖƖNA nɛ bʋla.
4“Mɩ jaŋ dɔgɩsɛ Juda nɩaa
arɩ nɩalɩŋ kala sɩ hɛ Jerusalɛm lɛ.
Mɩ jaŋ kpʋ nɩalɩŋ sɩ ka daha a tuto Baal vene-la,
dɩ nɩalɩŋ sɩɩ kpaarʋ yɩrɩŋ lɛl.
5Mɩ jaŋ chei nɩalɩŋ sɩ yie jɩl lusuŋ a kpirime
chʋɔlɛ wɩɩpɔsʋŋ, chɛnɛ arɩ chɛnwʋlaa,
arɩ nɩalɩŋ sɩ yie kpirime chʋɔlɛ mɩ-na ba TƖƖNA a ŋmɩɛsɛ mɩ yɩrɩŋ lɛ,
aŋ ha bɩra ŋmɩŋmɩɛsɛ vene-la ba sɩɩ yɩrɛ Mɔlɛk ma yɩrɩŋ lɛ.
6Mɩ jaŋ chei nɩalɩŋ sɩ mɩɩrɛ mɩ-na ba TƖƖNA harɩŋ tonuŋ,
a bɩ mɩ bee chɩchɛ,
a bɩ mɩ pɩɛsa nɩna wɩaa.”
7Má ŋaa fʋɩɩ La TƖƖNA Wɩɩjarɩbakɔ sɩpaaŋ,
bɛɛ wɩaa La TƖƖNA tapʋlʋŋ kpaga nɛ.
La TƖƖNA fa leŋe ʋ nɩaa nagɛ pʋsʋŋ nɛ dɩ ba kpʋ
a lɩɩsɛ nɩalɩŋ ma sɩ jaŋ kpʋba.
8La TƖƖNA sɩ, “Tapʋlɩɩ-la mɩ sɩ jaŋ dii mɩ nɩaa sarɩya,
mɩ jaŋ dɔgɩsɛ ba sɩpaalaaraa
arɩ kuoru-biiriŋ
arɩ nɩalɩŋ kala sɩɩ to nɩwogusuŋ naabarɩŋ.
9Tapʋlɩɩ-la mɩ jaŋ dɔgɩsɛ nɩalɩŋ
kala sɩɩ ŋaa wɩaa a nagɛ vʋɩ-kpaaraa,
nɩalɩŋ sɩ gɩrɩma laa kɩaa a kpʋ nɩaa ma laa
kɩaa su ba vene dɩɩ-balɩŋ.”
10La TƖƖNA bɩra sɩ,
“Tapʋlɩɩ-la ma jaŋ nɩɩ dɩ nɩaa ŋmoo niiŋ Jerusalɛm boi-baal-la
ba sɩɩ yɩrɛ Chenfilee Boi-baalɩŋ lɛ,
a nɩɩ yele ma ja-falɩɩ-la ba sɩ saa lɛ,
a nɩɩ goŋ ma ba sɩ faasa ŋaa dundolluŋ nyuŋ.
11Ma nɩalɩŋ sɩ hɛ yɔbɔ leriŋ, má yel.
Ba jaŋ kpʋ ma bayalaa kala.
Ma nɩalɩŋ sɩɩ yɔɔ kɩaa arɩ nɩalɩŋ sɩɩ yallɛ kɩaa nɩmɛ kala jaŋ sʋʋ.
12Tapʋlɩɩ-la mɩ jaŋ nyɩgɛ chaanɩŋ a gbilli Jerusalɛm
a dɔgɩsɛ nɩalɩŋ sɩ bɩ sɩɩfɩɛsɩŋ kɛnɛ,
nɩalɩŋ sɩ nagɛ sɩnɩŋ ba sɩ nyʋa aŋ ka bʋbʋɔŋ,
nɩalɩŋ sɩ bɩɩna mɩ-na ba TƖƖNA bɩ jaŋ ŋaa ba wɩɩkala,
wʋzɔŋ koo wʋbɔŋ.
13Ba dʋndɔŋŋɔɔ jaŋ kɛŋ ba dʋa laa,
aŋ ŋmoo ba dɩɩsɩŋ lo.
Ba jaŋ saa dɩɩsɩŋ
aŋ bɩ jaŋ jʋʋba.
Ba jaŋ chɔnsɛ girep tɩɩsɩŋ, aŋ bɩ jaŋ nyʋa tɩɩsɩ-la sɩnɩŋ.”
La TƖƖNA tapʋl-balɩŋ
14La TƖƖNA tapʋl-bal-la kpaga nɛ,
ʋ kpaga nɛ a kʋkɔ lɩma lɩma.
Má jegile nɩɩ, La TƖƖNA tapʋlɩɩ-la nɩaa jaŋ ŋmoo niiŋ bagɛ-bagɛ,
laalɩyuori wajɩa ma jaŋ paala ŋmoo niiŋ.
15Tapʋlɩɩ-la Wɩa jaŋ dagɛ ʋ baanɩŋ,
nɩaa jaŋ na hɛɛŋ dɩ ba tʋɔŋ faasa chei,
tapʋlɩɩ-la ba jaŋ chei nɩaa ka dɩ jikpeeŋ pɩŋ,
ʋ jaŋ ŋaa birimiŋ tapʋlɩɩ dɩ leriŋ faasa biri,
a ŋaa tapʋlɩɩ duoŋ-bɩlɩmbaanaa sɩ jaŋ tɔ dɩ leriŋ faasa biri.
16Ba jaŋ ŋmʋʋ banyile tapʋlɩɩ-la aŋ ŋaa laalɩyuori goŋ
aŋ yuyuo tabala-la ba sɩ saa kɛrɩsɩŋ golli
arɩ dɩɩ-leŋie-la sɩ chɩŋ ba gʋnaa lɛ.
17La TƖƖNA sɩ,
“Mɩ jaŋ leŋ dɩ nɩaa na hɛɛŋ,
ba jaŋ gɔllɔ baarɛ leriŋ a nagɛ nyʋlɩmaa,
a tɩŋ ba sɩ ŋaa wʋbɔŋŋɔɔ mɩ-na ba TƖƖNA lɛ wɩaa.
Ba chalɩŋ jaŋ jaasɛ a pɛllɛ nagɛ lɩɩŋ,
dɩ ba kʋsʋʋnʋŋ ma pɩna pʋa.
18Tapʋlɩɩ-la mɩ-na ba TƖƖNA sɩ jaŋ na baanɩŋ,
ba warɩpʋla koo ba sɛlɩmɛ bɩ jaŋ wuo laaba ta.
Mɩ yarɩ-bieri baanɩŋ jaŋ nagɛ nyiniŋ
a joŋ dʋnɩa kala dii,
bɛɛ wɩaa mɩ jaŋ leŋ dɩ nʋʋkala
sɩ hɛ dʋnɩa lɛ guu sʋʋ.”
Právě zvoleno:
ZEFANAAYA 1: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014