NAHUM 3
3
Wɩaa puu Nɩnɩvɛ nɩaa
1Wɩaa puu tabal-la sɩ suo arɩ nɩkpʋʋraa,
a su arɩ wʋnyɩɛrɩŋ.
Dʋa su tabal-la nɛ nɩaa sɩ jaŋ yuo laa.
2Má jegili, chɩbɩsɩŋ ka dɔŋ nɛ, gɩrɩŋgɩrɩmba ma ŋmoo dɔŋɔ a dʋdɔŋ,
janɩŋ naasɩŋ ma dʋdɔŋ, laalɩŋ janɩŋ torukoba ma dɔmɔ tuto.
3Ja-jɩllaa lɔgɛ ba janɩŋ hɛ nɛ,
tokobiee lɩlɩgɩsɛ, tiŋŋee ma tʋtʋl.
Nɩalɩŋ ba sɩ bolimo yʋga, sʋʋnʋŋ daŋ dɔŋɔ lɛ
a paala bɩ nii kɛnɛ, nɩaa nʋɔsa bɩbal.
4Wɩaa deemba kala ka ŋaa,
a tɩŋ Nɩnɩvɛ sɩ nagɛ hachɔrʋŋ, a kɛŋ daalusuŋ nyɩsa kɩkɛsɛ nɩaa,
a nyagɛ tinteyee bil arɩ ʋ wʋchɔrʋŋ wɩaa,
aŋ kɛŋ ʋ hɩllɩŋ ma fʋgɛ nɩaa bil.
5Ŋɩɩ nɛ La TƖƖNA doluŋ kala Tɩɩna bʋl, “Mɩ chɩŋ ŋ lɛ nɛ.
Mɩ jaŋ kɛŋ ŋ gondoŋ wuro tɔ ŋ sɩaa,
aŋ leŋ dɩ tinteyee nɩaa na ŋ yarɩ-biree, dɩ ŋ hɩɩsɩŋ lɩɩ.
6Mɩ jaŋ joŋ disiŋ-jɩgɩŋ hɛ ŋ lɛ,
a leŋ dɩ ŋ ŋaa ta-tɔɔ,
dɩ nʋʋkala nɛ naŋ, ʋ chaarɛ sɩaa pɛ ŋ lɛ.
7Dɩ nʋʋkala nɛ naŋ, ʋ jaŋ fá aŋ bʋl,
‘Nɩnɩvɛ pɩŋ jikpeeŋ nɛ, kʋbɛɛ nɛ jaŋ yele pʋʋ?
Kʋbɛɛ nɛ jaŋ nyagɛ ʋ bɔyɛ?’ ”
8Ŋ kpɩa Tɛbɛs sɩ ŋaa Ijipiti tinteeŋ tabalɩŋ nɛɛ?
Tabal-la sɩ hɛ Naayɩl fuo-la sɛmɛ,
ka lɩɩŋ gollu chu nɛɛ?
Tabal-la fuonuŋ sɩ kɛrɛ
lɩɩŋ nagɛ kɛrɛ a golli.
9Kus arɩ Ijipiti tinteyee nɛ fa chaasa pʋ doluŋ,
aŋ ka Puti arɩ Libiya tinteeŋ nɩaa ma fa ŋaa ba sɩŋŋaa.
10Arɩ ŋɩɩ kala, ba fa yuo kɛnʋ nɛ
a kaa mʋ yoŋ-baga.
Ba paa ʋ bii-mulluŋ vɩɩra kpʋ nɛ
ba womporunuŋ lɛ.
Nɩalɩŋ sɩ yuo diiu tɔnsɔ lɩɩsɛ ʋ nɩyuŋŋoo nɛ,
aŋ kɛŋ ʋ nɩbalaa kala hɛ chɔrʋmɔɔ.
11Nɩnɩvɛ, ŋ ma jaŋ gɛrɛ a nagɛ sɩ-nyʋara,
ŋ jaŋ faa
dɩ ŋ dʋndɔŋŋɔɔ sɩ́ŋ na.
12Ŋ dɩɩ-duoruŋ ŋ sɩ kaa pʋpɔ ŋ tɩtɩa nagɛ tutogusuŋ
nɛŋ-bumbumba sɩ bɩa nɛ.
Dɩ ba nɛ jagɩsɛba,
nɛnɛ-la yie tel ba dɩ-diiree niiree lɛ nɛ.
13Beŋ ŋ laalɩyuoroo na,
ba kala nagɛ haalaa nɛ.
Nyiniŋ dii ŋ tinteeŋ boi-baalaa kala nɛ,
ba suro chɩŋ a pɩ ŋ dʋndɔŋŋɔɔ.
14Má ŋaa lɩɩŋ,
a kɛŋ ma tɩtɩaba gbɛrɛ nɩalɩŋ sɩɩ kɔ dɩ ba yuoma.
Má pɔ ma dɩ-duoruŋ woruŋ.
Má buu tɩɛrɩŋ a nʋɔsɛ,
má chɛ tiebii-pɛɛsɩrɩ kʋa bil.
15Arɩ ŋɩɩ kala nyiniŋ jaŋ diima,
koo dɩ ba kpʋma laalɩ-baga lɛ
a nagɛ nyaŋgɩrɩgɛba sɩ dii kɩaa.
Ma pʋŋa nɛ a nagɛ nyaŋgɩrɩgɛba koo hɔbɔ.
16Ma leŋe ma bayallaa pʋŋa pɛ nɛ
a paala kɩɩ chɛnwʋlaa sɩ hɛ wɩa-nyuŋ.
Ama ba nagɛ hɔbɔ sɩ dii tinteeŋ kɩaa kala dɛrɛ nɛ
aŋ file viiri.
17Nɩalɩŋ sɩɩ pɔma nagɛ hɔbɔ nɛ,
ma tɩntɩnnɩ-hɩasɩŋ ma nagɛ hɔbɩ-laalɩŋ nɛ
a sagɛ kɛrɛ nyuŋ dɩ leriŋ nɛ fɩɛla,
ama dɩ wɩa nɛ pɔsɔ ba file viiri,
nʋʋkala bɩ jɩŋ lee-la ba sɩ mʋa.
18Asiiria tinteeŋ kuoru-balɩŋ, ŋ sɩpaalaaraa ka dɩɛgɛ doŋ nɛ,
ŋ nɩbalaa ma pɩŋ aa wiesi.
Ŋ nɩaa pɩsa hɛ peelee nyusuŋ nɛ,
ka nʋʋkala tuo dɩ ʋ kɛmba kʋ hɛ dɔŋɔ.
19Kʋŋkala tuo sɩ jaŋ wuo vaarɩŋ,
bɛɛ wɩaa ŋ sɩ bolimi ŋɩɩ yʋga kieli nɛ.
Nʋʋkala sɩ nɩa dɩ ŋ tele,
ʋ yie porisi nɩsaa nɛ,
bɛɛ wɩaa nʋʋkala na hɛɛŋ nɛ
a tɩŋ ŋ wʋbɔmɔ-la sɩ bɩ dɛrɛ wɩaa.
Právě zvoleno:
NAHUM 3: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014