MƖKA 4
4
La TƖƖNA Peeliŋ
1Tapʋlaa dɩdɛrɩŋ,
La TƖƖNA peel-la nyuŋ Wɩa dɩɩ-balɩŋ sɩ chɩna
nɛ jaŋ kɩɩ peelee kala.
Ʋ nɛ jaŋ sii je kɩɩ dundolo kala,
dɩ tinteyee gire mʋ ʋ leriŋ.
2Tintee daŋ nɩaa jaŋ kɔ a bʋl,
“Má kɔ dɩ la jɩl La TƖƖNA peel-la nyuŋ
a mʋ Jekɔb Wɩa dɩa.
La TƖƖNA jaŋ dagɛla ʋ wombiee,
dɩ la tuto.
Wɩa jaŋ dagɛla ʋ wombii-la ʋ sɩ bile dɩ la tuto a lɩɩ Zaayɔŋ lɛ.
La TƖƖNA niiŋ wɩaa jaŋ lɩɩ Jerusalɛm nɛ.”
3Ʋ jaŋ laa tintee daŋ nɩaa wɩaa jɩma pɩba,
a kɛŋ tintee-duoruŋ sɩ hɛ dɩ-boloo arɩ dɩ-kpagɩsɩŋ nɩaa kʋ hɛ dɔŋɔ dɩ ba ŋaa sɩma.
Ba jaŋ kɛŋ ba tokobiee a libi pirisiŋ,
aŋ kɛŋ ba tiŋŋee ma a libi sɩɩ-kɔrʋsʋŋ.
Tintee kala bɩra bɩ jaŋ joŋ tokobiiŋ a je ʋ dɔŋɔ lɛ,
koo a bɩra gʋnnɛ laalɩŋ yuonuŋ.
4Nʋʋkala jaŋ hɔŋ ʋ girep tɩa bʋbʋɔŋ
a hɔŋ ʋ tutogo bʋbʋɔŋ arɩ yarɩfɩɛlaa.
Nʋʋkala bɩ jaŋ ŋaa dɩ fawʋllʋŋ kɛmba,
bɛɛ wɩaa La TƖƖNA doluŋ kala Tɩɩna nɛ bʋla.
5Tinteyee nɩaa kala
kɛŋ ba vesiŋ yɩrɩŋ nɛ vɩvɛŋ.
La-na jaŋ kɛŋ La TƖƖNA Wɩa
yɩrɩŋ nɛ vɛŋ a kaa mʋ wuu.
Wɩalɩŋ Wɩa sɩ bɩɩna dɩ ʋ ŋaa
6La TƖƖNA sɩ, “Dɩ tapʋlɩɩ-la nɛ yie,
mɩ jaŋ kɛŋ gbɛrɩgɛɛ kʋ hɛ dɔŋɔ
a kɛŋ nɩalɩŋ ba sɩ kaa mʋ yoŋ-baga
arɩ nɩalɩŋ mɩ sɩ leŋe ba nɩna hɛɛŋ kʋ hilimi.
7Mɩ jaŋ leŋ dɩ gbɛrɩgɛ-la kʋkaanaa
arɩ nɩalɩŋ ba sɩ kire ta ŋaa tintee-duo,
dɩ mɩ-na ma TƖƖNA bemba Zaayɔŋ peel-la nyuŋ
a chɩŋ tapʋlɩɩ-la a kaa mʋ wuu.
8Ŋ-na Jerusalɛm nagɛ dɩɩ-leŋii nɛ
mɩ sagɛ ʋ nyuŋ aa beŋ mɩ piesee,
a ŋaa Zaayɔŋ nɩaa dɩ-duoŋ.
Mɩ jaŋ leŋ dɩ ŋ bɩra kɛŋ ŋ faafaa dol-la.
Ma-na Jerusalɛm nɩaa nɛ jaŋ didii kuoruŋ.
9Bɛɛ nɛ tɩɩ ma faasaa ŋmoo niiŋ,
ma bɩ kuoro kɛnɛɛ?
Nɩɩ-la sɩɩ dagɛma lɛlɛ nɛ,
ka ma nɩna hɛɛŋ a nagɛ haala sɩɩ chɛ dɩ ʋ lʋl ʋ luoru wʋwɩɩ?
10Zaayɔŋ nɩaa, maa na hɛɛŋ
a nagɛ haala sɩɩ chɛ dɩ ʋ lʋl ʋ luoruŋ wʋwɩɩ ŋɩɩ nɛ.
Ʋ lɛɛlɛ maga dɩ ma lɩɩ tabal-la lɛ nɛ
a mʋ ŋmoo buguŋ pɔkɔŋ nyuŋ.
Ma jaŋ mʋ Babɩlɔŋ,
nɩmɛ nɛ mɩ jaŋ laama ta.
Mɩ-na ma TƖƖNA jaŋ laama ta
ma dʋndɔŋŋɔɔ nɩsɩŋ lɛ.
11Bʋa deeŋ lɛ tinteyee yʋga nɛ,
a kʋ hɛ dɔŋɔ lɛ dɩ ba yuoma.
Ba sɩ, ‘Má leŋ dɩ la cheyu,
má leŋ dɩ la na dɩ Zaayɔŋ pɩŋ jikpeeŋ.’
12Ama ba bɩ mɩ-na ma TƖƖNA
tʋɔbɩɩnaa jɩŋ,
ba bɩ wɩalɩŋ mɩ sɩɩ bɩɩnʋ dɩ mɩ ŋaa bʋbʋɔŋ jɩŋ.
Mɩ kɛmba kʋ hɛ dɔŋɔ lɛ
a nagɛ mɩɩ-jagɩsɩŋ ba sɩ kaa hɛ dɔŋɔ taha lɛ nɛ.
13Zaayɔŋ nɩaa, má sii ŋmoo mɩɩ-jagɩsɩ-la,
bɛɛ wɩaa mɩ jaŋ leŋ dɩ ma kɛŋ doluŋ a nagɛ hɔɔŋ.
Mɩ jaŋ leŋ dɩ ma naachɩgɩsɩŋ nagɛ kɔlɩɩŋ
dɩ ma kaa nʋɔsɛ tintee daŋ nɩaa bʋrɩgɛ.
Ma jaŋ laa kɩalɩŋ kala ba sɩ gɩrɩma laa a kaa kʋ pɩ mɩ-na ma TƖƖNA,
a joŋ ba dʋa kala pɩ mɩ-na ma TƖƖNA sɩ tɩɩ dʋnɩa kala.”
Právě zvoleno:
MƖKA 4: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014