DANƖƐL 11
11
1Medi tɩŋŋaa Daarus sɩ dii kuoruŋ ʋ jɩ-bumbuŋ lɛ, mɩ nɛ chɩŋ ʋ harɩŋ kpaŋkpaŋ a pɔʋ.”
Ijipiti tinteeŋ kuoro arɩ Siiria kuoro
2“Lɛɛlɛ mɩ jaŋ bʋl wɩɩ-la sɩ jaŋ sɛnɛ ŋaa pɩŋ. Kuoroo batori jaŋ dii kuoruŋ Pɛɛsɩa tinteeŋ lɛ aŋ ka pɩ dɔŋɔ. Ka dɩ kuoru-nɛsɛ kʋ dii a kɛŋ kɩaa kɩɩ ba kala. Ʋ dʋa-la nɛ ʋ jaŋ kaa laa doluŋ. Ʋ jaŋ yigi nʋʋkala hɛ dɩ ba sii chɩŋ Giriisi tinteeŋ nɩaa lɛ. 3Ŋɩɩ lɛ nɛ kuoru-duo kʋbala jaŋ dii kuoruŋ nɩmɛ a kɛŋ ʋ doluŋ ŋaa wɩɩ-la kala ʋ sɩ cho. 4Ʋ ŋɩɩ harɩŋ ʋ kuoruŋ jaŋ tel dɩ ba kaa kpaa dʋnɩa sɛsɩŋ banɛsɛ-la. Ʋ doho nʋʋ bɩra bɩ jaŋ dii kuoruŋ ʋ nyuŋ lɛ koo a kɛŋ ʋ dol-la ŋaa wɩɩ, bɛɛ wɩaa ba jaŋ laa ʋ kuoruŋ a pɩ nɩwogusuŋ.
5Ijipiti tinteeŋ kuoro jaŋ kɛŋ doluŋ, ama ʋ laalɩyuori-hɩasɩŋ dɔŋɔ jaŋ kɛŋ ʋ kuoruŋ laa, ʋ jaŋ kɛŋ doluŋ yʋgɛ woruŋ a beŋ ʋ tinteeŋ. 6Jɩsɩŋ baŋmɛnɛ harɩŋ, Ijipiti tinteeŋ kuoro arɩ Siiria kuoro jaŋ pɛ niiŋ, dɩ Ijipiti tinteeŋ kuoro joŋ ʋ tolo pɩ Siiria kuoro dɩ ʋ jaa, a chɩchɛ dɩ ba nii-la chɩŋ woruŋ, ama ba nii-la bɩ jaŋ chɩŋ. Ba jaŋ joŋ haal-la arɩ ʋ bala, ʋ nyɩmma arɩ ʋ tɩntɩnna-la sɩ to ʋ harɩŋ mʋ pa dɩ ba kpʋ. 7Ʋ ŋɩɩ harɩŋ lɛ tolo-la nyɩmma dɩa nɩaa dɔŋɔ jaŋ sii laa ʋ nyuŋ a dii kuoruŋ. Ʋ jaŋ yuo Siiria kuoru-la laalɩyuoroo aŋ jʋʋ ba dɩɩ-duoruŋ, a yuo diiba. 8Ʋ jaŋ paa ba vesiŋ arɩ ba tɔmɔ-la ba sɩ kɛŋ hɔɔŋ libi, arɩ ba kʋ-yuŋŋie-la kala ba sɩ kɛŋ hɔpʋla arɩ sɛlɩmɛ ŋaa a kaa mʋ Ijipiti tinteeŋ. Ʋ jaŋ leŋ Siiria kuoru-la yuonuŋ jɩsɩŋ baŋmɛnɛ. 9Ŋɩɩ lɛ nɛ Siiria kuoru-la ma jaŋ sii mʋ dɩ ʋ yuo Ijipiti tinteeŋ kuoro, ama ba jaŋ kiru dɩ ʋ mɩɩra mʋ ʋ tinteeŋ. 10Siiria kuoro biiriŋ ma jaŋ kɛŋ ba tɩtɩa hɛ dɔŋɔ dɩ ba yuo laalɩŋ a kɛŋ laalɩyuori-daŋ hɛ dɔŋɔ. Ba jaŋ tii paa leriŋ, a nagɛ lɩɩ-balɩŋ sɩɩ pɛllʋ, dɩ ba yuo laalɩŋ ŋɩɩ halɩɩ, a mʋ jʋʋ Ijipiti tinteeŋ kuoro dɩɩ-duoruŋ.
11Ijipiti kuoro jaŋ na baanɩŋ a kɛŋ laalɩyuoroo mʋ yuo Siiria tinteeŋ kuoru-la sɩ kɛŋ laalɩyuori-daŋ, a yuo diiu. 12Dɩ ba nɛ yuo dii laalɩyuoru-daŋ-la, Ijipiti kuoru-la nyuŋ jaŋ nyaasɛ dɩ ʋ kpʋ laalɩyuoroo bʋɩ-bʋɩba, ama ʋ ha bɩ jaŋ yuo didii deeŋ deeŋ. 13Siiria kuoru-la ha jaŋ bɩra chɛ laalɩyuoru-daŋ sɩ nyɩgɩla woruŋ aŋ yʋga kɩɩ bumbuŋ nɩalɩŋ. Dɩ jɩsɩŋ baŋmɛnɛ nɛ bala, dɩ ʋ bɩra mʋ yuo Ijipiti tinteeŋ kuoro.
14Bʋa-la lɛ nɩ-daŋ jaŋ sii chɩŋ Ijipiti tinteeŋ kuoru-la lɛ. Yuo-hɛɛrɛ-la sɩ hɛ ŋ tɩtɩa nɩaa tʋɔŋ jaŋ lɩɩ ŋ harɩŋ dɩ wɩɩ-la ŋ sɩ na a nagɛ duoso tʋɔŋ kʋ ŋaa wʋtɩtɩɩ. Ama ba jaŋ walɩma ka. 15Ŋɩɩ nɛ Siiria kuoro jaŋ kɔ a saa vaŋkumba dɩ ba to ba lɛ a jʋʋ yuo dii tabal-la ba sɩ saa kɛrɛ golli. Ijipiti tinteeŋ kuoro laalɩyuoroo bɩ jaŋ kɛŋ doluŋ a wuo chemba. Ba nɩalɩŋ ma sɩ paala jɩŋ laalɩŋ yuonuŋ woruŋ bɩ jaŋ wuo yuoba. 16Siiria kuoru-la sɩ kɔ dɩ ʋ yuoba jaŋ ŋaa wɩɩ-la kala ʋ sɩ cho. Nʋʋkala bɩ ʋ sɩpaaŋ jaŋ wuo chɩŋ. Ʋ dɩ laalɩyuoroo jaŋ chɩŋ Iziral tɩŋŋaa tintee-zɔŋ-la lɛ a yuo laa ʋ kala a cheyu. 17Siiria kuoru-la jaŋ chɩchɛ ʋ kɛŋ ʋ laalɩyuoroo kala mʋ Ijipiti tinteeŋ kuoro leriŋ dɩ ba pɛ niiŋ. Ʋ jaŋ joŋ ʋ tolo pʋ dɩ ʋ jaa, dɩ ʋ wuo to ŋɩɩ lɛ a yuo dii ʋ tinteeŋ kala, ama ʋ tʋɔbɩɩna-la bɩ jaŋ chɩŋ. 18Ŋɩɩ nɛ ʋ jaŋ mʋ yuo dii tinteyee yʋgɛ sɩ hɛ mʋgʋ-balɩŋ niiŋ, ama laalɩyuori-hɩaŋ kʋbala jaŋ kʋ yuo dii Siiria kuoru-la, dɩ hɩɩsɩŋ kɛnʋ dɩ ʋ babii-ballɩŋ dɛrɛ. 19Wɩɩŋ deeŋ harɩŋ lɛ ʋ jaŋ mɩɩra joŋ ʋ sɩaa chaasɛ ʋ tinteeŋ dɩɩ-duoruŋ dɩ ʋ yuo paa kɩaa, ama ŋɩɩ lɛ nɛ ba jaŋ kpʋʋ, dɩ ʋ wɩaa dɛrɛ.
20Nɩɩ-la sɩ jaŋ dii kuoruŋ ʋ nyuŋ lɛ jaŋ hɛ nʋʋ dɩ ʋ gɔllɔ laa lampoo ʋ tinteeŋ lɛ dɩ ŋɩɩ leŋ dɩ ʋ tinteeŋ kuoruŋ ha kɛŋ yɩrɩŋ. Jɩsɩŋ baŋmɛnɛ lɛ ba jaŋ kpʋ kuoru-la, ama nɩaa tʋɔŋ koo laalɩŋ lɛ dee.
21Nɩɩ-la sɩ jaŋ laa Siiria kuoro deeŋ nyuŋ a dii kuoruŋ, jaŋ ŋaa nʋʋ sɩ bɩ maga dɩ ʋ dii kuorii-la. Ba bɩ jaŋ zil ʋ kuoruŋ. Ʋ jaŋ yuo tintee-la nɩaa bʋa-la lɛ ba sɩ hɔnɔ ta jɩa a bɩɩnɛ wɩɩ bɩbaa jʋʋ. Ʋ jaŋ kɛŋ badɛ wɩaa laaʋ. 22Ʋ jaŋ yuo dii laalɩyuori-daŋ, a pɛ Wɩɩsʋllɩ sɩpaalaaraa nɩhɩaŋ lɛ a cheiba. 23Ʋ dɩ nɩaa niiŋ nɛ kʋ ŋaa kʋbala, ʋ jaŋ kɛŋ wʋjɩmɩŋ a nyɩsɛba aŋ kɛŋ ʋ nɩaa baŋmɛnɛ dɩ ba laa doluŋ. 24Ʋ jaŋ yuo tintee-la sɩ kɛŋ kɩaa kɩŋkɛŋ nɩaa sɩ hɔnɔ ta jɩa a bɩɩnɛ wɩɩ bɩbaa jʋʋ. Ʋ jaŋ ŋaa wɩalɩŋ ʋ nyɩmmaba arɩ ʋ naabalɩmaba ha sɩ bɩ ŋaa aŋ ka. Ʋ jaŋ joŋ kɩalɩŋ ʋ sɩ yuo paa arɩ kɩalɩŋ ʋ sɩ yuo laa arɩ ba dʋa kala a kpaa ʋ harɩ-tooroo. Ʋ dɩ ʋ nɩaa jaŋ vʋʋrɛ dɩ ba mʋ yuo dii dɩɩ-duoruŋ, ama wɩaa deemba bɩ jaŋ dieni.
25Ʋ jaŋ kɛŋ doluŋ aŋ nyɩrɛ ʋ bɔyɛ a kɛŋ laalɩyuori-daŋ mʋ yuo Ijipiti tinteeŋ kuoro. Ijipiti tinteeŋ kuoru-la ma jaŋ kɛŋ laalɩyuori-daŋ sɩ kɛŋ doluŋ kɩŋkɛŋ a lɩɩ chemu dɩ ba yuo dɔŋɔ. Ama ʋ bɩ jaŋ wuo yuo diiu, bɛɛ wɩaa ba vʋʋra nɛ a chɩŋ ʋ lɛ. 26Kuoro sɩŋŋaa tɩtɩa nɛ jaŋ kɛŋ ʋ naaŋ je. Ba jaŋ yuo dii ʋ laalɩyuoroo dɩ ba nɩ-daŋ sʋʋ laalɩŋ lɛ. 27Kuoro-la balɩa sɩ kɛŋ tʋɔbɩɩŋ bɔŋŋɔɔ jaŋ hɔŋ dɩ-bala dɩ ba dii kɩaa a nyɩɛ wɩaa pɩ dɔŋɔ, ama ba bɩ jaŋ na wɩɩ-la ba sɩɩ chɛ, bɛɛ wɩaa Wɩa laa sɩpaaŋ dagɛ bʋa-la lɛ ba wɩaa sɩ jaŋ dɛrɛ nɛ. 28Siiria kuoru-la jaŋ mɩɩra kɛŋ dʋa yʋgɛ a mʋ ʋ tinteeŋ, ama ʋ jaŋ kɛŋ tʋɔ-lɔrʋŋ Wɩa nɩaa wombiee lɛ a ŋaa wɩɩ-la kala ʋ sɩɩ chɛ ba lɛ, aŋ-na mɩɩra mʋ ʋ tinteeŋ. 29Wɩa sɩ dagɛ bʋa-la nɛ yie, Siiria kuoro jaŋ bɩra mʋ yuo Ijipiti tinteeŋ kuoro, ama bʋa deeŋ lɛ ʋ bɩ jaŋ yuo diiu a nagɛ bumbuŋ-la ʋ sɩ ŋaa ŋɩɩ. 30Nɩalɩŋ sɩ kɛŋ lɩɩŋ daborusuŋ vɩvɛŋ a hɛ wɩɩjʋʋlʋŋ dɩɩrɩŋ mʋgʋ-balɩŋ niiŋ jaŋ kʋ yuou dɩ fawʋllʋŋ kɛnʋ. Ŋɩɩ lɛ nɛ ʋ jaŋ mɩɩra mʋ Wɩa nɩaa tinteeŋ a joŋ ʋ baanɩŋ sɩ faasa sii ŋɩɩ a fɩɩsɛ ba lɛ, aŋ kɛŋ ʋ tɩtɩa mʋ mɛrɛ nɩalɩŋ sɩ vɩa dɩ ba to Wɩa lɛ.
31Ʋ laalɩyuoroo jaŋ sii chei Wɩa dɩɩ-bal-la dɩ-duoŋ dɩ ʋ kɛŋ disiniŋ a pɔ dɩ ba bɩra sɩ́ tapʋlɩɩ kala pʋsʋŋ kpʋ ŋaa Wɩɩsʋlʋŋ. Ba jaŋ joŋ disiŋ kʋŋ sɩɩ chei leriŋ a bil Wɩa dɩɩ-bal-la dɩ-balɩŋ. 32Kuoru-la jaŋ kɛŋ nii-sɩma a nyɩsa chei nɩalɩŋ sɩ vɩa dɩ ba to Wɩa. Ama nɩalɩŋ sɩɩ to Wɩa jaŋ chɩŋ kpaŋkpaŋ a yuou.
33Ba tʋɔŋ nɩalɩŋ sɩ kɛŋ wʋjɩmɩŋ jaŋ dagɛ nɩ-daŋ. Ama bʋa dɔŋ jaŋ yi dɩ ba kpʋba laalɩŋ lɛ koo a nyɩgɛba koo a yuo kɛsɛba koo a paa ba kɩaa. 34Dɩ ba nɩɩ kpʋ Wɩa nɩaa, nɩaa mʋa nɛ jaŋ pɛ ba lɛ a laaba ta. Nɩaa jaŋ yʋgɛ a dɩdɛ sɩaa arɩ ba ma pɛ ba lɛ nɛ. 35Nɩalɩŋ dɔnsʋŋ sɩ kɛŋ wʋjɩmɩŋ jaŋ na hɛɛŋ, dɩ ŋɩɩ ŋaa wɩɩ sɩ jaŋ chɛsɛba a pɩɩsɛ ba disiniŋ ta ka dɩ ba zɔŋ a kaa mʋ yi dɩdɛrɩ-la Wɩa sɩ daga. 36Siiria kuoru-la jaŋ ŋaa wɩɩ-la kala ʋ sɩ cho, a kɛŋ ʋ tɩtɩa yʋga kɩɩ vene kala a bʋl wɩalɩŋ sɩ bɩ maga a tʋʋsɛ Wɩa sɩ kɩɩ kʋŋkala joŋŋoo. Wɩaa jaŋ vɛŋ woruŋ pʋ a kaa mʋ yi bʋa-la lɛ Wɩa sɩ dɔgʋsʋ arɩ baanɩŋ, bɛɛ wɩaa Wɩa jaŋ ŋaa wɩɩ-la ʋ sɩ bɩɩna dɩ ʋ ŋaa. 37Kuoru-la sɩpaa jaŋ tuo ʋ naabalɩmaba vesiŋ lɛ koo vene-la haalaa sɩ cho koo vene dɔŋ kala lɛ. Ʋ jaŋ bee gʋʋnɛ ba kala aŋ kɛŋ ʋ tɩtɩa yʋga kɩɩ ba kala. 38Ʋ jaŋ vɩaba aŋ mɩɩra to vene-la sɩɩ pɔ dɩ-duoruŋ, kʋ-la ʋ naabalɩmaba sɩ bɩ jɩŋ aŋ ka, a joŋ sɛlɩmɛ arɩ hɔpʋla arɩ tabɩɩ-tʋlaa arɩ kɩaa yallɩŋ sɩ hɛyɛ a pʋpʋ. 39Veŋ wogo-la jaŋ pɛ ʋ lɛ dɩ ʋ yuo dii dɩɩ-duoruŋ. Ʋ jaŋ faasa zil nɩalɩŋ sɩɩ tou. Ʋ jaŋ leŋ dɩ ba bibeŋ nɩ-dandaŋ ka dɩ ʋ kɛŋ tinteeŋ kpaa a siiliba.
40Dʋnɩa dɩdɛrɩ-la Wɩa sɩ daga nɛ yie, Ijipiti tinteeŋ kuoro jaŋ sii mʋ dɩ ʋ yuo Siiria kuoro. Siiria kuoru-la jaŋ kɛŋ ʋ laalɩŋ janɩŋ torukoba arɩ ja-jɩllaa a pɛ lɩɩŋ daboru-dandaŋ lɛ a lɩɩ chemu. Ʋ jaŋ mʋ tɔ tinteyee yʋgɛ hɛ a yuoba a nagɛ lɩɩŋ sɩ tɔ leriŋ. 41Ʋ jaŋ yuo tintee-zɔŋ-la ma nɩaa. Ʋ jaŋ kpʋ nɩ-daŋ, ama ba jaŋ laa Ɛdɔm tinteeŋ nɩaa arɩ Mʋab tinteeŋ nɩaa a pɛ Amɔŋ tinteeŋ sɩpaalaaraa lɛ a ta ʋ nɩsɩŋ lɛ. 42Ʋ jaŋ dii doluŋ tinteyee lɛ woruŋ, Ijipiti tinteeŋ nɩaa ma bɩ jaŋ fori. 43Ʋ jaŋ laa Ijipiti tɩŋŋaa sɛlɩmɛ arɩ hɔpʋla arɩ kɩalɩŋ kala sɩ kɛŋ yuŋuŋ. Libiya tɩŋŋaa arɩ Nubia tɩŋŋaa ma jaŋ sɛɩ a tɩma pʋ. 44Duoso jaŋ lɩɩ wɩɩpɔsʋŋ arɩ wɩɩpɔsʋŋ nagʋa dɩɩrɩŋ a kʋ leŋ dɩ ʋ yaraa hosi, dɩ ʋ kɛŋ baanɩŋ kɩŋkɛŋ a lɩɩ yuo laalɩŋ a kpʋ nɩ-daŋ. 45Ʋ jaŋ hɛ ʋ kuoru-lɛŋŋɛɛ Mediterenia mʋgʋ-balɩŋ arɩ peel-la nyuŋ Wɩa dɩɩ-balɩŋ sɩ chɩna pɛgɛ. Ŋɩɩ bʋa lɛ nɛ ʋ jaŋ sʋʋ, nʋʋ bɩ jaŋ pɛ ʋ lɛ.”
Právě zvoleno:
DANƖƐL 11: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014