DANƖƐL 10
10
Danɩɛl duoso na nuhuobiine
1Siirus sɩ dii Pɛsɩa tinteeŋ kuoruŋ, ʋ jɩ-tori lɛ nɛ Wɩa joŋ wɩaa dagɛ Danɩɛl (ba sɩ kaa yɩrɛ Bɛlɩtɛsaza ma). Wɩalɩŋ sɛnɛ ŋaa wʋtɩtɩɩba nɛ, a ŋaa wɩaa sɩ mʋ tɩgɛ laal-bal kʋbala lɛ. Ba dagɛ wɩalɩŋ bʋbʋɔŋ pʋ a nagɛ duosoo tʋɔŋ nɛ.
2Bʋa-la lɛ, mɩ-na Danɩɛl yele yɔɔsʋŋ batori nɛ. 3Mɩ bɩ kʋdii-fɩaŋ kala die a bɩ nammɩa ma chaŋa koo a kɛŋ girep nɛnɛɛ sɩnɩŋ jɩl mɩ niiŋ. Yɔɔsʋ-la batori kala lɛ, mɩ bɩ nʋʋŋ ma tɩsa.
4Jɩna tʋɔŋ chɛŋ bumbuŋ tapʋlaa mara arɩ banɛsɛ chɛɛŋ mɩ chɩŋ fuo-bal kʋbala ba sɩɩ yɩrɛ Tɩgɩrɩs niiŋ, 5aŋ beŋ a na nʋʋ mɩ sɩpaaŋ dɩ ʋ laalɛ gɛrɩpɛ fʋfʋlʋŋ gɛrɩŋ a vɔɔ sɛlɩmɛ tembiiŋ ʋ tɩŋa lɛ. 6Ka ʋ yaraa tʋtʋl a nagɛ tabɩɩ-la ba sɩɩ yɩrɛ kirisola, ʋ sɩaa nagɛ taŋ sɩɩ lɩgɩsʋ, sɩɩ-biee ma nagɛ kapɩlɩŋ nyiniŋ, ʋ nɩsaa arɩ ʋ naasɩŋ tʋtʋl a nagɛ kɔlɩɩŋ ba sɩ kɛŋ nʋʋŋ laarɛ, ka ʋ yikoro ma nagɛ nɩ-daŋ sɩɩ ŋaa goŋ.
7Mɩ-na Danɩɛl dʋndʋŋa nɛ fa na wɩɩŋ deeŋ, mɩ dɩ nɩalɩŋ fa sɩ hɛ lee-la bɩ wɩɩkala na, ama fawʋllʋŋ fa faasa kɛmba nɛ, ba fá mʋ faa. 8Mɩ dʋndʋŋa nɛ fa ka a bibeŋ wʋbalɩŋ deeŋ. Mɩ fa bɩ mɩ nandaa kala wuo, ka mɩ sɩaa faasa biri, mɩ bɩra bɩ dol kala kɛnɛ. 9Ŋɩɩ nɛ mɩ nɩɩ dɩ ʋ bʋl wɩaa. Mɩ sɩ nɩɩ ʋ yikoro ŋɩɩ, mɩ tele chu tinteeŋ a kpaŋa pɩŋ.
10Ʋ kɛmmɛ chʋʋla kɩɩ, mɩ kpirimi mɩ nɩsaa arɩ mɩ naadʋsʋŋ nyuŋ a chichel. 11Ʋ yɩrɛmɛ, “Danɩɛl, Wɩa choŋ nɛ woruŋ a tɩmmɛ ŋ teeŋ. Sii chɩŋ a fɩɛlɛ ŋ sɩaa a jegile nɩɩ wɩalɩŋ mɩ sɩɩ chɛ dɩ mɩ bʋla pɩŋ.” Ʋ sɩ bʋl ŋɩɩ pɩmɛ, mɩ sii chɩŋ a chichel.
12Ŋɩɩ nɛ ʋ bɩra bʋl, “Danɩɛl, sɩ́ fawʋllʋŋ fá. Tapʋl-bumbuŋ-la ŋ sɩ joŋ ŋ nyuŋ hɛ dɩ ŋ jɩŋ wɩalɩŋ sɩaa a kɛŋ ŋ tɩtɩa muuri Wɩa sɩpaaŋ ŋɩɩ, ʋ laa ŋ sʋla nɛ a tɩmmɛ dɩ mɩ kʋ bʋl wɩalɩŋ ŋ sɩɩ chɛ a pɩŋ. 13Ama Sɩtaanɩ tɩndaarʋ-la sɩɩ beŋ Pɛsɩa tinteeŋ tɔ mɩ wombiiŋ tapʋlaa mara arɩ kʋbala nɛ. Ŋɩɩ nɛ Maakɩl sɩ ŋaa Wɩa tɩndaaraa nɩhɩaŋ dɔŋɔ kʋ pɛ mɩ lɛ, a tɩŋ Sɩtaanɩ tɩndaarʋ-la sɩɩ beŋ Pɛsɩa tinteeŋ fa sɩ tɔ mɩ wombiiŋ wɩaa. 14Lɛɛlɛ mɩ kɔ dɩ mɩ bʋl wɩɩ-la maachie sɩ jaŋ ŋaa ŋ nɩaa lɛ nɛ a pɩŋ. Wɩɩ-la ŋ sɩ na a nagɛ duosoo tʋɔŋ tɩgɛ maachie wɩalɩŋ sɩ jaŋ ŋaa lɛ nɛ.”
15Ʋ fa ha sɩɩ bʋl wɩɩŋ deeŋ mɩ teeŋ ŋɩɩ, mɩ kɛŋ mɩ sɩaa chu tinteeŋ a bɩ wɩaa wuo bʋl. 16Ŋɩɩ nɛ kʋ-la sɩ nagɛ nuhuobiine bɩra digi mɩ niipinee lɛ, mɩ bɩra wuo bʋl wɩaa. Mɩ bʋla pɩ nɩɩ-la sɩ chɩŋ mɩ sɩpaaŋ, “Mɩ nɩhɩaŋ, wɩɩ-la mɩ sɩ na a nagɛ duosoo tʋɔŋ leŋe mɩ na hɛɛŋ kɩŋkɛŋ nɛ a bɩ mɩ nandaa kala wuo. 17Mɩ nɩhɩaŋ, ɛɛ nɛ mɩ-na ŋ tɩntɩnna jaŋ ŋaa a wuo bʋl wɩaa ŋ teeŋ? Mɩ doluŋ dɛrɛ nɛ, mɩ bɩra bɩ wuo wiesi.” 18Kʋ-la sɩ nagɛ nuhuobiine bɩra digimi, a pɩmɛ doluŋ. 19Ʋ bʋla pɩmɛ, “Wɩa choŋ nɛ woruŋ, sɩ́ fawʋllʋŋ fá, kɛŋ yarɩfɩɛlaa a faasa dol.” Ʋ sɩ bʋl ŋɩɩ, mɩ bɩra kɛŋ doluŋ a bʋl, “Mɩ nɩhɩaŋ, bʋl wɩaa pɩmɛ, ŋ sɩ folo pɩmɛ doluŋ.”
20Ŋɩɩ nɛ ʋ pɩɛsɛmɛ, “Ŋ jɩŋ wɩɩ-la sɩ tɩɩ mɩ kɔ ŋ teeŋ nɛɛ? Ʋ bɩ jaŋ dieni ka dɩ mɩ mɩɩra mʋ yuo Sɩtaanɩ tɩndaarʋ-la sɩɩ beŋ Pɛsɩa tinteeŋ. Dɩ mɩ nɛ mʋa, Sɩtaanɩ tɩndaarʋ-la sɩɩ beŋ Giriisi tinteeŋ ma jaŋ kʋ pɛ dɩ ba yuomi. 21Ama mɩ jaŋ laa sɩpaaŋ bʋl wɩɩ-la ba sɩ ŋmʋnsa hɛ Wʋtɩtɩɩ Teŋ-la lɛ. Nʋʋkala bɩ mɩ lɛ pɛ yuoba, see Wɩa tɩndaara Maakɩl. Ʋ nɩɩ pɔ ma Iziral tɩŋŋaa.
Právě zvoleno:
DANƖƐL 10: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014