AMƆS 9
9
Ba jaŋ chei Iziral tɩŋŋaa
1Mɩ-na Amɔs na La Tɩɩna arɩ duosoo tʋɔŋ dɩ ʋ chɩŋ Wɩɩsʋllɩ koruŋ sɛmɛ, aŋ bʋl,
“Faasa ŋmoo Wɩa dɩɩ-bal-la jebiee nyuŋ-gbaŋa lɛ
dɩ ba gentisiŋ jigisi a giri tele tɔ nɩalɩŋ sɩ hɛ tʋɔŋ.
Nɩalɩŋ sɩ ka, mɩ jaŋ kpʋba laalɩŋ lɛ.
Ba kʋbala ma bɩ jaŋ fá.
Nʋʋkala bɩ jaŋ fori.
2Dɩ ba nɛ tɔɔ jʋʋ tinteeŋ bʋbʋɔŋ ma, mɩ jaŋ lɛrɛ lɩɩsɛba.
Dɩ ba nɛ jɩl wɩa-nyuŋ dɩ-bolii ma,
mɩ jaŋ lɛrɛba lɩɩ nɩmɛ kʋ tuu.
3Dɩ ba nɛ jɩla faa peel-la ba sɩɩ yɩrɛ Kamɛl nyuŋ,
mɩ jaŋ chɛ kɛsɛba.
Dɩ ba bɩra faa mʋgʋ-balɩŋ bʋbʋɔŋ dɩ mɩ sɩ́ ba na ma,
mɩ jaŋ leŋ dɩ kataha sɩ hɛ lɩɩŋ tʋɔŋ dɩmba.
4Dɩ ba dʋndɔŋŋɔɔ nɛ yuo kɛsɛba kaa mʋ yoŋ-baga ma,
mɩ jaŋ leŋ dɩ ba kpʋba nɩmɛ.
Mɩ jaŋ joŋ mɩ sɩaa pɛsɛ ba lɛ a ŋaaba wʋbɔŋ,
wʋzɔŋ dee.”
5La Tɩɩna doluŋ kala Tɩɩna nɛ digi tinteeŋ,
ʋ yie zigili nɛ, nɩalɩŋ sɩ hɛ ʋ lɛ yel.
Wɩa ŋaa tinteeŋ kala sii nɛ aŋ bɩra tuu pɩŋ
a nagɛ Naayɩl fuo-la fa sɩ sii ŋɩɩ aŋ tuu pɩŋ.
6La Tɩɩna saa ʋ kuoru dɩa Wɩa-jaŋ nɛ aŋ leŋ ʋ gentine hɛ tinteeŋ.
Ʋ leŋe mʋgʋ-balɩŋ lɩɩŋ sii jɩl wɩa-nyuŋ
a bɩrɩmɛ duonuŋ a nɩɩ hɛ tinteeŋ lɛ.
Ʋ yɩrɩŋ nɛ La TƖƖNA.
7La Tɩɩna bʋla,
“Ma Iziral tɩŋŋaa sɩ ŋaa nɩfɩɛma ŋɩɩ mɩ teeŋ,
ŋɩɩ tɩtɩa nɛ Kus tɩŋŋaa ma nagɛ.
Mɩ nɛ kɛmma lɩɩ Ijipiti tinteeŋ lɛ.
Mɩ nɛ ha kɛŋ Fɩlɩsɩtɩa tɩŋŋaa ma kʋ lɩɩ Keriti tinteeŋ lɛ,
a kɛŋ Siiria tɩŋŋaa ma a kaa kʋ lɩɩ Kɛɛ tinteeŋ lɛ.”
8La TƖƖNA Wɩɩjarɩbakɔ bɩra bʋla,
“Mɩ sɩɩŋ na ma Iziral tinteeŋ deeŋ sɩ ŋaa wʋbɔŋ ŋaaraa ŋɩɩ nɛ.
Mɩ jaŋ kpʋ ma Jekɔb doho nɩaa
dɩ ma lɛl dʋnɩa lɛ aŋ ka mʋa.
Mɩ-na ma Tɩɩna nɛ bʋla.
9Mɩ jaŋ pa wombiiŋ dɩ ba kɛŋ ma Iziral tɩŋŋaa
a chɩgɩsɛ a nagɛ ba sɩ joŋ mɩaa hɛ chese lɛ a chesi.
Mɩ jaŋ chesima tinteyee tʋɔŋ
a lɩɩsɛ ma nɩalɩŋ sɩ ŋaa nɩyaayasɩŋ a ta.
10Wʋbɔŋ ŋaara-la sɩ hɛ mɩ nɩaa tʋɔŋ a bʋl,
‘Wʋlɔrʋ kala bɩ jaŋ jʋʋla koo a puula,’
ba jaŋ kpʋba laalɩŋ lɛ.
Ba jaŋ wasa saa Iziral
11Tapʋlɩɩ dɔŋ mɩ jaŋ wasa saa kuoro Devit dɩa-la sɩ tele
a pɩŋ jikpeeŋ dɩ ʋ nagɛ ʋ fa sɩ nagɛ ŋɩɩ,
mɩ jaŋ wasa saa lere-la kala sɩ cheye.
12Ŋɩɩ jaŋ leŋ dɩ Iziral tɩŋŋaa bɩra wuo yuo kɛsɛ Ɛdɔm nɩkaana-la
arɩ tinteye-la fa sɩ ŋaa mɩ nɩaa.”
La Tɩɩna nɛ bʋla.
Ʋ nɛ jaŋ ŋaa wɩaa deemba.
13La Tɩɩna bɩra bʋla,
“Bʋa kʋbala ka kɔ nɛ, ma bagɩsɩŋ kɩaa jaŋ wasɛ kɩŋkɛŋ.
Ma bɩ jaŋ wuo kʋŋ ma mɩaa kala kɔ dɩa ka dɩ pɛrɩŋ bɩra yi.
Ma bɩ jaŋ wuo tɔrɛ ma girep nɛnɛɛ dɛrɛ, ka dɩ ba tɔrʋŋ bɩra yi.
Ma peelee arɩ dundolluŋ jaŋ tɔ
arɩ girep tɩɩsɩŋ dɩ tɩɩnɛnɛɛ sɩnɩŋ pʋrɩgɛ.
14Mɩ jaŋ kɛŋ mɩ nɩaa Iziral tɩŋŋaa mɩɩra lɩɩ yoŋ-baga
kɔ ba tɩtɩa tinteeŋ.
Ba jaŋ paa ba tasɩ-la sɩ pɩŋ jikpeeŋ saa a jʋjʋʋ.
Ba jaŋ pɛrɛ girep tɩɩsɩŋ bagɩsɩŋ a nyʋnyʋa ba sɩnɩŋ.
Ba jaŋ pɛrɛ bagɩsɩŋ, a dii ba kɩaa.
15Mɩ jaŋ leŋ dɩ Iziral tɩŋŋaa naapoloo chaasa jʋʋ tintee-la mɩ sɩ joŋo pɩba.
Nʋʋkala bɩra bɩ jaŋ wuo churiba a kaa mʋ wuu.
Mɩ-na ma Tɩɩna Wɩa nɛ bʋla.”
Právě zvoleno:
AMƆS 9: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014