Itorati 18
18
Isadaka cho uvahiya opochera ishaani ni Alawi
1“Opochera ishaani Alawi, yaani nikosho nonkhaye na Alawi ahivahiye vakittu variwoothe mwiilhaponi mwa attu o Israeli. Yayo anohalha ukhulhuvelha mipata cho isadaka chinokumuheriya wa Apwiiya Nlhuku, 2ni wala ahikhalhe ni ilhapo yo ukhalha yawaya, thoko chiri aya wa attu akina munlhokoni mwa attu o Israeli. Apwiiya Nlhuku phi nohalha waavaha mahalha aya thoko chaalhehilhe aya.
3“Attu vanohalha aya ukumiha isadaka aya yo ing'ope ama ikhondoro, mahalha o uvahiya opochera ishaani akhalheke: Mweto wo uhoolho, marama ni chittu cho mmirimani. 4Mwaavaheke milhipu cho choolhia chinyu, idivai, makhura o izeituni, ni mapururu anochokholha utupulhiya o ikhondoro chinyu. 5Mmakoshoni mwinyu mwonkhaye, Apwiiya Nlhuku ahothanlha nikosho na Alawi nikhalhe phi opochera ishaani mahuku o uhimalha.
6“Yakhalhaka Nlawi riyoothe nokhalha iwani iriyoothe mu Israeli noottuna mwaneneru uthama, nowooria uthama ni urwaa vakittu vakina vathanlhiye ni Apwiiya Nlhuku wiira athimichelhiye, 7ni wowo nowooria uvara ntheko wo opochera ishaani a Apwiiya Nlhuku, Nlhuku awe thoko Alawi akina chinovara aya ntheko umihoolho wa Apwiiya Nlhuku alhe. 8Apatteke mipatta chaya cho choolhia thoko chinopatta aya opochera ishaani akina, ni ashungeke ittu iriyoothe inorweehelhiya aya ni ashilhoko aya.
Waamukiya uhiya iphiro chihinottuna awe Nlhuku
9“Vanohalha inyu uphiya mwiilhaponi unovahiya inyu ni Apwiiya Nlhuku inyu, nhiwe mwaattwara iphiro cho urushiha chinopanga aya attu o chechiyo ilhapo chiyo. 10Hikhalhe ntu riyoothe munlhokoni mwinyu nonkumiha mwaamwanawe ukhalha isadaka yo upahiya vamooroni, ni wala hikhalhe ntu o moopa nttiti, wala ntu o waavitulha akhwiri, wala ntu o ulhohera chittu, 11ama ntu o ulhwaa, wala nkhwiri, ama o wuulhumacha ni minepa, ama ni mashoka o unanara, ama attu akhwilhe. 12Ukhalhawaya Apwiiya Nlhuku anonvenga ntu riyoothe nopanga chechiyo, phi nlhatu etu ninoomolhacha aya makosho onkhaye mwiilhaponi urii umihoolho winyu. 13Nansho nkhalheke attu o wiitimarikha umihoolho wa Apwiiya Nlhuku inyu.”
Malhehano o uvahiya namilhohi
14Yamalheke ashinna Musa ahothepa wiira, “Ilhapo inokelha inyu ukhalhelha iyo, attu aya anottwara iphiro cha attu o mwoopa nttiti ni iphiro cha attu o miruchi, nansho Apwiiya Nlhuku inyu khanoohiyererani mwaatti wiira mpange chiicho.
15“Nansho Apwiiya Nlhuku inyu, anonruma namilhohi rii thoko mii, o ukhuma munlhokoni mwa Aisraeli naninyu, ni inyu munrumelhelheke yoyo.
16“Ukhalhawaya nihuku naathukumanne inyu umwaakoni Usinai, mwaholhepelha wo wiira, ‘Khaninottuna wiiwa tho nlhove na Apwiiya Nlhuku, Nlhuku ihu, ni mena nihoone tho ulha mooro muulhupalhe ulha, nihiwe naakhwa!’ 17Paahi Apwiiya Nlhuku ahokiirelha wiira, ‘Ahoolhumacha ittu yo ikekhiaye. 18Kinonruma etu mmilhokoni mwaya namilhohi thoko inyuva, kinohalha aka ummaha malhove, ni uyo noohimiacha kila ittu inohalha aka unlhehera. 19Yoyo nowuulhumacha wo ikuru aka, ni Mii kimwanene kinontwarusha ntu riyoothe, hinohalha wiiwelhelha malhove anohalha awe wuulhumacha yoyo namilhohi uyo. 20Nansho yakhalhaka namilhohi riyoothe nowuulhumacha ittu wo nchina naka, ittu kihinamwiirelha aka wiira oolhumache, yoyo eeviyeke wo yoyo nlhatu uyo. Ni anamilhohi akina anohalha wuulhumacha ittu wo nchina no milhuku chikina, ni ayo eeviyeke.’
21“Nnowooria mwaattiva ushanga ni wiira, nnohalha wooria chani uchuwelha nlhove nihikhumme wa Apwiiya Nlhuku. 22Paahi etu, yakhalhaka namilhohi nowiipanga wiira nohimiacha ittu wo ikuru ya Apwiiya Nlhuku, ni ittu iyo ihikhumelhelhaka, yeyo ittu iyo khayaahimiye ni Apwiiya Nlhuku. Yoyo namilhohi uyo ahowiiraka uhimiacha wo ikuru awe mwanene, ni inyu mwaatti nhimwoove yoyo ntu uyo.”
Právě zvoleno:
Itorati 18: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.