Itorati 17
17
1“Nhaakumihere Apwiiya Nlhuku inyu isadaka yo ing'ope, ama ikhondoro, ama ipuri yo uremara ihinaateelhiha, ukhalhawaya yeyo phi ittu inaarusha Apwiiya Nlhuku inyu.
2“Mweewakaru wiira iwani imoka munlhokoni mwinyu nlhopwana ama nthiyana howonya umihoolho wa Apwiiya Nlhuku inyu, ni uhiya malhehano aya, 3wo uthimicha ni ukavihera milhuku chikina, ama nchuwa, ama mweeri, ama ittotwa cho wiirimu, ama chittu chikina chihilhehenre aka wiira chithimichiye. 4Yakhalhaka etu mwaatti nheewa yoyo mwaha uyo, nkohakoheke etu rata chene. Yooniaka wo ikekhiaye wiira hopanga chiicho, mwiilhaponi mwa attu o Uisraeli, 5paahi munkusheke yoyo nlhopwana uyo ama yoyo nthiyana wonnye uyo mpaka vachereshere iwani inyu iyo, mwamwaateke malhuku mpaka akhweeke. 6Nansho eeviyeke vari attu eelhi ama araru, o woonechesha, hiiviye wo woonecheshiya ni ntu mmoka vekha aya. 7Attu o woonechesha ayo akhalheke phi o uchokholha umwaata malhuku ntu uyo wiira akhwe, ni vavawo attwareke attu akina. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu.
8“Vanowooria ukhalha milhatu cho urikarika chinene chihinooria inyu waamulha mmawaani mwinyu, thoko cho wiivananiya, ama wiiva wo uhilhakelha, ama urakalhihaniya, ama milhatu cho mwaha wo nhakhu wa ntu, paahi nkusheke chechiyo milhatu chiyo, nrweeke mpaka vakittu vathanlhiye ni Apwiiya Nlhuku inyu. 9Wowo etu, nrweeheke wa opochera ishaani ari Alawi, ni wa o waamulha milhatu anovara ntheko wo waamulha attu yeyo ikatema iyo. Mwaahimiachereke, ni ayo anokoohukumulha yoyo nlhatu uyo. 10Yamalhaka, mwapangeke thoko chinre inyu wo ulheheriya, vavawo vakittu vathanlhiye ni Apwiiya Nlhuku vawo. Nansho mwapangeke rata, thoko chinre inyu wo uhimeriya wiira mwapange chiyo. 11Mwapangeke wo ikekhiaye thoko chinohalha aya ulheherani. Nhiwe mwaarukunuwa malhove anohalha aya ulheherani ayo. 12Ntu riyoothe nohalha uvaanyiha chinohimiya ni opochera ishaani, ama attu o waamulha milhatu anovara ntheko yeyo ikatema iyo, yoyo ntu uyo eeviyeke. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu. 13Attu onkhaye anowiiwa ni woova, ni wala khanopanga tho ittu yo uhilhoka.
Malheheriyo anaacha amwene
14“Vanohalha inyu ukelha wiilhaponi unovahiya inyu ni Apwiiya Nlhuku wiira ikhalhe yawinyu, ni ukhalha mwommo, nkamweera wiira, ‘Nimmareke nchina mwene, thoko chiri aya attu o ilhapo chikina chinonirukureria,’ 15mwanvareke nchina etu ntu nohalha uthanlhiya ni Apwiiya Nlhuku inyu. Yoyo akhumeke munlhokoni mwa attu o Israeli naninyu. Nhiwe mwanvara nchina nlheto, wiira akhalhe mwene inyu, ntu hikhumme munlhokoni mwinyu. 16Tho, yayo amwene ayo ahiwe aahuwa afarasi enchi, ama ahiwe eerelha attu wiira ahokolhie Umisri arwee aakushe afarasi akina enchi, ukhalhawaya Apwiiya Nlhuku ahowiirelhani wiira, ‘Nhiwe mwaahokholhia tho wowo.’ 17Ni wala ahiwe aakhalha ni manyaahanu enchi, apangaka chiicho etu nrima aya unowa ukelhiya itiyamaru, ni uhiya iphiro cha Apwiiya Nlhuku. Ni tho, ahiwe eeshungera nhakhu mwinchi wo malhuku o ifedha ama idhahabu. 18Vanohalha aya ukhalhelha ihiche yo umwene vawo, alhepeke ikitabu yo alha malhehero alha, o ukhuma nhina ikitabu yo iamuri inoshungiya ni opochera ishaani arii Alawi. 19Akhalhaneke yeyo ikitabu iyo, eeshomelheke kila nihuku vakittu vanokhalha aya, wiira eettucheke iphiro yoombone yo waathimicha Apwiiya Nlhuku aya, ni uttwara rata malhove onkhaye anolheheriya ni iamuri, ni ikekhia ilha. 20Apangaka chiicho, khanowa eewelhiha aneneru, ni wiichoona wiira phi oombone waapwaha attu o Israeli akina, ni uhiya vathetho malhehero alha wo iphiro iriyoothe. Paahi etu anoolhokelha mahuku menchi muutawarani mwaya, anene ayo ni achishaana aya mwiilhaponi mwa attu o Israeli mmo.
Právě zvoleno:
Itorati 17: MOT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
The Bible Version in Makua @The Word for The World International and Makua Language translators. All rights reserved.