Chivkeeb 37
37
Yauxej Thiab Nws Cov Tijlaug
1Yakhauj tseem nyob hauv tebchaws Kana-as uas nws txiv ibtxwm nyob los lawm. 2Zaj no yog hais txog Yakhauj tsev neeg lub neej.
Yauxej yog ib tug tub hluas uas muaj hnubnyoog kaum-xya xyoo; nws mus yug yaj thiab tshis nrog nws cov tijlaug uas yog Npilehas thiab Xilepas uas yog nws txiv ob tug niamyau cov tub. Nws pheej coj tej yam tsis zoo uas nws cov tijlaug ua los piav qhia rau nws txiv mloog.
3Tagnrho Yakhauj cov tub, mas nws hlub Yauxej tshaj, rauqhov nws muaj Yauxej thaum uas nws twb laus lawm. Nws xaws tau ib lub tsho ntev uas muaj npab#37:3: lub tsho ntev uas muaj npab; lossis lub tsho ntev uas txaij. rau Yauxej hnav. 4Thaum Yauxej cov tijlaug pom tias lawv txiv hlub Yauxej tshaj lawv lawm, lawv thiaj ntxub nws heev, txog qhov uas yeej tsis xav hais ib lolus zoo rau nws li.
5Muaj ib hmo Yauxej txawm ua npausuav, thiab thaum nws qhia zaj npausuav ntawd rau nws cov tijlaug mloog tag, ua rau lawv hajyam ntxub nws heev ntxiv. 6Nws hais tias, “Nej mloog kuv zaj npausuav no seb. 7Peb sawvdaws tabtom pav peb cov tes nplej nyob hauv teb, kuv tes nplej txawm sawv ntseg ntsees tiamsis nej cov txawm sawv vijvog kuv tes thiab ciali qhau zomzaws los hawm kuv tes nplej.”
8Nws cov tijlaug nug hais tias, “Koj xav tias koj yuav tau ua vajntxwv kav peb no lov?” Ces lawv tseem hajyam ntxub nws heev ntxiv, vim nws zaj npausuav thiab tej lus uas nws piav rau lawv mloog ntawd.
9Dhau ntawd Yauxej rov ua dua ib zaj npausuav thiab nws qhia rau nws cov tijlaug mloog hais tias, “Kuv rov ua ib zaj npausuav hais tias kuv pom lub hnub, lub hli thiab kaum-ib lub hnubqub txawm ntsaub los hawm kuv zomzaws.”
10Nws kuj piav zaj npausuav no rau nws txiv mloog huv tibsi thiab; nws txiv txawm yws nws hais tias, “Uacas koj yuav txawj ua npausuav ualuaj li? Koj xav tias koj niam wb thiab koj cov tijlaug, peb sawvdaws yuav tau los txhoscaug hauv av pe koj no lov?” 11Yauxej cov tijlaug txawm khib nws heev, tiamsis nws txiv xavntsoov txog zaj npausuav ntawd rau nruabsiab. #Teshl 7:9
Yauxej Raug Muag Thiab Coj Mus Rau Tebchaws Iziv
12Muaj ib hnub thaum Yauxej cov tijlaug mus yug lawv txiv pab tsiaj rau pem Sekhees, 13Yakhauj hais rau Yauxej tias, “Kuv xav kom koj mus pem Sekhees, qhov chaw uas koj cov tijlaug yug tsiaj.”
Yauxej teb tias, “Tau kawg mas!”
14Nws txiv hais rau nws tias, “Koj mus saib seb koj cov tijlaug puas nojqab nyobzoo thiab tej tsiaj puas nyob txhij-txhua, es koj rovqab los qhia rau kuv paub.” Yogli ntawd, nws txiv thiaj tso nws sawvkev hauv lub Hav Henploos mus lawm.
Yauxej mus txog pem Sekhees, 15thiab nws ncig mus ncig los ntawm roob mojsab; muaj ib tug txivneej pom nws thiab nug nws hais tias, “Koj nrhiav dabtsi?”
16Nws teb tias, “Kuv tabtom nrhiav kuv cov tijlaug uas lawv tuaj yug lawv cov tsiaj. Thov koj qhia rau kuv seb lawv mus yug tsiaj rau qhovtwg lawm?”
17Tus txivneej ntawd teb tias, “Lawv twb tawm ntawm thaj chaw no mus lawm. Kuv hnov lawv hais tias lawv yuav mus rau tom Dauthas.” Ces Yauxej thiaj lawv cov tijlaug qab mus thiab pom lawv nyob rau ntawm Dauthas.
18Thaum lawv pom Yauxej tseem nyob deb thiab tuaj tsis tau txog, lawv txawm tuavhauv yuav muab Yauxej tua povtseg. 19Lawv ib leeg hais rau ib leeg tias, “Tus nyuag uas txawj-txawj ua npausuav ntawd tuaj lawm lau! 20Zaumno, peb muab nws tua povtseg thiab muab nws coj mus pov rau hauv cov qhovtshij qhuav no ib lub. Peb mam dag hais tias muaj ib tug tsiaj nyaum muab nws tom lawm, seb nws tej npausuav yuav tshwm tuaj licas!”
21Thaum Lunpees hnov lawv hais li ntawd, nws txawm nrhiav tswvyim pab cawm Yauxej. Nws thiaj hais tias, “Peb tsis txhob muab nws tua, 22tiamsis cia peb muab nws pov rau hauv lub qhovtshij uas nyob ntawm roob mojsab qhua no xwb, tsis txhob ua kom nws nqaij ntuag ntshav nrog.” Lunpees hais li no, rauqhov nws xav cawm kom Yauxej dim ntawm lawv thiab tso nws rov mus cuag nws txiv. 23Thaum Yauxej tuaj txog ntawm nws cov tijlaug lawm, lawv txawm muab nws lub tsho ntev uas muaj tes#37:23: lub tsho ntev uas muaj tes; lossis lub tsho ntev uas txaij. hle hlo. 24Ces lawv txawm muab nws mus pov rau hauv lub qhovtshij uas qhuav lawm.
25Thaum lawv tseem tabtom noj mov, lawv txawm tsa qhovmuag ntsia pom ib pab neeg Yisamayees taug kev pem lub nroog Nkile-as tuaj mus rau nram tebchaws Iziv. Lawv cab ntxhuav thauj tej tshuaj tswqab thiab txujlom mus muag. 26Yudas hais rau nws cov kwvtij tias, “Yog peb muab peb tus kwv tua povtseg thiab npog nws cov ntshav cia, peb yuav tau dabtsi? 27Peb kuj muab nws muag rau cov neeg Yisamayees ntawd. Peb tsis txhob ua rau nws raug mob, rauqhov nws yeej yog peb tus kwv thiab nrog peb koom roj koom ntshav.” Ces nws cov kwvtij kuj pomzoo li nws hais. 28Thaum cov tublag tubluam tus puav uas yog neeg Midias dhau kev tuaj, ces cov tijlaug#37:28: cov tijlaug; phau lus Henplais hais tias lawv. thiajli rub Yauxej tawm hauv lub qhovtshij los thiab muab nws muag rau cov Yisamayees ua 20 lub txiajnyiag, ces luag thiaj coj Yauxej mus rau tebchaws Iziv lawm. #Teshl 7:9
29Thaum Lunpees rovqab mus rau tom lub qhovtshij thiab tsis pom Yauxej nyob hauv lawm, nws nyuajsiab heev, nws txawm muab nws lub tsho dua rhe. 30Nws rov los cuag nws cov kwv thiab hais rau lawv tias, “Tsis pom Yauxej nyob hauv lub qhovtshij lawm! Zaumno kuv yuav ua licas lau?”
31Ces lawv txawm muab ib tug tshis tua thiab muab Yauxej lub tsho ntev mus raus rau hauv cov ntshav tshis. 32Lawv thiaj nqa lub tsho ntev uas muaj tes ntawd mus rau lawv txiv thiab hais tias, “Peb khaws tau lub tsho ntev no. Koj sim muab saib seb puas yog koj tus tub lub tsho los tsis yog?”
33Nws nco tau lub tsho ntawd zoo thiab hais tias, “Yog lau, lub tsho no yog Yauxej lub! Muaj tsiaj nyaum muab kuv tus tub tom lawm tiag. Kuv tus tub Yauxej raug muab dua ua tej dwb daig lawm lau!” 34Yakhauj dua rhe nws lub tsho povtseg thiab muab ntaub tsaj los npua ua kev tusiab quajntsuag. Nws quaj rau nws tus tub tau ntau hnub. 35Tagnrho nws tej tub tej ntxhais puavleej los nplig nws siab, tiamsis nws yeej tsis mloog leejtwg hais li; nws hais tias, “Txawm kuv txojsia tu thiab mus txog hauv tubtuag teb los kuv yeej tseem yuav quajntsuag txog kuv tus tub li.” Yogli ntawd, nws pheej quaj txog nws tus tub Yauxej li.
36Thaum cov tublag tubluam uas yog neeg Midias mus txog rau hauv tebchaws Iziv lawm, lawv txawm muab Yauxej muag rau Pautifas uas yog Falaus#37:36: Falaus: tsis yog ib lub npe neeg tiamsis yog ib lub meejmom uas txhais hais tias “vajntxwv.” ib tug thawj tubrog saib cov tubrog uas zov Falaus lub loog.
Právě zvoleno:
Chivkeeb 37: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.