Chivkeeb 35
35
Vajtswv Foom Koobhmoov Rau Yakhauj
1Vajtswv hais rau Yakhauj tias, “Koj ciali mus nyob rau pem Npethees. Koj ciali teeb ib lub thaj rau Kuv, uas yog tus Vajtswv uas tau los tshwm rau koj pom thaum koj khiav koj tus tijlaug Exaus.” #Chiv 28:11-17
2Yogli ntawd, Yakhauj thiaj hais rau nws tsev neeg thiab tagnrho cov neeg uas nrog nws nyob ntawd hais tias, “Nej ciali muab cov neeg txawv tebchaws tej nyuag vajtswv uas nej muaj coj mus povtseg, ntxuav nej kom huv thiab muab tej tsoostsho uas ntxhua tau huvsi lawm los hnav. 3Peb yuav sawvkev ntawm no mus rau pem lub nroog Npethees, qhov chaw uas kuv yuav teeb ib lub thaj rau Vajtswv tus uas tau pab kuv thaum kuv raug kev txomnyem nyuajsiab, thiab yog tus uas nrognraim kuv txhua qhov uas kuv mus.”
4Yogli ntawd, lawv thiaj muab tagnrho cov neeg txawv tebchaws tej nyuag vajtswv uas lawv muaj thiab tej qhwsntsej huv tibsi rau Yakhauj. Yakhauj thiaj coj mus faus rau hauv tsob ntoo qhib uas nyob ze lub nroog Sekhees. 5Thaum Yakhauj thiab nws cov tub tabtom sawvkev mus, Vajtswv ua rau cov neeg hauv tej moos uas nyob ib puagncig ntawd ntshai kawg li. Cov neeg ntawd thiaj tsis kam mus caum Yakhauj lawv qab.
6Yakhauj thiab nws cov neeg los txog hauv lub zos Lus uas nimno yog lub nroog Npethees, hauv tebchaws Kana-as. 7Nyob qhov ntawd, Yakhauj teeb tau ib lub thaj thiab nws tis npe rau thaj chaw ntawd hu ua Ees Npethees,#35:7: Ees npethees: Lub npe no lus Henplais txhais hais tias “Tus Vajtswv ntawm Npethees.” rauqhov Vajtswv tau los tshwm rau Yakhauj pom thaum nws khiav nws tus tijlaug mus txog ntawm qhov chaw ntawd. 8Denpaulas yog ib tug uas ibtxwm tu Lenpekas thaum yau los tau tuag thiab lawv muab nws log rau hauvqab tsob ntoo qhib uas nyob sab qabteb ntawm lub nroog Npethees. Yogli ntawd, thiaj muab tsob ntoo qhib ntawd tis npe hu ua “Tsob Ntoo Qhib Quajntsuag.”
9Thaum Yakhauj rov hauv tebchaws Padas Alas#35:9: Padas Alas; lossis Mexuputamias. los, Vajtswv rov los tshwm rau nws pom dua ib zaug ntxiv, thiab foom koobhmoov rau nws. 10Vajtswv hais rau nws tias, “Koj lub npe hu ua Yakhauj, txij no mus yuav tsis hu koj ua Yakhauj ntxiv lawm, tiamsis yuav hu koj ua Yixalayees.” Yogli ntawd, Vajtswv thiaj tis nws lub npe hu ua Yixalayees. #Chiv 32:28
11Vajtswv hais rau nws tias, “Kuv yog Vajtswv tus uas muaj Hwjchim Loj Kawg Nkaus. Koj ciali muaj tubki kom huamvam coob. Koj cov cajces yuav dhau mus ua ntau haivneeg, thiab koj yuav yog ntau tus vajntxwv li yawgkoob. 12Kuv yuav muab lub tebchaws uas Kuv twb muab rau Anplahas thiab Ixaj lawm pub rau koj, thiab Kuv tseem yuav muab rau koj cajces uas nyob ntau tiam tomqab koj.” #Chiv 17:4-8 13Ces Vajtswv txawm ncaim nws mus lawm.
14Yakhauj txhos tau ib tug ncej zeb ua puavpheej nco txog qhov chaw uas Vajtswv tau los nrog nws tham rau ntawd; nws muab cawv txivhmab thiab roj txivntoo hliv rau saum tus ncej zeb ntawd fij rau Vajtswv. 15Nws thiaj tis npe rau thaj chaw ntawd hu ua Npethees. #Chiv 28:18-19
Laxees Tuag
16Yakhauj thiab nws tsev neeg txawm tawm hauv Npethees mus lawm, thiab thaum tseem tshuav deb mamli mus txog rau hauv Efalas, Laxees txawm mob plab yuav yug menyuam, tiamsis zaum no nws yug menyuam nyuaj heev. 17Thaum Laxees mob plab heev lawm, tus pojniam uas pab txais menyuam thiaj hais rau Laxees tias, “Laxees, koj tsis txhob ntshai, koj yuav tau ib tug tub ntxiv.” 18Tiamsis Laxees twb yuav tuag; thaum nws huas pa yuav tusiav ntawd nws thiaj tis tus metub ntawd npe hu ua Npee-aunis,#35:18: Npee-aunis: Lub npe no lus Henplais txhais hais tias “tus tub ntawm kuv txoj kev quajntsuag.” tiamsis nws txiv muab nws tis npe hu ua Npeeyamees.#35:18: Npeeyamees: Lub npe no lus Henplais txhais hais tias “tus tub uas coj koobhmoov los.”
19Thaum Laxees tuag, lawv thiaj muab nws mus log rau ntawm ib sab ntug kev uas mus rau hauv lub zos Efalas uas nimno hu ua lub nroog Npelehees. 20Yakhauj txhos ib tug ncej zeb rau saum Laxees lub ntxa ua cim nco txog Laxees; tus ncej zeb ntawd tseem ua cim los txog niajhnub no. 21Yakhauj sawvkev mus ntxiv thiab los tsa tsevntaub nyob ntawm lub tsev tsomfaj Edaws sab tod.
Yakhauj Cov Tub
(1 Xwmtxheej Vajntxwv 2:1-2)
22Thaum Yakhauj tawm hauv lub tebchaws ntawd mus lawm, Lunpees txawm mus nrog Npilehas uas yog nws txiv ib tug niamyau pw. Thaum Yakhauj hnov txog zaj no mas nws npautaws heev.#35:22: Ib phau ntawv qub-qub thaum ub sau hais tias mas nws npautaws heev; phau lus Henplais tsis muaj cov lus no.
Yakhauj muaj kaum-ob leeg tub. 23Le-as cov tub yog Lunpees (Yakhauj tus tub hlob), Xime-oos, Levis, Yudas, Ixakhas, thiab Xenpuloos. 24Laxees cov tub yog Yauxej thiab Npeeyamees. 25Laxees tus ntxhais qhev Npilehas ob tug tub yog Das thiab Nathalis. 26Le-as tus ntxhais qhev Xilepas cov tub yog Nkaj thiab Asaws. Cov tub no puavleej yug pem tebchaws Padas Alas.#35:26: Padas Alas: lossis Mexuputamias.
Ixaj Tuag
27Yakhauj mus saib nws txiv Ixaj hauv lub nroog Males, uas nyob ze lub nroog Kili-as Anpas (uas yog Henploos), qhov chaw ntawd yog qhov chaw uas Anplahas thiab Ixaj nkawd tau nyob los lawm. 28Ixaj ua neej nyob tau 180 xyoo. 29Nws ua neej nyob laus nkoos nws mamli tuag. Nws ob tug tub Exaus thiab Yakhauj thiaj coj nws lub cev mus log lawm.
Právě zvoleno:
Chivkeeb 35: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.