Ekihsatahs 14
14
Isriyalak Kii'aashawishkaawaatc Miskokihcikamiink
1Miitahsh o'o Moosihs (Moses) kaa'ikotc kaaTipencikenitc, 2“Wiintamaw Isriyalak (Israel) cikiiweshkaawaatc i'imaa enaahsamiayaanik ootena Paahahaairaht (Pihahiroth). Nahsawaya'ii i'imaa Miktal (Migdol) i'imaa tahsh Misko kihcikamiink cishi kapehshiwaatc ciikaya'ii Peyal Siihpan (Baal Zephon) ecikaatenik. 3Kihciokimaa Peroo (Pharaoh) ohsha tainentam, Isriyalak (Israel) iinsan emihci wawaanentamowaatc noociko piko, ehkipishkaakowaatc i'i pikwatahkamik. 4Niwiih tootawaa hsa kihciokimaa Peroo aanciihke cishashiipihtank. Miitahsh keshi piminisha'waatc Isriyala'. A'a hsa kihciokimaa Peroo i'i kaye oshimaakanihshiima' niwii aapaci'imaa' cinaakohtooyaan niin ehkihci inentaakosiyaan. Iicip (Egyptians) kaatinowiwaatc tahsh ninka kihkenimikook niin ehTipencikewak,” okii'ikoon. Miitahsh Isriyalak kaaishihcikewaatc.
5Ahpii tahsh kihciokimaa i'imaa Iicipahkiink ewiintamawintc Isriyala' ekiih tapasiinitc, miitahsh kihciokimaa, i'i kaye otaanihkewikimaama' kaaishi aatenimaawaatc i'i Isriyala' ekii ihkitowaatc, “Aaniin inaa kaaishihcikeyank ekiih pakitinankwaa Isriyalak cipamiihtawihsinowinankwaa,” kii‑ihkitowak. 6Miitahsh kihciokimaa Peroo okii oshiihtaa'aa' omiikaasowi otaapaanaahkwa', i'i kaye oshimaakanihshiima'. 7Ninkotwaahswaahk (600) miikaasowi otaapaanaahkwa' wenishihshinitc okii maaciinaa', i'i kaye kotak kahkina miikaasowi otaapaanaahkwa' kaakii ayaanitc i'imaa Iicipahkiink. Okiih tako maaciinaa' kaye aanihkewikimaa' kenaakacihcikenitc. 8Miitahsh kaaTipenciketc kaakiih tootawaatc kihciokimaan cishashiipihtaminitc, cipiminisha'waanitc kaye Isriyala' kaakii soonkite'enitc enakataminitc otahkiim. 9Iicip kaatinowiwaatc itahsh okiih piminisha'waawaa' Isriyala'. Kahkina okii aapaci'aawaa' mihtatimoo', miikaasowi otaapaanaahkwa', shimaakanihsha' kaapimiwanepa'ikonitc, wetaapa'iwenitc kaye. Kahkina hsa ko Peroo oshimaakanihshiima' kiihpiminisha'owewa'. Weti tahsh okii ishi atimaawaa' kaakii ishi kapehshinitc Misko kihcikamiink ciikaya'ii Paahahaairaht i'imaa kaye Peyal Siihpan ecikaatenik.
10Ahpii tahsh Isriyalak ewaapamaawaatc Peroon, Iicipiiwi shimaakanihsha' kaye ehpi pehshonaakosinitc, wiinke hsa kiihsekisiwak. Miihsh kaakiih shaakowaanaawaatc kaaTipencikenitc cinaatamaakowaatc. 11Miitahsh Isriyalak kaa'inaawaatc Moosihsoon (Moses), “Ayaawan iitok cipekamikoon weti Iicipahkiink kekii‑ishi na'inikoyaankipan. Kikiih piishinaam ina o'omaa pikwatahkamik citashi nipoyaank? Wekonen tahsh o'o kaaonci tootawiyaank ekiih saakiciwihshiyaank weti Iicipahkiink? 12Kitaanakii wiintamaakoo iitok cipwaa nakatamaank i'i Iicipahki ekii'ikooyan ‘Taka pooni'ihshinaam pisaan cipamiihtawankitwaa Iicip kaatinowiwaatc.’ Nawac iitok taakii minohsepan cikiih pamiihtawankitwaapan Iicip kaatinowiwaatc ahpiihc wiin o'omaa pikwatahkamik citashi nipoyaankipan,” okii'inaawaan.
13Miitahsh o'o Moosihs kaaishi nahkwehtank, “Keko sekisihkek, mashkawikaapawik. Inashke kika waapantamowaam kaaTipenciketc kaawii ishi pimaaci'inek noonkom kaakiishikaninik. Ikiweniwak hsa Iicip kaatinowiwaatc kaawaapamekwaa noonkom kaakiishikaninik, kaawiin miinawaa wiihkaa kika waapamaahsiwaawaak. 14KaaTipenciketc ohsha kika miikaasoohtamaakowaa, kiinawaa tahsh wiin miiehtako keishihcikeyek cikoshkwaawaaci ayaayek,” okii inaa'.
15Miitahsh Moosihs kaa'ikotc kaaTipencikenitc, “Wekonen tahsh wenci shaakowaashiyan cinaatamawinaan? Kaanoosh Isriyalak niikaanaya'ii inahke cishi maaciishkaawaatc. 16Kiin itahsh wiin, ompaahkonan i'i kisahka'onaahk, weti kihcikamiink inahke ishi niimaahkonan, miitahsh i'i kihcikam citawipiihsek cipaankwahkamikaak. Miitahsh i'imaa Isriyalak keshi pimohsewaatc ciaashawikaameshkaawaatc. 17Miitahsh ketootawakwaa Iicip kaatinowiwaatc cishashiipihtamowaatc maanoko cipiminisha'waawaatc Isriyala'. Miitahsh i'imaa keontinamaan keonci kihtenimikooyaan kiihshaakooci'ak a'a kihciokimaa Peroo, i'i kaye oshimaakanihshiima', omiikaasowi otaapaanaahkwa' kaye, i'i kaye kaaotaapa'iwenitc. 18Kii‑ishkwaa shaakooci'akwaa tahsh, mii hsa 'i cikihkenimiwaatc Iicip kaatinowiwaatc niin kaaTipenciketc ehtinowiwak,” okii'ikoon.
19A'a tahsh Kishemanitoo otencaliman kaakii niikaaniihtamawaanitc i'i kaakiih paahtiinonitc Isriyala', kiiaancishkaawan otaanaank inahke ekii ishaanitc. I'i hsa kaye wahkwiini kaakiih patahkaanahkwaninik kiiaancishkaani otaanaank ekii ishaamakaninik. 20Mayaa piko nahsawaya'ii kaakii ishi'ayaanitc Iicip kaatinowinitc, i'i kaye Isriyala' ekii ishi kipishkaanik. I'i tahsh wahkwiini kiihkashkiitipishkikemakanini kaakii ishi'ayaanitc Iicip kaatinowinitc, kiiwaahseshkikemakanini tahsh wiin kaakii ishi'ayaanitc Isriyala'. Kaawiin tahsh kiinaasihkotaatihsiiwa' kapetipihk.
21Miitahsh Moosihs kihcikamiink inahke kaakii ishi niiminihkenitc. KaaTipencikenitc hsa tahsh okii ishihtooni ciwaapaninoowenik ekiih tawipiikinaminitc kihcikam. Kapetipihk tahsh kiikihci nootin ekii ishihtoonitc kihcikam cipaankwahkamikaanik. I'i tahsh nipi kiihtaashkitawipiiyaani. 22#1Co 10.1,2; Heb 11.29. Miihsh Isriyalak kaaishi pimohsewaatc eshi paankwahkamikaanik eaashawishkaawaatc kihcikam, iitaweya'ii ekii ayaasamipiiyaanik eshi pimohsewaatc. 23Miitahsh Iicip kaatinowiwaatc kaaishi maacinisha'ikewaatc piinihsh weti kihcikamiink. Kahkina piko kihciokimaa Peroo omihtatimooma', omiikaasowi otaapaanaahkwa', i'i kaye kaakii otaapa'iwenitc eaapatisinitc. 24Cipwaa piitaapaninik tahsh kaaTipenciketc okii onsaapamaa' Iicip kaatinowinitc i'imaa kaaishkotewaninik wahkwi kaakiih patahkaanahkwaninik. Miitahsh kaakiih tootawaatc ciwawaanentaminitc. 25Miitahsh kaahtootawaatc miikaasowi otaapaanaahkwan kaatihtipihsenitc cikihciwihsenitc, miihsh kaaishi pwaawi maaciishkaanitc. Iicip kaatinowiwaatc hsa tahsh kii‑ihkitowak, “Taka maaciipa'iwaanaataanik Isriyalak, kaaTipencikenitc ohsha omiikaasoohtamaakowaan emiikaaninankwaa,” kii‑ihkitowak.
26Miihsh Moosihs kaa'ikotc kaaTipencikenitc, “Weti kihcikamiink inahke ishi niiminihkenin, miihsh i'i nipi cimaamawiciwank. Miihsh cinihkipiihsewaatc Iicip kaatinowiwaatc, i'i kaye omiikaasowi otaapaanaahkowa', i'i kaye kaaotaapa'iwenitc.” 27Mii hsa 'i Moosihs kihcikamiink inahke kaaishi niiminihkenitc. Eani piitaapaninik tahsh i'i nipiini kiihkiiwe maamawihseni ekii ahpiihcipiinik kaakii nihtaa ahpiihcipiinikipan. Iicip kaatinowiwaatc tahsh okii mekweshkaanaawaa i'i nipiini. Miitahsh kaaTipenciketc kaakii ishi wepinaatc Iicip kaatinowinitc i'imaa kihcikamiink. 28Nipi tahsh ehkiiweyaakamihsek, kahkina Peroo oshimaakanihshiima' kiinihkipiihsewa' miikaasowi otaapaanaahkwak, kaakii otaapa'iwewaatc kaye, kahkina hsa ko Iicip kaatinowiwaatc kaakiih piminisha'waawaatc Isriyala' i'imaa kihcikamiink kiinihsaapaawewak. Kaawiin hsa awaaciko peshik kii‑ishko nihsaapaawehsii. 29Iki tahsh wiin Isriyalak kii‑ishi pimohsewak eshi paankwahkamikaanik eaashawishkaawaatc i'i kihcikam, ayiitaw ekii ayaahsamipiiyaanik eshi pimohsewaatc.
30Mii hsa tahsh i'i ahpii kaaTipenciketc kaakiih pimaaci'aatc pemaatisinitc Isriyala' cipapaamenimikohsinik Iicip kaatinowinitc. Isriyalak hsa tahsh okii waapamaawaa' Iicip kaatinowinitc misiwe kaaishi wawaaninikamaanik ekii akwaayaa'okonitc. 31Ahpii tahsh Isriyalak ekii waapantamowaatc kihci mashkawisiiwin eaapacihtoonitc kaaTipencikenitc kiimiikaanaanitc Iicip kaatinowinitc, mii hsa pemaatisiwaatc kaaishi kohsaawaatc kaaTipencikenitc. Miihsh kaye kaaishi tepweyenimaawaatc kaaTipencikenitc, ini kaye otanohkii'aakanini Moosihsoon.
Právě zvoleno:
Ekihsatahs 14: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society