Ekihsatahs 13
13
KaaTipenciketc Kiimiinintc Citipinawewisitc Nihtam Nehtaawikinitc
1Miitahsh Moosihs kaa'ikotc kaaTipencikenitc, 2#Luk 2.23. “Pahkaanentaakosiihtamawihshik citipinawewisiimakwaa kahkina maawac iko nihtam keni nihtaawikiwaatc eniniiwiwaatc. Entahshiwaatc hsa nihtam ininiwak nehtaawikiwaatc, entahshiwaatc kaye kahkina ayaape aya'aawihshak, niin hsa ninka tipinawewis,” okii'ikoon.
Kii'amontc Pahkweshikan Ewiihkwantiiwahkamikisink
3Moosihs (Moses) itahsh okii inaa' pemaatisinitc, “Maamihkawik o'o noonkom kaakiishikahk, kaaTipenciketc kaakiih saakiciwininek i'imaa Iicipahkiink (Egypt) kaakii ishi kakwaataki mihtanohkii'ikooyekipan. KaaTipenciketc hsa omashkawisiiwin okii aapacihtoon o'omaa eonci saakiciwininek. Keko tahsh miicihkek kekoon tekohsik ompisikanehs. 4Noonkom hsa kaakiishikahk wa'a kiisihs Apip (Abib) kaapimakinsotc, mii hsa 'i aasha ewii maacaayek. 5Ahpii tahsh kaaTipenciketc ishiwininek ahkiink eshi'ayaanitc Kenan (Canaanites) kaatinowinitc, Heht (Hittites) kaatinowinitc, Emorii (Amorites) kaatinowinitc, Kipii (Hivites) kaatinowinitc, i'i kaye Ciipas (Jebusites) kaatinowinitc, kaakii ahpimotc kiikanoonaatc kikehteya'aamiwaapanii' ewii miininek. Mii 'i iitok i'i ahki kaawenootahk, kaashi wenci nihtaawikihk kaye kekoon. Miitahsh weti o'o keishihcikeyek citootamek wiihkwantiiwahkamikisiwin wa'a kiisihs pimakinsotc. 6Niishwaahsokiishik hsa kika amwaawaa pahkweshikan wempisikaniwihsik; niishwaahsokiishik itahsh ishihsek kika wiihkwantiiwahkamikisim cikihtenimek kaaTipenciketc. 7Niishwaahsokiishik itahsh kika amwaawaa pahkweshikan wempisikaniwihsik, kaawiin itahsh kekoon wempisikaniwank ta‑ayaahsinoon eshi'ayaayek, kaawiin kaye ompisikanehs ta‑ayaahsinoon ehkohsek kitahkiiwaa. 8I'i tahsh ahpii kiishikaninik o'onahke kika ishi wiintamawaawaak kikosihsiwaak, ‘Mii ohsha 'i kaaonci ishihcikeyaan emaamihkawiyaan aaniin kaaTipenciketc kaakii ishihcike'itc ahpii Iicipahkiink kiionci saakiciwihshitc.’ 9O'o tahsh ishihcikewin mii 'i keinwaatamek keonci maamihkawiyek taapishkoo kekoon ekwahpitek kininciiwaank, komaa kaye kiskahtikowaank keonci maamihkawiyek kaaTipenciketc Otinaahkonikewin ciwaawiintamekipan. Wiin iitok kaakii aapacihtootc omashkawisiiwin kiisaakisi'inek Iicipahkiink. 10Miitahsh eshinaakwahk cikanawentamek o'o anami'ehcikewin eyaantahso pipoon ahpii eshi onahcikaatek ci‑ishihcikenaaniwank.”
Enentaakositc Nihtam Kaanihtaawikitc
11“KaaTipenciketc hsa tahsh kika ishiwinikowaa ahkiink eshi'ayaanitc Kenan (Canaanites) kaatinowinitc, kaakii aayiici ahshotamawaakopanen kikehteya'aamiwaapanii'. Ahpii hsa tahsh miininek, 12#Exo 34.19,20; Luk 2.23. mii hsa 'i eshinaakwaninik cimiinek cipahkaanenimaatc citipinawewisitc kaaTipenciketc kahkina maawac iko nihtam nehtaawikinitc eniniiwinitc, i'i kaye ayaape aya'aawihsha' nihtam kenihtaawikinitc wiin citipinawewisitc. 13A'a tahsh wiin maanshimihtatim maawac iko nihtam kenihtaawikitc mii 'i eshinaakwahk maanahcaanihshenhsan ciaapatisinitc cikiiwe meshkotoonikaniwitc. Kiishpin itahsh wiin wiihtipa'waahsiwek, kika poohkokwenaawaa hsa maanshimihtatim. Kahkina hsa nihtam nehtaawikiwaatc kikosihsiwaak kika tipa'waawaak. 14Ahpii tahsh ani kakiishikahk kikosihs o'onahke ishi kakwecimihk, ‘Aaniin itahsh o'o enwaatek?’ O'ohsh kika inaa, ‘Omashkawisiiwin hsa kaaTipenciketc okii aapacihtoon kiisaakisi'inaank I'imaa Iicipahkiink (Egypt) kaakii ishi kakwaataki mihtanohkii'ikooyaankipan. 15Ahpii hsa Peroo kiinehpici shashiipihtank kii‑inentansik cipakitininankitc cimaacaayaank, miitahsh kaaTipenciketc kaakii nihsaatc kahkina nihtam kaakii nihtaawikinitc eniniiwinitc i'imaa Iicipahkiink, aya'aawihsha' kaye. Miitahsh o'o kaaonci pakitinaahsoohtamawankitc kaaTipenciketc kaa‑ayaapewinitc nihtam nehtaawikinitc aya'aawihsha', ewii meshkotoonikeyaank cikiiwe miinikooyaank entahshiwaatc nihtam nehtaawikiwaatc ninkosihsinaanik. 16Miihsh enwaatek o'o ishihcikewin taapishkoo kekoon kaa‑akwahpitek kininciiwaank komaa kaye kiskahtikowaank keonci maamihkawiyaank kaaTipenciketc. Wiin iitok kaakii aapacihtootc omashkawisiiwin kiisaakisi'inaank Iicipahkiink.’ ”
Aaniin Inahke KaaTipenciketc Kaa'ishipimiwinaatc Isriyala'
17Ahpii hsa Peroon (Pharaoh) kiipakitinaanitc Isriyala' cimaacaanitc, kaawiin Kishemanitoo okii ishiwinaahsii' inahke mihkanaank kaakiih shaapwamoninik Pilistiyawahkiink (Philistines), aanawiin i'i nahke ekii ishi pehshowaninik. Kishemanitoo aaniihsh kii‑ihkito, “Maakishaa miikaanintwaa ta‑aantentamook, Iicipahkiink (Egypt) itahsh tashi kiiwewak,” kii‑ihkito. 18Miitahsh Kishemanitoo tekwac okii ishi tetipaawinaa' pikwatahkamik inahke ciani ishaanitc Misko kihcikamiink. Isriyala' (Israel) itahsh kiionci maacaawa' Iicipahkiink, ekii ehpemiinitc ekiih kiishiinitc kaye cimiikaasonitc. 19#Gen 50.25; Jos 24.32. Miitahsh Moosihs (Moses) kaakii maaciitootc Coosapoon (Joseph) otoohkanini. Coosapoon iitok kii‑ishi'aanikopan Isriyala' ciaayiici ahshotaminitc o'o ci‑ishihcikenitc o'o ekii'inaakopanen, “Kishemanitoo hsa tepwe kika naanaakaci'ikowaa; kika maaciitoom itahsh nihkanan o'omaa onci maacaayek,” kii‑ihkitokopan.
Wahkwi Kaakiihpatahkitewaanahkwahk, Ishkote Kaakiihpatahkohkonek
20Isriyalak itahsh kiionci maacaawak i'imaa Sahkat (Succoth), weti tahsh Iihtam (Etham) ecikaatenik kii‑ishi kapehshiwak kaakii ishi maaci ayaanik pikwatahkamik. 21Ehkiishikaninik hsa tahsh kaaTipenciketc okii niikaaniihtamawaa' Isriyala' kaakii ishi patahkitewaanahkwaninik ekii ishi'ayaatc ekihkinowinaatc aaniinti keishaanitc. Ehtipihkaninik itahsh wiin eniikaaniihtamawaatc ishkotenk kaakiih patahkohkonenik kii‑ishi'ayaa pehkihsh ekii waahseshkamawaatc, pisaaniko cipimi ayaanitc ehtipihkaninik, ehkiishikaninik kaye. 22I'i tahsh kaakiih patahkitewaanahkwaninik mooshak iko okii niikaaniihtamaakonaawaa Isriyalak ehkiishikaninik. Ehtipihkaninik itahsh i'i ishkote kaakiih patahkohkonenik okii niikaaniihtamaakonaawaa.
Právě zvoleno:
Ekihsatahs 13: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society