Tootaraanamii 10
10
Moosihs Miinawaa Kiimiinintc Onahshowewinan
1“Miitahsh i'i ahpii kaaTipenciketc o'o kaakii'ishitc, ‘Onaapihkata'o hsa niishin (2) napakaapihkahsiniik taapishkoo tino kaakii ayaawatwaapan. Piahkwaamaciwen itahsh cipi anta waapamiyan, cioshihtooyan kaye mihtikomahkahk. 2Niin hsa ninka oshipii'ike i'imaa napakaapihkahsiniink, cioshipii'amaan ini ihkitowinan nihtam kaakii ayaakipanen i'imaa napakaapihkahsiniink kaakiih piikohshimatwaapan. Mahkahkonk itahsh kika ishi piina'waak.’ ”
3“Miitahsh kaaishi oshihtooyaan mahkahk akesha (acacia) tinowaahtik ekii aapaci'ak. Ninkii onaapihkata'waak itahsh kaye niishin napakaapihkahsiniik taapishkoo nihtam niishin kaakii ishinaakosiwaahpan. Miitahsh kaaishi ahkwaamaciweyaan niishin napakaapihkahsiniik ekiih pimiwinakwaa. 4KaaTipenciketc hsa tahsh okii oshipii'waa' i'i napakaapihkahsinii', ekii ishipii'iketc aaniin kaaishipii'ikaasonihpan i'i nihtam ahsinii'. Miiwan itahsh ini Mitaahso Onahshowewinan kaaTipenciketc kaakiih tashintamawinek weti waciink mekwe ishkotenk ekii onci kaakiikitotc, ahpii nihtam ehkiishikahk kaamaawaci'itiyankipan. Miihsh kaaTipenciketc kaakii miishitc i'i ahsinii'. 5Miitahsh kaaishi kiiwe niihsaamaciweyaan i'i waciw, mahkahkonk itahsh ninkii ishi piina'waak napakaapihkahsiniik ekii ishihcikeyaan kaaTipenciketc kaakii'ishitc. Miitahsh weti mahkahkonk noonkom o'o ishi'ahpii paahsowaatc,” kii‑ihkito Moosihs (Moses).
6 #
Num 20.28. Isriyalak itahsh i'imaa kiionci maacaawak eshi'ayaanikin otoonta'ipaanini Ceyahkan (Jaakanites) enimintc pemaatisinitc, weti ekii ishaawaatc Moserah (Moserah) ecikaatenik. Miitahsh weti Eran (Aaron) kaahtashi ishkwaa pimaatisitc, ekii na'inintc kaye. Okosihsan itahsh Eli'esar (Eleazar) eshinihkaasonitc okii naapishkaakoon cianami'ewikimaawinitc. 7I'imaa eonci maacaawaatc weti kii‑ishaawak Kakootah (Gudgodah) ecikaatenik. Kakootah tahsh eonci maacaawaatc weti kii‑ishi takohshinook Cahpahta (Jotbathah) ecikaatenik, ahkiink eshi'ayaanikin siipiinhsan. 8Miitahsh i'i ahpii kaaTipenciketc kaakii pahkekimaatc Liipaaink (Levi) wentahkaanesinitc cipimiwitoonitc ahshotamaakemahkahkoni ciniipawinitc enaahsamiitc cianami'ewanohkiihtaakotc kaye. Owiinsowin kaye ciaapacihtoonitc inaanitc pemaatisinitc ciminohsenitc, piinihsh o'o ahpii kaaishihcikenitc. 9Miitahsh i'i iki Liipaaink wentahkaanesiwaatc kaaonci ishi wiitoohkaasohsikwaa keshi tipinawewisinitc i'i otinawemaakaniwaa' aaniihsh wiinawaa kii‑ishi miinaawak cianami'ewanohkiihtawaawaatc kaaTipencikenitc kiKishemanitoomiwaan kaakii ishi ahshotamaakowaahpan.
10 #
Exo 34.28. Niimitana (40) tahso kiishik itahsh, niimitana tahso tipihk kaye ninkii ayaa i'imaa waciink taapishkoo nihtam kaakii ishihcikeyaampaan, kaaTipenciketc itahsh kaye i'i ahpii ninkii noontaak; kaawiin itahsh kii‑inentansii cinihshiwanaaci'inek. 11Miitahsh kaaTipenciketc kaakii'ishitc, “Maacaan itahsh, ani niikaaniihtamaw pemaatisiwaatc o'o kaapimi ayaayek, cipiintikeshkaawaatc, citipinawewisiwaatc i'i ahkiini kaakii ahshotamawimakipan okehteya'aamiwaapanii' ewii miinimakipan.”
Aaniin Kishemanitoo Eshi'antawentank
12“Isriyalak (Israel) aaniin itahsh noonkom kaaTipenciketc kiKishemanitoomiwaa eshi antaweniminek. Mii hsa 'i eshi antaweniminek, cikohtaanenimek kaaTipenciketc kiKishemanitoomiwaa, cishi pimohsewek kaye eshihtwaatc, cisaaki'ek kaye, cianohkiihtawek kaye enikohkote'eyek, misiwe kaye kitahcaahkowaank. 13Cikanawentamowek kaye kaaTipenciketc enaahkoniketc, otihkitowinan kaye noonkom kaakiishikahk kaawiintamawinakook keonci minohseyek. 14KaaTipenciketc kiKishemanitoomiwaa ohsha otipentaan kiishik, maawac kaye kiishik eshpaanik, ahkiini kaye, kahkina kaye kekoon i'imaa eyaanik. 15Miihsh kaaTipenciketc kaakii onenimaatc kikehteya'aamiwaapanii' kaa‑ahpiihci saaki'aatc. Kiinawaa tahsh opiiwesiimiwaa' ehtinowiwek, kikii onenimikowaa ahpiihc wiin i'i kotak kahkina pemaatisinitc, miihsh noonkom kaakiishikahk keyaapi eshihsek. 16Noonkom itahsh na'ihtawihk kaaTipenciketc kite'iwaank, mii 'i ishi pooni shashiipihtamok. 17#1Ti 6.15; Rev 17.14; 19.16; Act 10.34; Rom 2.11; Gal 2.6; Eph 6.9. KaaTipenciketc kiKishemanitoomiwaa ohsha oKishemanitoohkantawaa' manitoo', otipenimaa' kaye tepencikenitc, wiin hsa kaakihci inentaakositc Kishemanitoo. Wiin kaye maawac mashkawentaakosi, kohtaanentaakosi kaye, kahkina hsa peshikwan otinenimaa' awiya', kaawiin kaye otootaahpinansiin citipa'amawintipan kekoon ci‑ishihciketc. 18Weweni kaye onaakaci'aa' kiiwahshishaana', kaakiiwaacihsenitc kaye ihkwewa'. Kaamayakisinitc itahsh kaye onaakohtoon esaaki'aatc emiinaatc kemiicinitc, kekikishkaminitc kaye. 19Miitahsh kekiinawaa keishihcikeyekipan cisaaki'ekwaapan meyakisiwaatc, aaniihsh kekiinawaa kikii mayakisim Iicipahkiink (Egypt). 20Kika kohtaanenimaawaa hsa kaaTipenciketc kiKishemanitoomiwaa; wiinehta kika anohkiihtawaawaa, kika minciminaawaa, owiinsowin hsa tahsh kika aapacihtaawaam ahpimoyek. 21Wiin hsa miikwehc ke'inintipan Tinowi, wiin hsa kiKishemanitoomiwaa, kaakiih kihci ishihcikehtamawinek, kaakiih kohtaanihcikehtamawinek kaye, kiinawaa tahsh iko kikii waapantamowaam. 22#Gen 46.27; Gen 15.5; 22.17. Kikehteya'aamiwaak hsa kii‑ishaawaakopan Iicipahkiink niishwaahsimitana (70) ehta kiihtahshiwak, inashke tahsh noonkom kaaTipenciketc kiKishemanitoomiwaa kikii ishi'ikowaa citahshiyek taapishkoo wanankohsha' kaatahshinitc.”
Právě zvoleno:
Tootaraanamii 10: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society