ܡܬܠ̈ܐ 9
9
ܟ̰ܝܵܕܬܵܐ ܕܚܸܟ݂ܡܬܵܐ ܘܟ̰ܝܵܕܬܵܐ ܕܣܲܟ݂ܠܘܼܬܵܐ
1ܚܸܟ݂ܡܬܵܐ ܒܢܹܐ ܠܵܗ̇ ܒܲܝܬܘܼܗ̇،
ܢܓܝܼܪܵܗ̇ ܫܲܒ݂ܥܵܐ ܣܛܘܼܢܘܼ̈ܗ̇.
2ܦܪܝܼܡ ܠܵܗ̇ ܒܸܣܪܘܼܗ̇، ܡܙܝܼܓ݂ ܠܵܗ̇ ܚܲܡܪܘܼܗ̇،
ܐܘܼܦ ܚܪܝܼܙ ܠܵܗ̇ ܨܘܼܦܪܘܼܗ̇.
3ܫܘܼܕܸܪܵܗ̇ ܥܠܲܝܡܵܬܘܼ̈ܗ̇ ܕܩܵܪܝܼ
ܥܲܠ ܟܸܢܦܹ̈ܐ ܕܪ̈ܘܼܡܝܵܬܹܐ ܕܡܕܝܼܢ݇ܬܵܐ،
4”ܡ̇ܢ ܕܝܼܠܹܗ ܦܫܝܼܛܵܐ، ܦܵܬܹܠ ܠܐܲܟ݂ܵܐ.“
ܠܚܣܝܼܪܹ̈ܐ ܕܗܵܘܢܵܐ، ܟܹܐ ܐܵܡܪܵܐ ܐܸܠܲܝܗܝ،
5”ܬܹܝܡܘܼܢ، ܐ݇ܟ݂ܘܿܠܘܼܢ ܡ̣ܢ ܠܲܚܡܝܼ،
ܘܫܬܹܝܡܘܼܢ ܡ̣ܢ ܚܲܡܪܵܐ ܕܡܙܝܼܓ݂ ܠܝܼ.
6ܫܒ݂ܘܿܩܘܼܢ ܦܫܝܼܛܘܼܬܵܐ ܘܚܹܝܡܘܼܢ،
ܘܚܕܘܿܪܘܼܢ ܒܐܘܼܪܚܵܐ ܕܦܲܪܡܵܝܬܵܐ.“
7ܗ̇ܘ ܕܬܲܠܥܸܡ ܠܡܲܣܚܸܪܵܢܵܐ، ܒܸܬ ܫܵܩܹܠ ܠܓܵܢܹܗ ܒܘܼܨܵܪܵܐ،
ܘܡܲܢܟܸܣܵܢܵܐ ܕܪܲܫܝܼܥܵܐ، ܒܸܬ ܩܲܒܸܠ ܡܘܼܡܵܐ ܠܓܵܢܹܗ.
8ܠܵܐ ܡܲܢܟܸܣܸܬ ܠܡܲܣܚܸܪܵܢܵܐ، ܕܠܵܐ ܣܵܢܹܐ ܐܸܠܘܼܟ݂،
ܡܲܢܟܸܣ ܠܚܲܟܝܼܡܵܐ، ܘܒܸܬ ܡܲܚܸܒ ܐܸܠܘܼܟ݂.
9ܗܲܒ݂݇ܠ ܝ݇ܕܲܥܬܵܐ ܠܚܲܟܝܼܡܵܐ، ܘܒܸܬ ܗܵܘܹܐ ܒܘܼܫ ܚܲܟܝܼܡܵܐ،
ܡܲܠܸܦ ܠܙܲܕܝܼܩܵܐ، ܘܒܸܬ ܡܲܙܝܸܕ ܝܘܼܠܦܵܢܵܐ.
10ܫܘܼܪܵܝܵܐ ܕܚܸܟ݂ܡܬܵܐ ܙܕܘܼܥܬܵܐ ܕܡܵܪܝܵܐ ܝܠܵܗ̇،
ܘܝ݇ܕܲܥܬܵܐ ܕܩܲܕܝܼܫܵܐ ܦܲܪܡܵܝܬܵܐ.
11ܣܵܒܵܒ ܒܝܼܝܼ ܒܸܬ ܗܵܘܝܼ ܦܸܪܝܹܐ ܝܵܘܡܵܢܘܼ̈ܟ݂،
ܘܒܸܬ ܙܵܝܕܝܼ ܐܸܠܘܼܟ݂ ܫܸܢܹ̈ܐ ܕܚܲܝܹ̈ܐ.
12ܐܸܢ ܗܵܘܹܝܬ ܚܲܟܝܼܡܵܐ، ܗܘܹܐ ܠܘܼܟ݂ ܚܲܟܝܼܡܵܐ ܩܵܐ ܓܵܢܘܼܟ݂،
ܘܐܸܢ ܗܵܘܹܝܬ ܡܲܣܚܸܪܵܢܵܐ، ܒܢܲܦ̮ܫܘܼܟ݂ ܒܸܬ ܛܵܥܢܹܬ ܠܵܗ̇.
13ܒܲܟ݂ܬܵܐ ܣܲܟ݂ܠܹܐ ܩܵܠܵܢܬܵܐ ܝܠܵܗ̇،
ܦܫܝܼܛܬܵܐ ܝܠܵܗ̇، ܘܠܹܐ ܝܵܕܥܵܐ ܡܸܢܕܝܼ.
14ܘܟܹܐ ܝܵܬܒ݂ܵܐ ܒܬܲܪܥܵܐ ܕܒܲܝܬܘܼܗ̇،
ܥܲܠ ܟܘܼܪܣܝܵܐ، ܒܕܘܼܟܵܢܹ̈ܐ ܪ̈ܵܡܹܐ ܕܡܕܝܼܢ݇ܬܵܐ،
15ܠܸܩܪܵܝܵܐ ܠܥܵܒ݂ܪ̈ܵܢܹܐ ܕܐܘܼܪܚܵܐ،
ܠܐܵܙܵܠ݇ܢܹ̈ܐ ܬܪܘܼܨܵܐ ܥܲܠ ܐܘܼܪ̈ܚܵܬܲܝܗܝ،
16”ܡ̇ܢ ܕܝܼܠܹܗ ܦܫܝܼܛܵܐ، ܦܵܬܹܠ ܠܐܲܟ݂ܵܐ.“
ܘܠܚܣܝܼܪ ܗܵܘܢܵܐ، ܟܹܐ ܐܵܡܪܵܐ ܐܸܠܹܗ،
17”ܡ̈ܝܼܵܐ ܓܢܝܼܒܹ̈ܐ ܚܸܠܝܹ̈ܐ ܝܢܵܐ،
ܘܠܲܚܡܵܐ ܕܛܸܫܘܵܐ ܒܲܣܝܼܡܵܐ ܝܠܹܗ.“
18ܐܝܼܢܵܐ ܠܹܐ ܝܵܕܹܥ ܕܪ̈ܘܼܚܵܬܹܐ ܕܡܝܼܬܹ̈ܐ ܐܝܼܬ ܬܵܡܵܐ،
ܓܵܘ ܥܘܼܡܩܹ̈ܐ ܕܫܝܘܿܠ ܝܼܢܵܐ ܐܲܪ̈ܚܘܼܗ̇.
Právě zvoleno:
ܡܬܠ̈ܐ 9: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation