ܡܬܠ̈ܐ 10
10
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܡܲܬܠܹ̈ܐ ܕܫܠܹܝܡܘܿܢ: ܒܪܘܿܢܵܐ ܚܲܟܝܼܡܵܐ ܟܹܐ ܡܲܚܕܹܐ ܒܵܒܵܐ،
ܐܝܼܢܵܐ ܒܪܘܿܢܵܐ ܣܲܟ݂ܠܵܐ ܚܲܫܵܐ ܕܝܸܡܹܗ ܝܠܹܗ.
2ܠܹܐ ܥܵܒ݂ܕܝܼ ܝܘܼܬܪܵܢܵܐ ܣܝܼܡܵܬܹ̈ܐ ܕܪܲܫܝܼܥܘܼܬܵܐ،
ܐܝܼܢܵܐ ܙܲܕܝܼܩܘܼܬܵܐ ܟܹܐ ܦܲܨܝܵܐ ܡ̣ܢ ܡܵܘܬܵܐ.
3ܠܹܐ ܡܲܟܦܸܢ ܡܵܪܝܵܐ ܓܵܢܵܐ ܕܙܲܕܝܼܩܵܐ،
ܐܝܼܢܵܐ ܫܲܗܘܲܬܬܵܐ ܕܪ̈ܲܫܝܼܥܹܐ ܟܹܐ ܛܵܪܹܕ.
4ܣܘܼܢܩܵܢܵܐ ܟܹܐ ܗܲܨܠܵܐ ܐܝܼܕܵܐ ܪܦܝܼܬܵܐ،
ܐܝܼܢܵܐ ܐܝܼܕܵܐ ܕܚܲܦܛܵܢܵܐ ܟܹܐ ܗܲܨܠܵܐ ܥܲܬܝܼܪܘܼܬܵܐ.
5ܗ̇ܘ ܕܓ̰ܲܡܸܥ ܒܩܲܝܛܵܐ ܒܪܘܿܢܵܐ ܦܲܪܡܝܼܵܢܵܐ ܝܠܹܗ،
ܗ̇ܘ ܕܛܵܠܹܥ ܒܥܕܵܢܵܐ ܕܚܸܨܕܵܐ ܒܪܘܿܢܵܐ ܡܲܢܟܸܦܵܢܵܐ.
6ܒܘܼܪ̈ܟܵܬܹܐ ܟܠܝܼܠܵܐ ܝܢܵܐ ܠܪܹܫܵܐ ܕܙܲܕܝܼܩܵܐ،
ܐܝܼܢܵܐ ܦܘܼܡܵܐ ܕܪ̈ܲܫܝܼܥܹܐ ܡܸܠܝܵܐ ܝܠܹܗ ܛܠܘܼܡܝܵܐ.
7ܕܟ݂ܵܪܵܐ ܕܙܲܕܝܼܩܵܐ ܒܘܼܪܟܬܵܐ ܝܠܹܗ،
ܐܝܼܢܵܐ ܫܸܡܵܐ ܕܪ̈ܲܫܝܼܥܹܐ ܒܸܬ ܣܵܦܹܣ.
8ܚܲܟܝܼܡܵܐ ܕܠܸܒܵܐ ܟܹܐ ܩܲܒܸܠ ܦܘܼܩܕܵܢܹ̈ܐ،
ܐܝܼܢܵܐ ܣܲܟ݂ܠܵܐ ܒܣܸܦܘܵܬܹ̈ܐ ܒܸܬ ܦܵܐܹܫ ܪܘܼܦܝܵܐ.
9ܚܵܕܪܵܢܵܐ ܒܬܲܡܝܼܡܘܼܬܵܐ ܟܹܐ ܚܵܕܹܪ ܒܐܲܡܝܼܢܘܼܬܵܐ،
ܐܝܼܢܵܐ ܡܲܦܟ̰ܸܠܵܢܵܐ ܕܐܘܼܪ̈ܚܵܬܹܗ ܒܸܬ ܦܵܐܹܫ ܝ݇ܕܝܼܥܵܐ.
10ܠܵܟܙܵܢܵܐ ܒܥܲܝܢܵܐ ܟܹܐ ܝܲܗ݇ܒܸܠ ܐܘܼܠܨܵܢܵܐ،
ܘܣܲܟ݂ܠܵܐ ܒܣܸܦܘܵܬܹ̈ܐ ܒܸܬ ܦܵܐܹܫ ܪܘܼܦܝܵܐ.
11ܡܲܒܘܼܥܵܐ ܕܚܲܝܹ̈ܐ ܝܠܹܗ ܦܘܼܡܵܐ ܕܙܲܕܝܼܩܵܐ،
ܐܝܼܢܵܐ ܦܘܼܡܵܐ ܕܪ̈ܲܫܝܼܥܹܐ ܟܹܐ ܟܲܣܹܐ ܛܠܘܼܡܝܵܐ.
12ܣܢܵܝܬܵܐ ܟܹܐ ܡܲܒܪܝܼܵܐ ܡܲܩܲܪ̈ܵܨܘܼܝܵܬܹܐ،
ܐܝܼܢܵܐ ܚܘܼܒܵܐ ܟܹܐ ܟܲܣܹܐ ܠܟܠܲܝܗܝ ܓܢܵܗܹ̈ܐ.
13ܒܣܸܦܘܵܬܹ̈ܐ ܕܦܲܪܡܝܼܵܢܵܐ ܟܹܐ ܦܵܝܫܵܐ ܡܫ݇ܟ̰ܝܼܚܬܵܐ ܚܸܟ݂ܡܬܵܐ،
ܐܝܼܢܵܐ ܩܲܛܝܼܥܵܐ ܩܵܐ ܚܲܨܵܐ ܕܚܣܝܼܪ ܗܵܘܢܵܐ ܝܠܹܗ.
14ܚܲܟܝܼܡܹ̈ܐ ܟܹܐ ܓ̰ܲܡܥܝܼ ܝ݇ܕܲܥܬܵܐ،
ܐܝܼܢܵܐ ܦܘܼܡܵܐ ܕܣܲܟ݂ܠܵܐ ܟܹܐ ܩܲܪܒܸܢܹܗ ܚܪܵܒ݂ܵܐ.
15ܕܵܘܸܠܬܵܐ ܕܥܲܬܝܼܪܵܐ ܝܼܠܵܗ̇ ܡܕܝܼܢ݇ܬܵܐ ܕܥܘܼܫܢܹܗ،
ܚܪܵܒ݂ܵܐ ܕܡܸܣܟܹܢܹ̈ܐ ܝܼܠܹܗ ܣܢܝܼܩܘܼܬܲܝܗܝ.
16ܦܘܼܪܥܵܢܵܐ ܕܙܲܕܝܼܩܵܐ ܚܲܝܹ̈ܐ ܝܠܹܗ،
ܩܢܵܝܬܵܐ ܕܪܲܫܝܼܥܵܐ ܡܵܘܬܵܐ.
17ܥܲܠ ܐܘܼܪܚܵܐ ܕܚܲܝܹ̈ܐ ܝܠܹܗ ܢܵܛܪܵܢܵܐ ܕܡܲܪܕܘܼܬܵܐ،
ܐܝܼܢܵܐ ܫܵܒ݂ܩܵܢܵܐ ܕܡܲܢܟܲܣܬܵܐ ܟܹܐ ܚܵܠܹܛ.
18ܗ̇ܘ ܕܟܲܣܹܐ ܣܢܵܝܬܵܐ ܟܹܐ ܗܲܡܙܸܡ ܕܘܼܓܠܵܐ،
ܘܗ̇ܘ ܕܦܵܪܹܣ ܒܘܼܚܬܵܢ ܣܲܟ݂ܠܵܐ ܝܠܹܗ.
19ܒܦܸܪܝܘܼܬܵܐ ܕܗܹܡܸܙܡܵܢܹ̈ܐ ܠܹܐ ܒܵܨܪܵܐ ܓܢܵܗܵܐ،
ܐܝܼܢܵܐ ܕܵܒ݂ܩܵܢܵܐ ܕܦܘܼܡܹܗ ܦܲܪܡܝܼܵܢܵܐ ܝܠܹܗ.
20ܣܹܐܡܵܐ ܓܘܼܒܝܵܐ ܝܠܹܗ ܠܸܫܵܢܵܐ ܕܙܲܕܝܼܩܵܐ،
ܠܸܒܵܐ ܕܪ̈ܲܫܝܼܥܹܐ ܒܵܨܘܿܪܵܐ ܝܠܹܗ ܛܝܼܡܹܗ.
21ܣܸܦܘܵܬܹ̈ܐ ܕܙܲܕܝܼܩܵܐ ܟܹܐ ܬܲܪܣܝܼ ܠܪܵܒܵܐ،
ܐܝܼܢܵܐ ܣܲܟ݂ܠܹ̈ܐ ܟܹܐ ܡܵܝܬܝܼ ܒܘܼܬ ܚܣܝܼܪܘܼܬܵܐ ܕܗܵܘܢܵܐ.
22ܒܘܼܪܟܬܵܐ ܕܡܵܪܝܵܐ ܟܹܐ ܡܲܝܬܝܵܐ ܥܲܬܝܼܪܘܼܬܵܐ،
ܘܠܹܐ ܗܵܘܹܐ ܐܘܼܠܨܵܢܵܐ ܥܲܡܘܼܗ̇.
23ܐܲܝܟ݂ ܛܵܐܲܠܬܵܐ ܝܠܵܗ̇ ܠܣܲܟ݂ܠܵܐ ܠܸܥܒ݂ܵܕܵܐ ܒܝܼܫܬܵܐ،
ܐܝܼܢܵܐ ܡܲܦܠܲܚܬܵܐ ܕܚܸܟ݂ܡܬܵܐ ܒܘܼܣܵܡܵܐ ܝܠܵܗ̇ ܠܦܲܪܡܝܼܵܢܵܐ.
24ܡܸܢܕܝܼ ܕܙܵܕܹܥ ܡܸܢܹܗ ܪܲܫܝܼܥܵܐ ܒܸܬ ܐܵܬܹܐ ܥܲܠܘܼܗܝ،
ܐܝܼܢܵܐ ܒܸܬ ܦܵܝܫܵܐ ܝܘܼܗ݇ܒܸܠܬܵܐ ܒܵܥܘܼܬܵܐ ܕܙܲܕܝܼܩܹ̈ܐ.
25ܟܲܕ ܥܵܒܹܪ ܥܲܠܥܵܠܵܐ ܠܹܐ ܟܵܠܹܐ ܪܲܫܝܼܥܵܐ،
ܐܝܼܢܵܐ ܙܲܕܝܼܩܵܐ ܡܩܵܘܝܵܢܵܐ ܝܠܹܗ ܠܥܵܠܲܡ.
26ܐܲܝܟ݂ ܚܲܠܵܐ ܠܟܹܟܹ̈ܐ، ܘܐܲܝܟ݂ ܬܸܢܵܐ ܠܥܲܝܢܹ̈ܐ،
ܗܲܕܟ݂ܵܐ ܝܠܹܗ ܡܲܟܣܸܠܵܢܵܐ ܠܫܲܕܪ̈ܵܢܘܼܗܝ.
27ܙܕܘܼܥܬܵܐ ܕܡܵܪܝܵܐ ܟܹܐ ܡܲܙܝܸܕܵܐ ܚܲܝܹ̈ܐ،
ܐܝܼܢܵܐ ܫܸܢܹ̈ܐ ܕܪ̈ܲܫܝܼܥܹܐ ܒܸܬ ܦܵܝܫܝܼ ܡܘܼܟܪܝܼܹܐ.
28ܣܲܒ݂ܪܵܐ ܕܙܲܕܝܼܩܹ̈ܐ ܚܲܕܘܼܬܵܐ ܝܠܹܗ،
ܐܝܼܢܵܐ ܣܦܵܪܬܵܐ ܕܪ̈ܲܫܝܼܥܹܐ ܒܸܬ ܛܵܠܩܵܐ.
29ܩܲܠܥܵܐ ܝܠܵܗ̇ ܠܬܲܡܝܼܡܵܐ ܐܘܼܪܚܵܐ ܕܡܵܪܝܵܐ،
ܐܝܼܢܵܐ ܚܪܵܒ݂ܵܐ ܠܦܵܠܚܵܢܹ̈ܐ ܕܥܵܘܠܵܐ.
30ܙܲܕܝܼܩܵܐ ܠܥܵܠܲܡ ܠܹܐ ܫܵܥܹܫ،
ܐܝܼܢܵܐ ܪ̈ܲܫܝܼܥܹܐ ܠܹܐ ܫܵܪܝܼ ܒܐܲܪܥܵܐ.
31ܦܘܼܡܵܐ ܕܙܲܕܝܼܩܵܐ ܟܹܐ ܝܲܗ݇ܒܸܠ ܛܥܘܼܢܬܵܐ ܕܚܸܟ݂ܡܬܵܐ،
ܐܝܼܢܵܐ ܠܸܫܵܢܵܐ ܕܦܸܠܡܵܐ ܒܸܬ ܦܵܐܹܫ ܩܛܝܼܥܵܐ.
32ܣܸܦܘܵܬܹ̈ܐ ܕܙܲܕܝܼܩܵܐ ܟܹܐ ܝܵܕܥܝܼ ܡܲܗܢܵܝܬܵܐ،
ܐܝܼܢܵܐ ܦܘܼܡܵܐ ܕܪ̈ܲܫܝܼܥܹܐ ܦܸܠܡܵܐ.
Právě zvoleno:
ܡܬܠ̈ܐ 10: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation