ܡܬܠ̈ܐ 22
22
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܓܘܼܒܝܵܐ ܝܠܹܗ ܫܸܡܵܐ ܒܘܼܫ ܡ̣ܢ ܥܘܼܬܪܵܐ ܪܵܒܵܐ،
ܒܘܼܫ ܨܦܵܝܝܼ ܝܠܵܗ̇ ܫܵܦܵܩܲܬ ܡ̣ܢ ܣܹܐܡܵܐ ܘܡ̣ܢ ܕܲܗܒ݂ܵܐ.
2ܥܲܬܝܼܪܵܐ ܘܡܸܣܟܹܢܵܐ ܐܲܝܟ݂ ܚܕܵܕܹ̈ܐ ܝܢܵܐ،
ܒܗ̇ܝ ܕܓܵܒ݂ܠܵܢܵܐ ܕܟܠܲܝܗܝ ܡܵܪܝܵܐ ܝܠܹܗ.
3ܝܵܕܘܿܥܵܐ ܟܹܐ ܚܵܙܹܐ ܒܝܼܫܬܵܐ ܘܟܹܐ ܛܲܫܹܐ ܓܵܢܹܗ،
ܐܝܼܢܵܐ ܦܫܝܼ̈ܛܹܐ ܟܹܐ ܐܵܙܠ݇ܝܼ ܠܩܵܕ݇ܡܵܐ ܘܟܹܐ ܦܵܝܫܝܼ ܬܘܼܥܠܸܡܹܐ.
4ܦܘܼܪܥܵܢܵܐ ܕܡܲܟܝܼܟ݂ܘܼܬܵܐ ܘܙܕܘܼܥܬܵܐ ܕܡܵܪܝܵܐ،
ܥܘܼܬܪܵܐ ܘܐܝܼܩܵܪܵܐ ܘܚܲܝܹ̈ܐ ܝܢܵܐ.
5ܟܸܬܘܹ̈ܐ ܘܦܲܚܹ̈ܐ ܐܝܼܬ ܒܐܘܼܪܚܵܐ ܕܦܟ̰ܝܼܠܵܐ،
ܢܵܛܪܵܢܵܐ ܕܓܵܢܹܗ ܟܹܐ ܪܵܚܹܩ ܡܸܢܲܝܗܝ.
6ܡܕܲܒܸܪ ܠܝܵܠܵܕ݇ܐ ܡ̣ܢ ܫܘܼܪܵܝܵܐ ܕܐܘܼܪܚܹܗ،
ܐܘܼܦ ܟܲܕ ܣܵܐܹܒ݂ ܠܹܐ ܕܵܐܹܪ ܡܸܢܘܼܗ̇.
7ܥܲܬܝܼܪܵܐ ܥܲܠ ܡܸܣܟܹܢܵܐ ܟܹܐ ܗܲܟܸܡ،
ܘܫܵܩܠܵܢܵܐ ܕܕܲܝܢܵܐ ܥܲܒ݂ܕܵܐ ܝܠܹܗ ܠܝܵܗ݇ܒ݂ܵܢܵܐ ܕܕܲܝܢܵܐ.
8ܙܵܪܥܵܢܵܐ ܕܥܵܘܠܵܐ ܟܹܐ ܚܵܨܹܕ ܣܸܪܝܘܼܬܵܐ،
ܘܩܲܛܝܼܥܵܐ ܕܟܲܪܒܹܗ ܒܸܬ ܬܵܐܹܡ.
9ܐܝܼܕܹܗ ܦܬܘܼܚܬܵܐ ܟܹܐ ܦܵܐܹܫ ܡܒܘܼܪܟ݂ܵܐ،
ܣܵܒܵܒ ܝܘܼܗ݇ܒܸܠ ܠܹܗ ܡ̣ܢ ܠܲܚܡܹܗ ܠܡܸܣܟܹܢܵܐ.
10ܛܪܘܿܕ ܠܡܲܣܚܸܪܵܢܵܐ ܘܒܸܬ ܚܵܬܡܵܐ ܡܲܩܲܪܵܨܘܼܬܵܐ،
ܐܘܼܦ ܒܸܬ ܫܵܠܝܼ ܕܘܼܪܵܫܵܐ ܘܡܲܣܠܵܝܬܵܐ.
11ܗ̇ܘ ܕܡܲܚܸܒ ܕܸܟ݂ܝܘܼܬܵܐ ܕܠܸܒܵܐ،
ܘܐܝܼܬ ܫܵܦܵܩܲܬ ܒܣܸܦܘܵܬܹ̈ܗ،
ܡܲܠܟܵܐ ܟܹܐ ܗܵܘܹܐ ܚܲܒ݂ܪܹܗ.
12ܥܲܝܢܹ̈ܐ ܕܡܵܪܝܵܐ ܟܹܐ ܢܵܛܪܝܼ ܝ݇ܕܲܥܬܵܐ،
ܘܗ̇ܘ ܟܹܐ ܬܵܠܹܚ ܗܹܡܸܙܡܵܢܹ̈ܐ ܕܚܵܝܝܼܢ.
13ܟܹܐ ܐܵܡܹܪ ܡܲܟܣܸܠܵܢܵܐ، ”ܐܲܪܝܵܐ ܐܝܼܬ ܠܒܲܕܲܪ،
ܓܵܘ ܥܵܠܘܿܠܹ̈ܐ ܒܸܬ ܦܵܝܫܹܢ ܩܛܝܼܠܵܐ.“
14ܓܘܼܒܵܐ ܥܲܡܘܼܩܵܐ ܝܠܹܗ ܦܘܼܡܵܐ ܕܙܵܢܝܵܬܹ̈ܐ،
ܗ̇ܘ ܕܡܵܪܝܵܐ ܟܵܪܹܒ ܥܲܠܘܼܗܝ ܒܸܬ ܢܵܦܹܠ ܓܵܘܹܗ.
15ܣܲܟ݂ܠܘܼܬܵܐ ܟܬܝܼܪܬܵܐ ܝܠܵܗ̇ ܒܠܸܒܵܐ ܕܝܵܠܵܕ݇ܐ،
ܐܝܼܢܵܐ ܩܲܛܝܼܥܵܐ ܕܬܲܥܠܲܡܬܵܐ ܟܹܐ ܡܲܪܚܸܩ ܠܵܗ̇ ܡܸܢܹܗ.
16ܗ̇ܘ ܕܛܵܠܹܡ ܠܡܸܣܟܹܢܵܐ ܠܡܲܙܝܘܼܕܹܐ ܩܵܐ ܓܵܢܹܗ،
ܘܡ̇ܢ ܕܝܲܗ݇ܒܸܠ ܠܥܲܬܝܼܪܵܐ، ܒܸܬ ܡܵܛܹܐ ܠܚܘܼܣܪܵܢܵܐ.
ܬܠܵܬܝܼ ܡܹܐܡܪܹ̈ܐ ܕܚܸܟ݂ܡܬܵܐ
17ܨܲܠܝܼ ܢܵܬܘܼܟ݂ ܘܫܡܸܥ ܗܹܡܸܙܡܵܢܹ̈ܐ ܕܚܲܟܝܼܡܹ̈ܐ،
ܘܠܸܒܘܼܟ݂ ܡܲܬܒܸܬ ܠܝ݇ܕܲܥܬܝܼ.
18ܣܵܒܵܒ ܒܲܣܝܼܡܬܵܐ ܝܠܵܗ̇ ܟܲܕ ܢܵܛܪܹܬ ܠܗܘܿܢ ܓܵܘ ܠܸܒܘܼܟ݂،
ܘܦܵܝܫܝܼ ܡܘܼܩܘܝܼܹܐ ܡܸܚܕܵܕܹ̈ܐ ܥܲܠ ܣܸܦܘܵܬܘܼ̈ܟ݂،
19ܕܗܵܘܹܐ ܒܡܵܪܝܵܐ ܬܘܼܟ݂ܠܵܢܘܼܟ݂،
ܐܘܼܦ ܐܲܢ݇ܬ ܡܲܕܘܼܥܘܼܟ݂ ܝܘܸܢ ܐܸܕܝܘܿܡ.
20ܗܵܐ، ܠܵܐ ܟܬܝܼܒ݂ ܠܝܼ ܐܸܠܘܼܟ݂ ܬܠܵܬܝܼ ܡܹܐܡܪܹ̈ܐ
ܒܡܸܠܟܹ̈ܐ ܘܒܝ݇ܕܲܥܬܵܐ،
21ܠܡܲܕܘܼܥܘܼܟ݂ ܬܪܘܼܨܘܼܬܵܐ ܕܗܹܡܸܙܡܵܢܹ̈ܐ ܕܫܪܵܪܵܐ،
ܕܡܲܕܸܪܸܬ ܗܹܡܸܙܡܵܢܹ̈ܐ ܕܫܪܵܪܵܐ ܠܐܵܢܝܼ ܕܩܲܡ ܫܲܕܪܝܼ ܠܘܼܟ݂؟
22ܠܵܐ ܟ̰ܵܠܓ̰ܹܬ ܠܡܸܣܟܹܢܵܐ ܣܵܒܵܒ ܬܚܘܿܬ ܚܲܝܠܘܼܟ݂ ܝܼܠܹܗ،
ܘܠܵܐ ܕܲܫܕܸܫܸܬ ܠܡܘܼܠܝܸܨܵܐ ܒܕܲܪܘܵܙܵܐ،
23ܣܵܒܵܒ ܡܵܪܝܵܐ ܒܸܬ ܥܵܒܹܕ ܕܝܼܘܵܢܲܝܗܝ،
ܘܒܸܬ ܚܵܛܹܦ ܠܚܵܛܦܵܢܵܐ ܕܚܲܝܲܝ̈ܗܝ.
24ܠܵܐ ܥܵܒ݂ܕܹܬ ܚܲܒ݂ܪܘܼܬܵܐ ܥܲܡ ܓܲܒ݂ܪܵܐ ܟܵܪܘܿܒܵܐ،
ܘܥܲܡ ܐ݇ܢܵܫܵܐ ܚܸܡܬܵܢܵܐ ܠܵܐ ܚܵܕܪܹܬ،
25ܕܠܵܐ ܝܵܠܦܹܬ ܐܘܼܪ̈ܚܵܬܹܗ،
ܘܫܵܩܠܹܬ ܢܸܫܒ݂ܵܐ ܠܓܵܢܘܼܟ݂.
26ܠܵܐ ܗܵܘܹܝܬ ܓܵܘ ܐܵܢܝܼ ܕܫܵܥܫܝܼ ܐܝܼܕܵܐ،
ܓܵܘ ܐܵܢܝܼ ܕܗܵܘܝܼ ܥܲܪܵܒ݂ܵܐ ܩܵܐ ܕܲܝܢܹ̈ܐ.
27ܐܸܢ ܠܲܝܬ ܠܘܼܟ݂ ܠܸܦܪܵܥܵܐ،
ܩܵܡܘܿܕܝܼ ܫܵܩܹܠ ܫܘܝܼܬܘܼܟ݂ ܡ̣ܢ ܬܚܘܿܬܘܼܟ݂؟
28ܠܵܐ ܡܲܓ̰ܘܸܓ̰ܸܬ ܬܚܘܼܡܵܐ ܥܲܬܝܼܩܵܐ
ܕܥܒ݂ܝܼܕ ܠܗܘܿܢ ܐܲܒ݂ܵܗܵܬܘܼ̈ܟ݂.
29ܚܙܹܐ ܠܘܼܟ݂ ܐ݇ܢܵܫܵܐ ܡܗܝܼܪܵܐ ܒܦܘܼܠܚܵܢܹܗ؟
ܩܵܕ݇ܡ ܡܲܠܟܹ̈ܐ ܒܸܬ ܟܵܠܹܐ،
ܠܹܐ ܟܵܠܹܐ ܩܵܕ݇ܡ ܐ݇ܢܵܫܹ̈ܐ ܥܵܠܡܵܝܹ̈ܐ.
Právě zvoleno:
ܡܬܠ̈ܐ 22: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation