ܡܬܠ̈ܐ 21
21
ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ
1ܫܵܩܝܼܵܬܹ̈ܐ ܕܡ̈ܝܼܵܐ ܝܠܹܗ ܠܸܒܵܐ ܕܡܲܠܟܵܐ ܒܐܝܼܕܵܐ ܕܡܵܪܝܵܐ،
ܠܟܠ ܕܘܼܟܵܐ ܕܒܵܣܡܵܐ ܠܹܗ ܟܹܐ ܡܲܦܬܸܠ ܠܹܗ.
2ܟܠ ܐܘܼܪܚܵܐ ܕܐ݇ܢܵܫܵܐ ܬܪܘܼܨܬܵܐ ܝܠܵܗ̇ ܒܥܲܝܢܹ̈ܐ ܕܓܵܢܹܗ،
ܐܝܼܢܵܐ ܬܵܩܠܵܢܵܐ ܕܠܸܒܵܘܵܬܹ̈ܐ ܡܵܪܝܵܐ ܝܠܹܗ.
3ܠܸܥܒ݂ܵܕܵܐ ܙܲܕܝܼܩܘܼܬܵܐ ܘܗܵܩܘܼܬܵܐ
ܓܘܼܒܝܼܬܵܐ ܝܠܵܗ̇ ܠܡܵܪܝܵܐ ܒܘܼܫ ܡ̣ܢ ܕܸܒ݂ܚܵܐ.
4ܥܲܝܢܹ̈ܐ ܪ̈ܵܡܵܢܹܐ، ܘܠܸܒܵܐ ܚܵܬܪܵܢܵܐ،
ܫܪܵܓ݂݇ܝܵܐ ܕܪ̈ܲܫܝܼܥܹܐ ܚܛܝܼܬܵܐ ܝܠܵܗ̇.
5ܚܘܼܫܵܒܹ̈ܐ ܕܚܲܦܛܵܢܵܐ ܐܲܚܟ̰ܝܼ ܠܝܘܼܬܪܵܢܵܐ ܝܢܵܐ،
ܐܝܼܢܵܐ ܟܠ ܡܲܠܝܸܙܵܢܵܐ ܟܹܐ ܡܵܛܹܐ ܐܲܚܟ̰ܝܼ ܠܚܘܼܣܪܵܢܵܐ.
6ܓ̰ܵܡܲܥܬܵܐ ܕܣܝܼܡܵܬܹ̈ܐ ܒܠܸܫܵܢܵܐ ܕܕܘܼܓܠܵܐ،
ܗܵܘܓܵܐ ܬܵܝܡܵܢܵܐ ܝܠܵܗ̇ ܘܢܦܵܠܬܵܐ ܒܵܬ݇ܪ ܡܵܘܬܵܐ.
7ܛܠܘܼܡܝܵܐ ܕܪ̈ܲܫܝܼܥܹܐ ܒܸܬ ܓܵܪܹܦ ܠܗܘܿܢ،
ܣܵܒܵܒ ܡܘܼܚܦܸܠ ܠܗܘܿܢ ܠܸܥܒ݂ܵܕܵܐ ܗܵܩܘܼܬܵܐ.
8ܦܟ̰ܝܼܠܬܵܐ ܝܠܵܗ̇ ܐܘܼܪܚܵܐ ܕܐ݇ܢܵܫܵܐ ܚܲܝܵܒ݂ܵܐ،
ܐܝܼܢܵܐ ܬܪܘܼܨܵܐ ܝܠܹܗ ܦܘܼܠܚܵܢܵܐ ܕܐ݇ܢܵܫܵܐ ܕܸܟ݂ܝܵܐ.
9ܒܘܼܫ ܨܦܵܝܝܼ ܝܠܵܗ̇ ܠܝܼܬܵܒ݂ܵܐ ܒܩܘܼܪܢܝܼܬܵܐ ܕܐ݇ܓܵܪܹܐ،
ܡ̣ܢ ܠܸܚܵܝܵܐ ܓܵܘ ܒܲܝܬܵܐ ܥܲܡ ܒܲܟ݂ܬܵܐ ܡܲܩܪܸܨܵܢܬܵܐ.
10ܓܵܢܵܐ ܕܪܲܫܝܼܥܵܐ ܟܹܐ ܫܲܗܘܸܬܵܐ ܠܒܝܼܫܬܵܐ،
ܠܹܐ ܡܲܫ݇ܟ̰ܸܚ ܚܢܵܢܵܐ ܒܥܲܝܢܘܼ̈ܗܝ ܚܲܒ݂ܪܹܗ.
11ܒܬܲܥܠܲܡܬܵܐ ܕܡܲܣܚܸܪܵܢܵܐ، ܦܫܝܼܛܵܐ ܟܹܐ ܗܵܘܹܐ ܚܲܟܝܼܡܵܐ،
ܘܚܲܟܝܼܡܵܐ ܒܡܲܦܪܲܡܬܵܐ ܟܹܐ ܩܲܒܸܠ ܝ݇ܕܲܥܬܵܐ.
12ܟܹܐ ܡܲܣܸܡ ܒܵܠܵܐ ܙܲܕܝܼܩܵܐ ܠܒܲܝܬܵܐ ܕܪܲܫܝܼܥܵܐ،
ܟܹܐ ܡܲܢܦܸܠ ܠܗܘܿܢ ܪ̈ܲܫܝܼܥܹܐ ܠܣܸܪܝܘܼܬܵܐ.
13ܡ̇ܢ ܕܐܵܟ̰ܹܡ ܢܵܬܹܗ ܡ̣ܢ ܡܲܩܘܲܚܬܵܐ ܕܡܸܣܟܹܢܵܐ،
ܐܘܼܦ ܗ̇ܘ ܒܸܬ ܩܵܪܹܐ ܘܠܹܐ ܦܵܐܹܫ ܓ̰ܘܼܘܸܒܵܐ.
14ܡܵܘܗܲܒ݂ܬܵܐ ܒܛܸܫܘܵܐ ܟܹܐ ܡܲܫܠܝܼܵܐ ܟܲܪܒܵܐ،
ܘܪܸܫܘܲܬ ܒܚܵܢܵܐ، ܚܸܡܬܵܐ ܓܘܼܪܬܵܐ.
15ܚܲܕܘܼܬܵܐ ܝܠܵܗ̇ ܠܙܲܕܝܼܩܵܐ ܠܸܥܒ݂ܵܕܵܐ ܕܝܼܘܵܢ،
ܐܝܼܢܵܐ ܛܠܵܩܵܐ ܝܠܵܗ̇ ܠܦܵܠܚܵܢܹ̈ܐ ܕܥܵܘܠܵܐ.
16ܐ݇ܢܵܫܵܐ ܕܚܵܠܹܛ ܡ̣ܢ ܐܘܼܪܚܵܐ ܕܦܲܪܡܵܝܬܵܐ،
ܒܟܸܢܫܵܐ ܕܪ̈ܘܼܚܵܬܹܐ ܕܡܝܼܬܹ̈ܐ ܒܸܬ ܫܵܪܹܐ.
17ܐ݇ܢܵܫܵܐ ܕܡܲܚܸܒ ܒܘܼܣܵܡܵܐ ܟܹܐ ܡܵܛܹܐ ܠܚܘܼܣܪܵܢܵܐ،
ܡܲܚܸܒܵܢܵܐ ܕܚܲܡܪܵܐ ܘܡܸܫܚܵܐ ܠܹܐ ܗܵܘܹܐ ܥܲܬܝܼܪܵܐ.
18ܪܲܫܝܼܥܵܐ ܡ̣ܢ ܓܹܒܵܐ ܕܙܲܕܝܼܩܵܐ ܝܠܹܗ،
ܘܚܵܝܝܼܢ ܡ̣ܢ ܓܹܒܵܐ ܕܬܪ̈ܘܼܨܹܐ.
19ܒܘܼܫ ܨܦܵܝܝܼ ܝܠܵܗ̇ ܠܝܼܬܵܒ݂ܵܐ ܒܐܲܪܥܵܐ ܕܒܲܪܝܼܵܐ،
ܡ̣ܢ ܠܸܥܡܵܪܵܐ ܥܲܡ ܒܲܟ݂ܬܵܐ ܡܲܩܪܸܨܵܢܬܵܐ ܘܟܵܪܘܿܒܬܵܐ.
20ܐܝܼܬ ܣܝܼܡܬܵܐ ܫܘܼܗܘܸܬܬܵܐ ܘܡܸܫܚܵܐ ܒܕܘܼܝܵܪܵܐ ܕܚܲܟܝܼܡܵܐ،
ܐܝܼܢܵܐ ܣܲܟ݂ܠܵܐ ܟܹܐ ܒܵܠܹܥ ܡܸܢܕܝܼ ܕܐܝܼܬ ܠܹܗ.
21ܗ̇ܘ ܕܢܵܦܹܠ ܒܵܬ݇ܪ ܙܲܕܝܼܩܘܼܬܵܐ ܘܫܵܦܵܩܲܬ،
ܒܸܬ ܡܲܫ݇ܟ̰ܸܚ ܚܲܝܹ̈ܐ، ܙܲܕܝܼܩܘܼܬܵܐ، ܘܐܝܼܩܵܪܵܐ.
22ܠܡܕܝܼܢ݇ܬܵܐ ܕܓܲܢ݇ܒܵܪܹ̈ܐ ܟܹܐ ܐܵܣܹܩ ܚܲܟܝܼܡܵܐ،
ܘܟܹܐ ܬܵܠܹܚ ܥܘܼܫܢܵܐ ܕܬܘܼܟ݂ܠܵܢܲܝܗܝ.
23ܢܵܛܪܵܢܵܐ ܕܦܘܼܡܹܗ ܘܠܸܫܵܢܹܗ،
ܟܹܐ ܢܵܛܹܪ ܡ̣ܢ ܐܘܼܠܨܵܢܹ̈ܐ ܓܵܢܹܗ.
24ܚܵܬܪܵܢܵܐ ܘܫܲܒ݂ܗܸܪܵܢܵܐ، ܡܲܣܚܸܪܵܢܵܐ ܝܠܹܗ ܫܸܡܹܗ،
ܟܹܐ ܥܵܒܹܕ ܒܟܲܪܒܵܐ ܚܬܝܼܪܘܼܬܵܐ.
25ܫܲܗܘܲܬܬܵܐ ܕܡܲܟܣܸܠܵܢܵܐ ܒܸܬ ܡܲܡܝܸܬܵܐ ܠܹܗ،
ܣܵܒܵܒ ܟܹܐ ܡܲܚܦܸܠܝܼ ܐܝܼܕܵܬܹ̈ܗ ܠܸܦܠܵܚܵܐ.
26ܟܠܹܗ ܝܵܘܡܵܐ ܗܲܪ ܟܹܐ ܗܵܘܹܐ ܫܲܗܘܘܼܬܹܐ،
ܐܝܼܢܵܐ ܙܲܕܝܼܩܵܐ ܟܹܐ ܝܲܗ݇ܒܸܠ ܘܠܹܐ ܚܵܣܹܟ݂.
27ܕܸܒ݂ܚܵܐ ܕܪ̈ܲܫܝܼܥܹܐ ܛܲܡܐܘܼܬܵܐ ܝܠܹܗ،
ܟܡܵܐ ܒܘܼܫ ܙܵܘܕܵܐ ܟܲܕ ܒܦܸܠܡܵܐ ܦܵܐܹܫ ܡܘܼܐܬܝܵܐ.
28ܣܵܗܕܵܐ ܕܕܘܼܓܠܹ̈ܐ ܒܸܬ ܛܵܠܹܩ،
ܐܝܼܢܵܐ ܐ݇ܢܵܫܵܐ ܫܵܡܥܵܢܵܐ ܕܫܪܵܪܵܐ ܠܥܵܠܲܡ ܒܸܬ ܗܲܡܙܸܡ.
29ܟܹܐ ܡܲܩܘܹܐ ܐ݇ܢܵܫܵܐ ܪܲܫܝܼܥܵܐ ܦܵܬܹܗ،
ܐܝܼܢܵܐ ܬܪܘܼܨܵܐ ܟܹܐ ܡܲܩܘܹܐ ܐܘܼܪܚܹܗ.
30ܠܲܝܬ ܚܸܟ݂ܡܬܵܐ، ܘܠܲܝܬ ܦܲܪܡܵܝܬܵܐ،
ܘܠܲܝܬ ܡܸܠܟܵܐ ܕܲܠܩܘܼܒ݂ܠ ܕܡܵܪܝܵܐ.
31ܣܘܼܣܹܐ ܗܘܼܕܪܵܐ ܝܠܹܗ ܠܝܵܘܡܵܐ ܕܦܠܵܫܵܐ،
ܐܝܼܢܵܐ ܕܡܵܪܝܵܐ ܝܠܵܗ̇ ܙܵܟ݂ܘܼܬܵܐ.
Právě zvoleno:
ܡܬܠ̈ܐ 21: ABTAB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Aramaic Bible Translation Assyrian Bible © 2025 Aramaic Bible Translation