1 TIMOTHI 5
5
Akinrübonü Arhimobebo Hahmülang
1Azobuhrü mihtsürü düthürüh, tüshe buhrü nangde nünü api ki tuthsukang; akheamrü mihtsürübo ki niurübo nangde, 2azoberübo ki berübo nangde, akheamrü aliberübo ki niurübo nangde, alala atsangkhitkhi ching rhimoang.
3Atsütsü langzü larü khimoberü ki wüntre jihang. 4Khimoberü ju tsührübo yungsho tsührü tsührübo lasho, akhuhde yambuk thsungkheak akin rhimo arünü anikhitshang, tüsho arü bebuhrü kilim tümüanü jihloshang, tümüde ha Thrünpuh asühbe lah. 5Alibe shepü atsütsü khimoberü la, tüsho langzü lanü, anihbenü Thrünpuh kheak mulonglam zoshang tüsho azhing ayin mutukzhakde mushude tamkhüntamnüshang; 6tüshe khimoberü shepünü shih reangkeampü ching jihchonü anihbe arhang lalashe ashekhi lah. 7Ha thiyukhüm jihang, junangde arübo amülim mülade alabah. 8Khürünü nihbuh buhtsührü khung mükümsho, apinü akin thsunglochoh tüsho amükinrü kheaknü amütsübe ah.
9Khimoberü ju kam 60 azorü akumung, niubuhrü khülang ki thiyuro larü yungsho khimoberü bolung kheyukpü mukuk; 10tüsho anihbenü khungarü mütrümusukhi, hanrü mürühkhi, amüsührü jing müsühjihkhi, küpkhuk ching larü rungkhi tüsho atsü rhimobo alala ching shuhmülanga jihkhi tsüde amükheahkhi labeah. 11Tüshe anüphulung khimoberü a dükheyuk; küyimki arü shihkünde akambanü Khrista azhihde arhanglopü mulongde kamchoh, 12junangde arü akhuhbe thiyuchihchimkhi thsümünimde abahyukkhi kamchoh. 13Kheaküshe arünü yomuhyothsünpü, yamrümpü, jipjiprarapü tüsho arünü amüthabe thade arahrungpü anikhita luchoh. 14Jumonü inü alümkhia anüphulung khimoberü a rhangbah tsührü lade, arü yambuk tsangshubeah, tüsho isa riri kilim isa azhihpü kim müjihbeah. 15Tümüde khürüa amünean dunglim tsoabahdo. 16Akinrü liberü khürü betsührü khimoberübo lasho, anihbenü arü rungshang; borü kilim hahmülang düjih, junangde atsütsü khimoberübo rungkhukbah.
17Azothsürü sherünü tsüde yakzan shuhcho, adungto thsüde thsangyuthsangra tüsho thsangyupü ching khisahrü alü wüntrepü thülünkhi thsüshang; 18#Mt 10.10; Lk 10.7tümüde amüsühyunü thachoh, “Nünü moshipung hi nitchoki amün dürümdojih,” tüsho “Rhimorü a api mihkhah dün ngüpü thülünlah.” 19Mahne yungsho mahsamnü thiyumütsan thsüde hande arükhi yungsho azothsürü azhihde amülim jihkhi düleangkhi. 20Sherünü neak yihbeakchonü boto mikinü thürühang, junangde aninga larübonü atrekhi ching zhipbah. 21Thrünpuh tüsho Jisu Khrista le amokhitkhi yunirübo mikinü mulong müyütde, jakkheahkhi mürhimopü thsüde ha yuzüngbo anipü inü nü ki tuthsukchoh. 22Khah nimkihpü ching düniokheam, yungsho püpürü neak ching düberung; nü tsangkhitde zoang.
23Kheakü ke müthsün düyung, tüshe nü buk mütsükhi tüsho kheakü kheakü tukthsükhi hode kurungaso ke anüknük yungang.
24Mihtsürü khürü neakbo a nahde mütsanchoh, tüsho mahkhap müngühnü yüchoh; tüshe püpürü neakbo a ashulim lang ngüchoh. 25Junangde rhimo atsü nahde mütsanchoh; tüsho amütsübo she mümüyimkhuk.
Právě zvoleno:
1 TIMOTHI 5: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.