1 TIMOTHI 4
4
Arükchih Thsangyurübo
1Kheakü ashulim kimbo ching mebo mülapyukkhi tüsho amünean yukhümbo anide akin chingnü khürü chamkhide atsobah de Menü thachoh. 2Hadürü thsangyukhibo ju yinchi takmürümkhinü athsahkhi nangde arü lümkhibo shekhirü akeangyu tharü hode bushihchoh. 3Arünü mihtsürübo yamkhün thsüpü zhipdochoh tüsho akinrü le thiyuro mükheahrünü makshe jihde aleangkhishihpü Thrünpuhnü athrünjihkhi tsühyungbe khürü mütsühpü thiyukhüm jihchoh. 4Tümüde Thrünpuhnü athrünkhi lüpdükhi atsü lah, tüsho makshe jihde leangkhisho tümü she abahyukbe müla; 5tümütüsho ju Thrünpuh yu tüsho tamkhüntamnü hode tsangkhitdo.
Jisu Khrista Tankihrü Atsü
6Nünü harü thsangdankhibo keoniorübo ki thasho, nü ju thiyuro akin tüsho nünü anide alakhi thsangyukhi atsü ching bezokhi, Jisu Khrista tankihrü atsü thsübah. 7Amükinrü tüsho khakhih yukheanbo chingnü chamkhiang; akin lim nü küdah thsüde mürangang; 8pangnü mürangkhi ju alü khürü lah, tüshe akinnü mürangkhi ju limro alala ching lah, tümütüsho junü kheakü lakhi rhangdung tüsho arüpü lakhi rhangdung alokhikhibo ramlochoh. 9Athakhi atsütsü tüsho abümnü aleangkhibe athülün lah. 10Isanü mürangde rhimodo, tümütüsho isanü akinrü mihtsürü alala khümkhitrü, arhang Thrünpuh kheak isa mulonglam zo.
11Harübo thiyukhüm jihang tüsho thsangyuang. 12Nü athunuchoki shenü she mükhemükim düthsüshih, tüshe akinrübo ki thiyu thakhi, rhimokhi, amuzho, akin tüsho atsangkhitkhi ching amütsan laang. 13I marüyi khiungde, boto amüsühyu khekhi tüsho thsangyuthsangrapü le thsangyupü ching nü kim jihang tüsho mürangang. 14Azothsürübonü nü kheak arü khah nimde müchityu thachoki nü kilim jihkhi thsambah dübahyuk. 15Harü rhimobo shuhmülanga jihde külüpang, junangde nü jakihkhi alalanü angübah. 16Nü rhangdung tüsho nü thsangyukhi aheangang. Ju kheak ramloang, junangde ju rhimokhi hode nü tüsho nü ki anirü chido khümkhitbah.
Právě zvoleno:
1 TIMOTHI 4: YIMCBSI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.