SHURAI 43
43
Josef Jürai Maitao nou Benjamin ye Sa-a Ejipt hi Dakhai Hoyu
1Kanaan teidei hisü tokaayu shipu sholoure, 2ae Ejipt hinou pfüveyu thouhtao sü Jakob kikhamai nou toulou cheyu thaisü Jakob nou puh nahmaitao hisü dakhaiho thouh hüpulou khaio tea paore.
3Ana Judah nou puh puo hisü paoe, “Mai honanou veo zhih kua neletao thaihoutou save molouzü neletaoye panou Eye daolai moe tea paoe. 4Etao thaihoutou panou koa Etaoye talai toulouzü Etao taho thouh hüpfülai. 5Ana nenou puhye panou talai moe toulouzü Etao talai moe, daiolouzü neletao thaihou save more toulouzü neletaoye panou ahi loulaimoe tea mai honanou paore.”
6“Neletao daisounou Etao thaihoutou ali buhie tea mai hounapu hisü paopeia ale souveage?” tea Jakob nou paore.
7Puletao nou haibüa chila peie, “Mai honanou Etao thaihou-jürai mai ae Etao kikhamai ko sü haikou haikheloua neletao puo sü hria buhiho moe? neletao chinamai kukhe buha-e? tea nouloure. Etao nou puh chila peiyu baie, puhnou Etao hi neletao thaihoutouye puh hi saveo tea paore, kabüa Etao nou rai-a sülou khailai?”
8Judah nou puh puo hi paoe, “Nahpoutu nasü Etao koa seita peio, sükulouzü Etao kikhamai mailia khüa thaimore donou Etao taho thouh pfülaire. 9Avei hrirai nou poa chaachou soukhailai, nahtou nasü Enou zhuloulai. Enou puhye sü hria sa-a dakhaive ne nghoujü hi khaipei loumore toulouzü süna vei chaa teitei sü Enou pfülai. 10Etao nou haibüa büraroua bumoyu thaio taho thouh pfüloua dakhai ve ahai kholou süre.”
11Süthaisü puletao puo nou puletao hisü paoe, “Neletao nou talaihlai toulouzü haikua soulo: neletao lekhabvü hi dei haihinou pa-a buyu rashi veishoyu taoli thoulo, vahnayu pou, laivoudzü, kaivei myrrh pou, khushi thouh (pistachio), ae chishi (almond) haitao thouloua pokouh teidei khowo nasü peio. 12Pousha-a deida ahai thoulo, daiolouzü neletao lekha mü hi thoudakhai peiyu pousha taosü ngaomoa thoupeia bailai, südonou lukhai peio. 13Neletao thaihoutoua sa-a tawo anou dakhai ve zhilo. 14Khoukhoulai Ramai panou mai honaye sü neletaoye zhuvea peilou theo alia sükua hona panou neletao thaihou ae Benjamin-a lukhai peitheo. Anah maitao hare touyu thaio E-a hare.”
15Sükua china maitao nou sapeina taoli ae pousha deida ahai pfüloua Benjamin koa Ejipt hisü tare alia Josef nghoujü hi tave lahre. 16Josef nou Benjamin salaiyu ngaoloua puh ki hinou vah souyu kilai maina hisü paoe, “Mai haitao zhou hea Eye koa vailai. Südonou sou datha-a lee khokhaio.” 17Josef nou kharochi peiyu büa kilai nanou souloue alia china maitaoye sü Josef ki hi sa-a loure.
18Josef ki hi save thoupei khaie, puletao sü ngaopi loure alia raichoki Etao thouh lekha hi pousha thoupeiyu süna vanou Etaoye haihi saveyu phae tea choloure. Puletao nou lapasoua Etaoye daishi louveie alia Etao rheisühtao poloua Etaoye poa puhvei qila soulou bailai momo tea tsücho loure. 19Südonou puletao nou Josef kikhahi peipha peiyu kilai maina hisü kikhu bomü hinou takou loua paoe, 20“Aduwo, raichoki Etao vuhli touso hülai tea haihi ve-e. 21Etao nou ki dakhai talai tea tayu ludu hinou chao-a buyu hinou Etao lekha hapa zhukhaie, Etao vei pousha sü lahkuku vei lekha hinou bua ngaoloue. Sünasü Etao nou dakhai peilai tea haihi poalai. 22Lah Etao vei-a touso hülai donou pousha thoupupfüa tawe. Raichoki Etao vei pousha nasü thaonou Etao thouhkou hisü thoupeisa sümoe.”
23Kilai nanou paoe, “Leveaso alia ngaopiso; süsü neletao Ramai, neletao puo vei Ramai nou neletao lekha hisü thoupei laihlai. Neletao nou peiyu pousha nasü Enou ngaoloure.” Süthaisü puhnou Simeon ye sü puletao hi sapa peire.
24Kilai nanou puletaoye sü kikha saloure alia dzü peia panou puletao phi khüloure ae puletao rheisüh-a panou to touloure. 25Puletao nou Josef ye koa vaizholai touyu ko süloure, alia puletao nou Josef ye sapeina peire taosü souda-a puhye khoa bure. 26Josef nou ki hi veyu kisü, puletao nou poveyu sapeina khesü kikha polouloua Josef hi peie alia puh nghoujü nou deiphi peipfüa nakou khurüre. 27Alia puhnou puletaoye sü vei-a laiho moe tea cha-e alia “Neletao nou paoyu neletao puo sü vei-a buho moe? Puh chua hria buhima?” tea noue.
28Puletao nou chila peie, “Ne kilai Etao puo sü chua hria bue alia veia bue.” Alia puletao nou khoukheloua peipfüa deiphi nakouloua puhye khurüe.
29Josef nou puh thaihou Benjamin, puh pfünou napeiyu nayesü ngaolou khaie puhnou paoe, “Neletao nou paoyu neletao thaihou nahkhana sü hainawu? Ramai ye panou neye shiha peitheo.” 30Süthaisü Josef hai puh thaihou ngaoloua le daiwure, südonou thashoa buh süna thaowua puhnou puhvei zübu kihi talouloua sühinou krare. 31Süthaisü puhnou pah dzüphailoua dakhai pare, alia kranüyu nasü shamealoua “Khao khaithou khaio” tea lere. 32Josef khaosü vaibuh kukheli hi khaithou peie alia chinamaitao vei vaibuh kukheli hinou khaipeie. Puletao koa vaiyu hai Ejipt maitao khaosü buh kua khaithou peie, daiolouzü puletao nou Ebraimaiye koa vaibuh zhoyu hai nouwe tea chowe. 33Chinamaitao sü Josef ye pahzhoa atsükhana hinou nahkhana hi koute shoshonou bukouwe. China maitao nou puletao vei buh buyu sü ngaolou khaie khupashoa alinou liye zhua bue. 34Josef vei vaibuh hinou puletaoye khao khaipokou peiwe, alia Benjamin khaosü kukhe maitao khao jünou vuh angou khaipu peie. Sükua puletao nou pouphou ae rukha loumo koute Josef ye koa toue.
Právě zvoleno:
SHURAI 43: POUMBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.