SHURAI 42
42
Josef Thaihou Jürai Maitao nou Thouh hüre donou Ejipt hi Veyu
1Ejipt hi thou bue touyu ko sülou khaie, Jakob nou puhnah maitao hisü paoe, “Neletao daisounou halia soumoa alinou aliye zhua buwe? 2Zhukhaio, Ejipt hisü thouh bue tea ko süwe, Etao khüa thaimore donou taho thouh hülo.” 3Südonou Josef jürai mai kirou taosü thouh hüre donou Ejipt hisü tare. 4Ana Jakob nou Josef thaihouche Benjamin ye seita more, daiolouzü puh pei hi hashi vedaore ngaopi loure.
5Kanaan teidei teitei hisü tokaa veyu thaifüa, Jakob nahmaitao-a mai kukhe mai koa thouh hüre donou tare. 6Chuo Josef nou teidei khowo soua holo hailo nou veyu mai hrülai hisü thouh zhopeie. Sükua Josef jürai maitao-a tave Josef nghoujü nou pei pfüa nakouloua puhye khurüe. 7Josef nou jürai maitaoye ngaoloukhaie, puhnou shevai shesümai likua sümokho souloua puletao hisü paila kuhshoa chae, “Neletao daikinou vewe?”
Puletao nou “Etao hai Kanaan hinou thouh hülai tea vewe” tea chila peie.
8Josef nou puh jürai maitaoye süloure ana puletao nou Josef ye shimore. 9Josef nou puletao vanou raichoki me muyu nasü lichove loua puletao hisü haibüa paoe, “Neletao hai reikeih pomai baie, Eh teidei haihi malah zhuloulai tea ve-a baie.”
10Ana puletao nou paoe, “Moe, aduwo, ne kilai Etao hai thouh hülai tea ve-a baie. 11Etao hrülai hai maili nah baie, Etao hai reikeih pomai moe, le sheeshayu mai baie.”
12Josef nou puletao hisü “Moe! Neletao hai Eh teidei hi malah zhuloulai tea ve-a baie” toure.
13Puletao nou chila peie, “Aduwo, Etao chinamai kiahai bue alia Kanaan teidei hinou hrüa buyu mai ali nah baie. Etao thaihou nahkhana sü puo hi bue ae süna jürai nasü rakoshia hatare.”
14Josef nou puletao hisü paoe, “Enou paoyu nasü baie. Neletao hai reikeih pomaie. 15Neletao hai checheho dayu haibüa zhulai: süolouzü neletao thaihou nahkhana haihi savemo koute neletaoye panou talai moe tea veo zhih hinou Enou paowe. 16Neletao maili taho nahkhanaye sü salo, ae kukhe maitao hai hukhaki haihi bulai. Veo zhih hinou neletao reikeih pomai moe alia neletao vei chipao sü cheche-e toulouzü haina hinou süloulai.” 17Süthaisü puhnou puletaoye sü teithe asü hukhaki hi thoupeire.
18Teithe asü zhousü Josef nou puletao hi paoe, “Esü Ramai ye ngaopiyu mailie, südonou neletaoye panou hriloure donou haikua soulo. 19Süolouzü neletao hai le sheeyu maie toulouzü neletao maili hukhaki haihi buwo, alia kukhe maitao louzü khüa buyu kikhamaitao donou thouh pfüho peio. 20Sükua neletao thaihou nahkhana sü ahi savewo. Sükulouzü neletao hai damoe touyu süloua neletaoye southa laimoe.”
Sünasü puletao nou ae toure. 21Süthaisü puletao hai maili nou maili hi haibüa paore, “Etao thaihou nanou kazhou koute vea-a Etao hi zhuvea peio tea khoyu puhvei paila nasü keipei ba-a Etao nou puh hi souyu vahso sünavei buusü chuo Etao pei hi veayu haikua vere.”
22Reuben nou paoe, “Nahtou süna pei hisü hashi souso tea Enou paomowu? Ana neletao nou apaih keipei bae, südonou chuo puh hi soukhai touyu paoh nasü Etao nou khalaire.” 23Puletao nou chalayu phaki, kohisü chi paola apeimai buyu thaifüa puletao chi phayu sü Josef nou süwe touyu puletao nou sümoe. 24Josef nou puletao hinou vakou tapa kheikhei soua kraloua dakhailou puletaoye chae. Puhnou Simeon ye puletao nghoujü hi sapaloua rainou khiloure.
Josef Jürai Maitao nou Kanaan hi Dakhai Veyu
25Puletao vei lekhabvü sü thouh thou kou soupeio ae lah kukuvei pousha sü lahkuku vei thouh lekha hi thoupeio alia ludu hi toure todo dothou peio tea Josef nou kilai maitao hi kharochi peie. Alia sütaosü sükua soupeiwure. 26Süthaisü puletao nou puletao vei rheisüh khesü kou souloua tapare. 27Zhoukheili puletao nou chaoyu buh hinou maili hai rheisüh ye to peilai tea lekhabvü hapa khaie lekha mü hinou puhvei pousha sü ngaoloure. 28Alia puhnou puh thaihou-jürai maitao hisü paoe, “Hina avei pousha sü alekha mühi thou dakhai peikhai toue.” Sükuyu süloukhaie puletao sü leveare alia ngaopi shore ae alinou lihi paoe, “Daidonou Ramai hai Etao pei hi haibüa soupeisa?”
29Kanaan hi dakhaive puletao puo Jakob ye daoyu kisü puletao hi vepayu teitei sü haikua paongaore. 30“Ejipt hi teidei khowo nou Etao hai reikeih pomaiye tea maishi shoa paore. 31Ana Etao nou puh hisü ‘Etao hai reikeih pomai moe, mai aveih mai baie. 32Etao chinamai kiahai bue alia puo ali nahmai baie. Rakoshia alisü thaire alia nahkhana hai Kanaan hinou puoye koa bue’ tea paore.” 33Süthaisü teidei khowo nasünou paoe, “Neletao mai aveih maiho maishisa touyu haibüa zhulai: Neletao maili haihi khaiwulai, alia kukhe maitao louzü khüa buyu kikhamaiye thouh pfüho peio. 34Alia neletao thaihou nahkhanatou ahi sa-a dakhai vewo. Sükulouzü neletao hai reikeih pomai moe, mai aveih mai baie tea Enou süloua neletao thaihou nasü dakhai peilai alia neletaoye hai hinou huha soua panou hrüa bailai.”
35Süthaisü puletao thouh lekha sü hapa khaie, puletao vei pousha sü lahkuku vei lekha mü hinou ngaoloure. Sünasü puletao ae puletao puo nou ngaolou khaie alao ngaopi loure. 36Puletao puo nou puletao hisü paoe, “Anah maitao hrülaiye panou hayu neletao nou jüpawu? Josef sü hare, Simeon sü tare, ae chua Benjamin-a satalai toukhaire. Haibüyu teitei sü avea baimu.”
37Reuben nou puh puo hisü paoe, “Enou Benjamin ye sa-a dakhai vemore toulouzü anah poutu ahai khinou ne lah dathawo. Puhye sü abah hi thoupeio, Enou sa-a dakhai vepeilai.”
38Ana Jakob nou paoe, “Anah poutu sü neletaoye koa panou taloushie, puh jürai sü thaire chuo puh likhei thaisho khaitoua baie. Ludu donou hashi vedao louveie. Esü chuo tsüloure alia ale souveapu peiyu thaio Esü dopfüa athaimai kikou hota bailai.”
Právě zvoleno:
SHURAI 42: POUMBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.