Rômiunut 8
8
Erniangupsârsimajut kipalôjungnairninginik ᴋitorngauninginiglo nerriungninginiglo; pingortisimajut anersaumininginik; okpertullo piloringninginik, kappianartut atortilugit aglât.
1Tagva mâna erᴋartoraksautsangilat Kristuse Jêsusemêtut, uvinik malingnago Anernerle maliklugo arvertartut.
2Anernerub ômartitsijub Kristuse Jêsuseme perᴋojangita kivgaujungnaitimanga ajornerub toᴋublo perᴋojanginit.
3Perᴋojab ajortanga, uviningmut ajulertitaumangmat, tamanna Gûdib pivâ, Ernine tiligamiuk, uviningmut ajortolingmut adsioᴋovlugo, tunergutiksauᴋovlugolo ajornerit pivlugit, ajortorlo uviningmioᴋ erᴋartorpâ;
4Idluarneᴋ perᴋojat saᴋᴋertitauᴋojangat nâmakserᴋovlugo uvaptingne uvinik malingnago, Anernerle maliklugo arvertartogut.
5Uviningmigle nâlaktut uvingub pingit issumagivait; Anernermiglo nâlaktut Anernerub pingit issumagivait.
6Uvinguble issumanga toᴋôvoᴋ, Anerneruble issumanga inôsiolarmelo ulapirsautauvoᴋ.
7Uvingub issumanga Gûdemik ômisungniongmat; Gûdib perᴋojangit nâlagomanginamigit, saperpaillo.
8Uviningmêtulle Gûdemut idluarijaujungnangilat.
9Ilipsele uviningmêngilase, Anernermêposele, Gûdib Anerningata inigikpase. Kristusible Anerninganik peᴋangitoᴋ tâpsoma perᴋutigingilâ.
10Kristusele ilupsingnêkpat, time toᴋungagalloarpoᴋ ajorneᴋ pitjutijilugo, Anernerle inôsiovoᴋ idluarneᴋ pitjutigilugo.
11Jêsusemigle toᴋungajunit tupaktitsijub Anerningata inigikpase, tagva tâpsoma Kristusemik toᴋungajunit tupaktitsijub ilipsetauᴋ timise toᴋojuksat ômartitsomârivait, Anerninga ilupsingnêngmat.
12Taimaimat ᴋatangutikka, akkiliksaᴋarpogut uviningmuolungitoᴋ, uvinik maliklugo inôjuksauluta.
13Uvinik maliklugo inôniarupse, toᴋojomârpose; Anernermulle uvingub pingit toᴋoniarupsigik, inôjomârpose.
14Ilûnaita Gûdib Anerningata tassiortangit Gûdib ᴋitorngaringmagit.
15Kivgaujotut anerneᴋartitaunginapse, ama sivôrariaᴋarluse, ᴋitorngaujotulle Anernermik tunitsiviovose, tapsomûna nipliavogut: Abba, Atâtak!
16Anernerub tâpsoma anernivut ᴋaujitipait, ᴋitorngaugapta Gûdemut.
17Kitorngaugaptale, kingormgujijuksaugivoguttauᴋ, imaipoᴋ, Gûdemit kingormgujiluta, Kristuselo kingormgujeᴋatigilugo; kappianarnernik peᴋaᴋatigiguptigo, ânanauseᴋattaujomârᴋovlutatauᴋ.
18Issumavikkama, naliutub tamattoma kappianarningit adsigêktitaksaungimatta ânanaunersoarmut saᴋᴋijârtitaujomârtomut uvaptingne.
19Pingortisimajulle Gûdib ᴋitorngangita nalonairtitauniksangat ilungertordlutik ᴋilanârivlugo utaᴋivât.
20Pingortisimajut kipalôtitaugamik nunguniartomut; issumamingnut pinatik, taimaitingmagille taimaititsijub, nerriugijaksaᴋartidlugit.
21Pingortisimajuttauᴋ piulijaujomârmatta kipalônermit nunguniartomut, illangiutivlutiglo Gûdib ᴋitorngangita kivgaungininganik ânanâmik.
22Pingortisimajut tamaita ᴋaujimavavut, anersaumeᴋatigivluta kappiasutsainarmatta mâna sulle.
23Kissimigle tâpkoa pingilat, nangminerletauᴋ uvagut, Anernerub (tunergutingita) sivorlinginik pijogut, uvaguttauᴋ nangmineᴋ iluptigut anersaumivluta ᴋilanârivogut ᴋitorngaunermik, timiptalo piulijauninganik utaᴋivluta.
24Piulijaumagalloarapta, nerriungnermulle. Nerriugijarle takovlugo tamanna nerriungniungilaᴋ; ᴋanoᴋ inûb takojane nerriugijungnarpaûk?
25Tautungitavulle nerriugiguptigo, ᴋenuersârnermut tagva utaᴋivavut.
26Taimaktauᴋ sangêniptingne Anernerub ikajorpâtigut. Tuksiarnermik ᴋanoᴋ nâmaktomik nalogapta; Anerneruble nangmineᴋ akkisartorpâtigut anersaumijunut oᴋautaujungnangitunut.
27Omatinigle kiglisiniartub (Gûdib) ᴋaujimavâ Anernerub issumanga; tâpsoma ivjornaitut akkisartormagit Gûdib idluarijanganut.
28Kaujimavogulle Gûdemik nagligosuktut ᴋanoelinganerit tamaita idluarᴋutigingmagit, (Gûdib) issumasimaninganut ᴋaiᴋojaumajut.
29Sivorngagut illitarijane sivorngagut perᴋungmagittauᴋ, Ernerme adsiluanganik adseᴋarᴋovlugit, tâmna erniangoᴋârtôᴋovlugo ᴋatangutigêt unuktut akorngane.
30Sivorngagulle taimaiᴋojane ᴋaiᴋolaurivaittauᴋ; ᴋaiᴋojanelo idluarsitilaurivaittauᴋ; idluarsititanelo ânanausitilaurivaittauᴋ.
31Taimaimatta tamakkoa, ᴋanoᴋ tagva oᴋartuksauvitâ? Gûdib illagikpatigut, kia akkerartorungnarpâtigût?
32Tâpsoma Ernine aglât ivlerinago tamaptale pivluta tunidlalauramiuk, tâmna illagilugo tamainik tunitsiviginajangilâtigût?
33Gûdib anerijangit kia pasijungnarpagît? Gûde tagga idluarsititsijoᴋ.
34Kina erᴋartuijungnarᴋâ? Kristuse tagga toᴋolauᴋtoᴋ, ila piluartomik tupaktitaungmijoᴋ, tâpsoma Gûdib talerpiata tungânêdlune tuksiupâtigut.
35Kia avitsungnarpâtigût Kristusib naglingninganît? kiksarnerublônêt, kappianarnerublônêt unangmiklernerublônêt, kângnerublônêt, annorâᴋanginerublônêt, nangianarnerublônêt, saviksublônêt?
36Sorlo aglaksimangmat: Pivlutit toᴋotitaumavogut uvloᴋ nâvlugo, sauᴋatitut toᴋotaksatitut pênartauvogut.
37Tamakkoale tamaita atorlugit ajugauluarpogut uvaptingnik nagligosuktokut.
38Kaujimavikama, toᴋublônêt, inôtsiblônêt, Engeliblônêt, nâlegaunîllônêt, pitsartunerillônêt, naliusimajullônêt, naliutsomârtullônêt,
39Kingingnerublônêt, itinerublônêt, assingitalônêt pingortisimajut avititsunangimatigut Gûdib naglingninganit, Kristuse Jêsuseme Nâlegaptingnêtomit.
S'ha seleccionat:
Rômiunut 8: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.