Rômiunut 7
7
Okpertut pijaujungnairninganik perᴋojanut. Inuktâb inutoᴋablo sorsutiningangnik perᴋojat atortilugit.
1Katangutikka (perᴋojanik ᴋaujimajut oᴋautivakka), ᴋaujimangilasê, perᴋojat ataniongmatta inungmut, inôtilugô?
2Arnaᴋ uilik uiminut ᴋelaksugaungmat inôtilugo, perᴋojat nâlaklugit; uingale toᴋokpat, ᴋelaksugaujungnairpoᴋ perᴋojamut uinga pivlugo.
3Taimaimat, uine inôtilugo uime assianut pigune, nuliarêngnermik asseroijomik taijaulerpoᴋ; uingale toᴋokpat, ᴋelaksimajungnairpoᴋ perᴋojamut, nuliarêngnermiglo asseroijônane, uigilauᴋtame assia pigileruniuk.
4Taimaktauᴋ, ᴋatangutikka, perᴋojanit toᴋosimavose Kristusib timinganut, perᴋutaulerᴋovluse assianut toᴋungajunit tupaktitaujomut, Gûdeme ajungituliniarᴋovluta.
5Uviningmêtiluta ikligunerit idluitulerᴋojijut, perᴋojanut ômariktitaujut, sôngolauᴋput avatiptingne, toᴋo piksaᴋartilugo.
6Mânale perᴋojanit ᴋelarudjârsimavogut, toᴋungavlutalo taipkonangat ᴋelaksûtigilauᴋtaptingnit, imâk, kivgartorᴋovluta, nutâmik ilinganeᴋartitauvluta Anernermut, ilinganetoᴋaᴋaratale aglatuinait maliklugit.
7Kanoᴋ tagva oᴋartuksauvitâ? Perᴋojat idluitulijutauvât? Taimaitsangilaᴋ! Ajornerle illitarilaungilara, perᴋojanut kissiani; ikliguneᴋ nalolaurapko, perᴋojat oᴋangipatta: Ikliguktuksaungilatit.
8Ajornerub tagva perᴋojat pitjutigilerpait ilumne kajungersailune sunatuinarnik ikligunernik. Perᴋojaᴋangitune ajorneᴋ toᴋungangmat.
9Perᴋojaᴋarnanga inôtsima illangane inôlaurama. Perᴋojarle tikingmat, ajorneᴋ ômarivoᴋ.
10Uvangale toᴋolerpunga; perᴋojarlo inôjutiksaugalloaᴋ sunaubva toᴋojutigilerpara;
11Ajornerub perᴋojaᴋ kajungersautigivlugo uivêringmanga toᴋotilungalo tamattomunga perᴋojamut.
12Perᴋojat ivjornaigalloarput, perᴋojarlo ivjornailunelo idluarlarmelo ajungilaᴋ.
13Ajungitoᴋ tagva uvamnut toᴋonartôvâ? Taimaitsangilaᴋ! Ajornerle saᴋᴋerᴋovlugo ajortoᴋsôningane, uvamnut toᴋonartôlerpoᴋ ajungitoᴋ atorlugo; ajorneᴋ ajortovaksônerôlerᴋovlugo perᴋojamut.
14Perᴋojat ᴋaujimagaptigik anerniliongmatta. Uvangale uviniliovunga, ajornerub kivgarivânga.
15Suliakka illitaringilakka; piniaromajara pinianginapko; ômigijarale pisârpara.
16Piniaromangitarale pisârupko, perᴋojat tagva ajungininganik angerpunga.
17Tagva uvanga taimailiungilanga, ajornerle ilumnêtoᴋ (taimailiorpoᴋ).
18Kaujimagama ilumne, tamadja uvinimne ajungitoᴋangitomik. Pijomaneᴋ uvamnêgalloarpoᴋ, nâmaksilugole ajungineᴋ, tamanna nagvângilara.
19Ajungitoᴋ pijomagalloartara pinginapko, ajortorle pijomangigalloartara piniarpara.
20Pijomangitarale pigapko, tagva uvanga taimailiungitunga, ajornerle ilumnêtoᴋ.
21Ajungitulijomagalloartunga perᴋojaᴋ nagvârpara uvamne, ajornerub atavigênarmanga.
22Gûdib perᴋojangit ᴋuviagivakka ilumiutapkut;
23Assianigle perᴋojamik avatimnêtomik tukkisivunga, issumama perᴋojanganut akkerartortomik; tâpsoma kivgautipânga ajornerub perᴋojanganut, avatimnêtomut.
24Uvanga inukullôjunga, kia piuliniarpânga timemit, toᴋub tamattoma pinganît?
25Gûde ᴋujagivara Jêsuse Kristusikut Nâlegaptigut. Tagva uvanga tâmnatsainaᴋ issumapkut kivgartûtigivakka Gûdib perᴋojangit, uvinipkulle ajornerub perᴋojangit.
S'ha seleccionat:
Rômiunut 7: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.