Rômiunut 3
3
Inuk okpernikut kissiani idluarsititauvoᴋ.
1Sumik tagva Jûdit peᴋarnersauvât? kipimanerlo sumik sulivâ?
2Mikijôngitomik pivut. Sivorlermik, Gûdib oᴋausinginik tunitjiviovut.
3Illangille tamakkonunga okpingimatta, tamanna erᴋanarᴋâ? taipkoa okpinginingita Gûdib mikseᴋârninga okpernarungnaitinajarpatsûk?
4Taimainiatsangilaᴋ! imaivikporle, Gûde mikseᴋârtôvoᴋ, inuillo ilûnatik saglotovut; aglait imaingmatta: Oᴋauserne idluarᴋovlutit, ajugauᴋovlutillo, erᴋartortauguvit. #Img. 51:6.
5Idluiniptale Gûdib idluarninga nertornartikpatsuk, sumik oᴋartuksauvitâ? Gûde idluitônajarᴋâ, ningarnermut pidlaramitigût? (inuktut taimak oᴋarpunga.)
6Taimaitsangilaᴋ! Taimaipat, ᴋanoᴋ ilivlune Gûdib silaᴋsûb inungit erᴋartorajarᴋagît?
7Gûdib mikseᴋârninga saglonimnut ânanausiluarpat nertortautitauluarlunelo, sôᴋ idluitulijotut erᴋartortaujariaᴋarᴋêk sullê?
8Sôᴋ imailiungârajangilagût, sorlo mitautigijaugapta, sorlolo illangita oᴋautigingmatigut oᴋarnerarluta: Idluituliniarta, ajungitoᴋ tamattomangat perᴋovlugo? Taimaitut erᴋartortauningat idluarpoᴋ.
9Kanoᴋ tagvâ? taipkonangat ajunginersauvitâ? Mikijomiglônêt pitsangilagut. Kigligiudseᴋammerapta Jûdillo Grîᴋillo ajortoliksôninginik.
10Aglaittauᴋ imaimatta: Idluartomik inuᴋangilaᴋ atautsemiglônêt;
11Silatujoᴋaranelo, Gûdemik aperᴋuteᴋartoᴋangilaᴋ.
12Ilûnatik kiglormut sâsimavut, ilûnamatsiatiglo piojungnairput; ajungitulijoᴋangilaᴋ atautsemiglônêt; #Img. 14:1-3.
13Torᴋlungit iluveᴋtut angmarsimajotun-iput, oᴋarmingnullo takkormôrput, oᴋatik ipiksitilugit, ᴋuglugiangojârtutitut toᴋonartoksoarmik ᴋangasinâmiuteᴋarput. #Img. 5:10; 140:4.
14Kaningit tattaput oᴋautsilungnernik ᴋassilinartuniglo; #Img. 10:7.
15Itigangit sukalidlarput aungmik kovisijomavlutik.
16Apᴋotingine asserornartoᴋarpoᴋ kiksanartoᴋarlarmelo.
17Apᴋomiglo ulapirsartauvionartomik ᴋaujimangilat. #Jes. 59:7,8.
18Nâlangnermik Gûdemik kamangilat. #Img. 36:2.
19Kaujimavogulle, perᴋojat oᴋausingit taipkonunga perᴋojalingnut pingmatta; ᴋanit ilûnatik simiktauᴋovlugit, silaᴋsûblo inungit ilûnatik pasijaksauᴋovlugit Gûdib sângane.
20Taimaimat, uvinik (inuk) idluartitaujungnangilaᴋ tâpsoma sângane perᴋojat piniarᴋojanginut; perᴋojanut ajornerit illitarijaulermatta.
21Mânale idluarsineᴋ Gûdib sângane nâmagijaujoᴋ perᴋojat pinagit nalojaujungnairpok, perᴋojanut nalautaijunullo kigligiutauumajoᴋ;
22Idluarsinerle Gûdeme atortoᴋ, okpernermit Jêsuse Kristusemut pijoᴋ oᴋautigivara, tamainut piksaᴋ, ilûnatiglo okpertut pigijaksangat.
23Adsigêngitoᴋangimat; ilûnatik idluitulilaungmatta, Gûdemullo nertortaujuksaunitik ajulerdlugo;
24Akkeᴋangitomiglo idluarsititaulerput tâpsoma saimarsautânut, piuliklernermut, Kristusib Jêsusib pijanganut;
25Tâmna Gûdib saᴋᴋertilauᴋpâ saimauservioᴋovlugo okpernermut tâpsoma aunganut, idluarneᴋ sâmine nâmagijaujoᴋ nalonairomavlugo, issumagijungnairamigit ajornerit sivorngagut pilauktut, Gûde ᴋenuêsertortilugo;
26Naliutune tamakkonane idluarneᴋ sâmine nâmagijaujoᴋ nalonairomavlugo; saᴋᴋerᴋovlugik Gûdib nangmineᴋ idluartôninga idluarsititsiningalo Jêsusemut okpertomik.
27Nauk tagva nertornautiksâᴋ? Pêrsimavoᴋ. Perᴋojat nalianût? perᴋojanut piniarᴋojijunût? Aukak, perᴋojamulle okperᴋojijomut.
28Taimaimat issumavikpogut, inuk idluarsititaulermat perᴋojat piniarᴋojanginu-ungitoᴋ, okpernermut kissianut.
29Ubvalo Jûdit kissimik Gûde Gûdigivatsûk? nalojuttauk Gûdiginginivatsûk? Aukak, nalojuttauᴋ Gûdigivât.
30Gûde atauseongmat, kipimajunik idluarsititsijoᴋ okpernermut, kipimangituniktauᴋ (idluarsititsingmijoᴋ) okpernermut.
31Perᴋojat tagva atorungnairᴋovitigîk, okperᴋojigaptâ? Taimaitsangilaᴋ! perᴋojalle aulaijauᴋonagit pivogut.
S'ha seleccionat:
Rômiunut 3: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.