Apostelit Piniarningit 27
27
Paulusib umiaktorninganik nangianartomik. Umiangijarᴋattauninganiglo Maltame.
1Italiamulle umiaktortuksaunivut kajusimajutaungmat Pauluse asingillo ᴋelaksorsimajut angajoᴋâmut pitipait Juliusemik atelingmut, ataniviksûb sorsuktuksangita ilanganut.
2Adramitemiulle umiaksoanganut ikigapta, allivarpogut Asiab saniagut umiaᴋtoromavluta. Aristarᴋusiblo Tessalônikamit Mazedôniamêtomit pijub ilagivâtigut.
3Uvlublo aipangane Sîdonemut pivogut. Juliuselo Paulusemik pitsiadlarame, angervigivâ iterninganik illannârijanginut, nerrititauᴋovlugolo.
4Tagvangat allivarapta, Ziprusib saniagut umiaktorpogut, anore aggornarmat.
5Zilîziablo Pamfîliablo imangangne umiaktorluta, Mîramut Lisiamêtomut tikipogut.
6Tagvanelo angajoᴋâk umiaksoarmik naipitsivok, Aleksandriamit pijomik, Italiamut aularniartomik; tâpsomunga ikerᴋovâtigut.
7Sukaitomigle umiaktorapta, uvlunelo unuktune Genidusemut kêta pigapta, anore aggoraptigo, Krêta sanerᴋodlugo torârpogut Salmônemut.
8Tâmnalo serlaᴋ ᴋângerdlugo umiakovigiktomik taijamut tikipogut; iglugasaksuit Lasêamik atilit tâpsoma ᴋanitanganêput.
9Akunêdlalaurapta, umiaktornerlo mâna nangiarnalermat, nerrititailiviglo ᴋângiutilermat, Paulusib kaiblarpait,
10Oᴋautivlugillo: Ilipse angutit, umiaktornek tamanna nangiarnarasugilerpara, umiaksoarlo usingillo kisêtaungitut, inôsivulletauk pivlugit.
11Angajoᴋâble umiaksûb inua angajoᴋângalo okperinersarivak Paulusib oᴋausinginit.
12Umiakoviglo idluangimat okkêviginiarlugo, ununersat tagvangat aularᴋojilerput, ôktoromavlutiglo Fenizemut okkêjartoromavlutik; tamadja umiakovik Krêtamêtok uarngnamut atuarningârmullo sangmijok.
13Kavangarnilermalle, nâmaksinasugivut pijomajamingnik, kissatiglo amuvlugit, Krêta senerᴋopât.
14Anikitomigle kingorngagut ilajujaᴋsûb tikitâlâjub tikipait, atuarnermik taijaujub.
15Umiaksoarlo pijaudlarmat, anoresoarmullo ajulerapta, sâptautituinalerpavut.
16Kikertârsuk tikileraptigo, Klaudamik atilik umiarâmik amuarluta sapikasakpogut.
17Kaᴋinaptigo, ikajorutiksaliorluta, umiaksoak nimerdlugo atsungerpavut; sioraksoarmut ikkariniarasugilugo, tingergautat kataktidlugit sâvipogut.
18Akᴋunaksoarmullo kapiasuktitaudlalerapta, uvlub aipangane (umiaksoak) usingiardlugo ilanginik egiorᴋarpait.
19Uvluglo pingajuangne umiaksûb perᴋutingit egiorᴋarpavut aggaptingnut.
20Uvlunigle unuktunik sakᴋineᴋaranelo uvloriaᴋangimat, akᴋunaᴋsoarlo mikingimat, inôsiptingnik ᴋolalerpogut.
21Nerreᴋammerungnairmattalo, Pauluse akornganit nikovipok oᴋarlunelo: Ilipse angutit, nâlelaurupsinga Krêta ᴋemangnago, nangianartub tikinajalaungilâtigut asiojinatalo.
22Mânale ᴋaiblarpapse, nangiarase, atauserlônêt toᴋoniangimat, umiaksoak kissime aserulârpok.
23Unnuame tamattomane Gûdib perᴋutigijima kivgartortamalo Engelinga sanimne nangilaungmat,
24Oᴋarlunelo: Pauluse nangiarnak, ataniviksûb sânganut pititaujuksauvotit; ahâglo umiaktorᴋatitit tamaita Gûdib tunilaukpait ilingnut.
25Taimaimat, ilipse angutit, sivôraniarase; Gûde okperigapko, taimaitsomârmat oᴋautjauniptut.
26Kikertamulle ikkarituksauvogut.
27Unnualle 14 ingane ᴋetterartilugo, Adriab imaksoangane umiaktortiluta, umiaktortut nuna tikinasugivât.
28Nausaikullo ningitinamitsuk, itininga 20 nik isakterpât, sivuvallârsukamiglo ama nausaikut ningitinamitsuk, itininga isakterpât 15 nik.
29Ilimasuleramik ikkariniarnermingnik, kisaksuit sitamat umiaksûb akᴋoanit ningitipait, ᴋilanârlutiglo uvlub ᴋaulerninganik.
30Kipalulle umiaksoak ᴋemagasuaramitsuk, umiarâk ningitipâtimânut, oᴋatuinarlutiglo kisaksuit umiaksûb sivuanit ningititsomavlugit.
31Tagva Paulusib angajoᴋâk sorsuktuksallo oᴋautivait: Ukua umiaksoarmêngipatta, inôniatsangilase.
32Tagva sorsuktuksat umiarâb pitôtangit kiblorpait imânut singisimalertilugo.
33Kaulermallo Paulusib nerreᴋolerpait tamaita, oᴋarlunelo: Uvlome uvlut 14 olerput, nerriungnermut nerrimaringinapse nerrimâlaunginapselo.
34Tamanna pivlugo ᴋaiblarpapse, nerrititse nakokserᴋovluse; nujak atauserlônêt katangniangimat niaᴋupsingnit.
35Taimaglo oᴋarêrame, ᴋakᴋôjamik tigusivlune Gûde ᴋujagivâ ilûnatik takoane, avgolâllo, nerrilerlunelo.
36Tagva ilûnatik maksualerput nerrilermilutiglo.
37Uvagulle tamapta umiaktoᴋatigêktogut 276 olaukpogut.
38Kâgungnairamiglo umiaksoak oᴋitligiarpât, ᴋakᴋôjaksat imânut egidlugit.
39Kaungmalle nuna ilitaringilât, kangerdlugle takovât, sidjanga imnaungitok; tagvunga umiaksoak uertsârtitsomalerpât, ajornangipat.
40Kisaksuit amuaramigit, sâviput, akᴋûtiblo ᴋelarutinga ᴋelarûtjâramitsuk, tingergautaᴋ saningajoᴋ amuvât, sidjak torârasuarlugo.
41Ikkatok tikipât, avamigut itinilik, tagvunga umiaksoak ikkarippok, sivua tâva aporpok, aulajungnaidlune akᴋoale mallit pitsartuninginut serᴋomitaulerpok.
42Sorsuktuksalle kajusivut ᴋelaksorsimajut toᴋotsomavlugit, tâpkoa naliallônêt puibjorlune ᴋemâᴋonago.
43Angajoᴋâble Pauluse piulijomagamiuk, kajusimaningat serᴋomipâ, puibjorungnartut sivorliovlutik imânut misiklutik tikinasuarᴋovait nunamut.
44Asingille (piulivlutik) ilangit sâtujanut, ilangillo umiaksûb serᴋomakunginut. Taimailioramik ilûnatik nunamut pivlutik piulijaulerput.
S'ha seleccionat:
Apostelit Piniarningit 27: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.