Apostelit Piniarningit 21
21
Paulusib ingerganinganik Milêtusemit Jerusalemut, pititauninganiglo parngnanairsimavingmut.
1Taipkoa ᴋemaklugit umiaktorapta, oᴋᴋomikpogut Kôse tikilugo, uvlublo aipangane Rôdusemut pivogut, tagvangallo Pataramut.
2Tagvanelo umiaksoarmik naipitsigapta Fenîziamut ikâromajomik, tagvunga ikivogut aularlutalo.
3Zipruse allakaraptigo, saumikliutivlugo Sîriamut umiaktorpogut, Tîrusemullo pivluta; umiaksoak tagvane usingijartuksaungmat.
4Tagvanelo ilinniartut naipinaptigik, uvlilaukpogut tagva uvlunik 7 nik; tâpkoa Pauluse oᴋautivât, Anernerub ajunginerub ᴋaujitilaungmagit, Jerusalemut majorarᴋonago.
5Uvlullo tâpkoa nângmatta, aularpogut ingergavluta ilûnatiglo ᴋanilârpâtigut, nuliatiglo ᴋitorngatiglo ilagilugit iglugasaksuit silatânut; sêrᴋortorpogullo imab kiglingane tuksiarlutalo.
6Sorairutiksamiglo oᴋarêrapta, umiaksoarmut ikivogut, tâpkoale angergarivut iglomingnut.
7Uvagulle umiaktornivut nâniardlugo Tîrusemit Putolemaisemut pivogut, ᴋatangutigêllo salutipavut, uvlormiglo atautsemik uvlivogut tâpkonane.
8Uvlub aipangane aularpogut, Paulusemêtogut, Zesarêamullo pivogut, Filippusiblo Evangelistib (imaipok: oᴋautsinik tusarnertunik oᴋâlajib), 7 it ipkua ilangata iglunganut iterpogut, tâpsomanêlerdlutalo.
9Tâmna paneᴋarpok sitamanik, uigasungnik, nalautsitiksanik tâpkoa oᴋarput.
10Tagvanelo uvlilaurapta unuktunik, nalautaijok atersârpok Jûdêamit, Agabusemik atilik.
11Tikinamitigullo Paulusib tapserutâ, tiguvâ agganelo itiganelo ᴋelaksorlugit oᴋarpok: Anernek ajunginek tamattominga oᴋarpok: Jûdit mattoma tapserutib inua taimak ᴋelaksoromârpât Jerusaleme pitiniarlugolo nalojut agganginut.
12Tamannale tusaraptigo, inertilerpavut, tagvanêtullo, majorarᴋonago.
13Paulusele kiovok: Kanok iliorᴋisê, ᴋugviudlarapse, ômatiga sêklugô? pijarêrsimagama ᴋelaksortauniarlunga kissianeungitok, toᴋotaulungale Jerusaleme Nâlekab Jêsusib atinga pivlugo.
14Inertertaujomangimalle, sorairpogut oᴋarlutalo: Nâlekab pijomajanga pile!
15Uvlut tâpkoa kingorngatigut opalungaijarêrapta, Jerusalemut majorarpogut.
16Ilinniartuttauk ilangita ilagivâtigut Zesarêamit, âpâtigullo Minâsonemik atilingmut, Ziprusemiôjomut; ilinniartoᴋ tâmna itôlaukpoᴋ; siniktarᴋojauvogullo tâpsomane.
17Jerusalemut pigapta, ᴋatangutigêt ilaliorpâtigut ᴋuviasuklutik.
18Uvluble aipangane Jakôbusemut pulâriartorpogut Pauluse ilagilugo; angajoᴋâllo ilûnatik tagvunga pigivut.
19Salutijarêlauramigillo, tâpsoma unipkautigilerpait maliktigêktidlugit, ᴋanok Gûde pinialaungmat nalojune tâpsoma kivgartorninganut.
20Tamattominga tusaramik, Nâlegak nakorivât, oᴋautivâllo: Katangut, tautukpotit Jûdinik tausendioᴋattartunik okpilertunik, ilûnatiglo ilungertorlutik perᴋojat maliktauᴋovait.
21Tusaumavâtille, Jûdit ilûnaita nalojut akornganêtut ajoᴋertorangne, Môsesib perᴋojanginik nâleᴋonagit, oᴋalauravillo ᴋitorngangit kipijauᴋonagit, ilusillo taipkoa atornagit.
22Kanok tagva mâna ilingajariaᴋarkâ? katimajariaᴋarput ila ipkoa unugiartoᴋsuit; tikisimanernik tusarniaramik.
23Tamanna pivlugo oᴋausivut ilingnut malilaukit.
24Anguteᴋarpok sitamanik ovane, tâpkoa maligaksaᴋarput angernerilauktamingnik. Tâpkoa ilingnut pikit, ilagilugillo sujungaititaulerit, akkilêrlutillo niaᴋungita nujangit salijauᴋovlugit, ilûnatiglo tukisilerᴋovlugit saglojutaunernik, igvilletauk nangminek perᴋojat malikangne.
25Okpertut nalojunit pijut aglagvigilauraptigik, kajusimavogullo atoriaᴋangininginik tamakkoninga; tunergutinigle gudeungitunut kisênik, aungmiglo ipimajomiglo nerrerᴋonagit, arnaniarᴋonagillo anguniarᴋonagillônêt.
26Tagva Paulusib angutit tâpkoa ingminut pivait, ᴋaungmallo sujungailijauᴋatigivait; katimaviksoarmullo iteᴋattarpok, uvlut sujungaivît nâniardlugit takojaujomavlune; tunergutiksatik ingmigolingatilugit tunijaulerᴋârtinagit.
27Uvlulle 7 it nâkasalermatta, Jûdit Asiamit pijut takovât katimaviksoarme, inuillo ilûnatik perajaluktidlalerpait (Pauluse) tiguvlugo, nipliadlarlutiglo:
28Ilipse angutit Israêlitiojose ikajortigut! tagva inuk ilûnâne ajoᴋertuijok kigliluktomik inuᴋatiptingnik perᴋojaniglo katimaviksoarmiglo ôminga; Grîkittauk itertinivait katimaviksoarmut, iglolo tâmna ivsornaitok ivsornartilaukpâ.
29Trôfimuse Efêsusemiok sivorngagut takolauramitsuk illagijanga iglugasaksoarne; taimna Paulusemut aipaunasugivât katimaviksoarmut.
30Iglugasaksoarmiullo ilûnatik aulajâdlaraulerput, inuillo tagvunga aᴋpangerdlutik katilerput; Paulusele tiguvât tassigoalâllo katimaviksoarmit; tagvainarlo upkuangit palangairtaulerput.
31Toᴋoniaromangmatsugle, sorsuktuksat angajoᴋâviksoangata tusaumalerpait, Jerusalemiut ilûnatik pikablâlermatta.
32Tagvainarlo sorsuktuksat, angajoᴋâllo hundertinut ilagilugit akpangervigivait. Angajoᴋâviksoarmigle sorsuktuksaniglo takogamik, Pauluse annaulidlarungnairpât.
33Angajoᴋaviksûb tikinamiuk, tiguvâ ᴋelaumgujanullo magguinut ᴋelaksortauᴋolerpâ, apersularmelo, kinaungmangât, sumiglo pilaungmangât.
34Inuille akorngane nipliadartoᴋalerpok ilanginik imâk, asinginik imak; nâmaktomigle tukisijungnanginamigit nippersoarnut, sorsuktuksat igloᴋarvinganut âtauᴋovâ.
35Majorarvingmullo pingmat, sorsuktuksat akkigariaᴋalerpât, inuit sorsugomangmatsuk.
36Inugasaksuit malikamitsuk; nipliadlarlutiglo: Pêrtaule!
37Pauluse sorsuktuksat igloᴋarvinganut âtaugame, angajoᴋâviksoarmut oᴋarpok: Oᴋarᴋojomangilarma ilingnût? Tâpsomale oᴋautivâ: Grîkit oᴋausingit atorungnarpigît?
38Egiptenemiôngilatît imna, uvlut tamakkoa sivorngatigut pikablâtitsilauᴋtoᴋ inuartut 4,000 inuᴋajuitomut aulartilugît?
39Paulusele oᴋarpok: Jûdiovunga Tarsusemiok, Zilîziame iglugasaksuit ᴋaujijaumariktut inuᴋatigivânga; ᴋenuvigivagit oᴋarlanga inungnut.
40Perᴋungmago, Pauluse nangerdlune majorarvingme, inuit aggangminut nulorarpait. Nipangermattalo, oᴋautivait Ebrêeritut oᴋarlunelo:
S'ha seleccionat:
Apostelit Piniarningit 21: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.