Apostelit Piniarningit 20
20
Paulusib piniarninginik Mazedôniame Asiamelo. Oᴋausinginik kingorlerpânik ilagêt Efêsusemiut angajoᴋânginut.
1Perajaludlarungnairmatta, Paulusib iliniartut ᴋaiᴋolerpait, sorairutiksamik oᴋautivlugit, tagvangallo aularpok, Mazedôniamut aijomavlune.
2Nunallo taipkoa arvertarvigigamigit, kaiblarᴋâlauramigillo oᴋautsinut unuktunut, Grîkit nunanganut pivok, tagvanêlerdlunelo takᴋinik pingasunik.
3Jûdille unangmingmatsuk, Sîriamut umiaktoromatilugo, isumaksarsiorᴋârdlune kajusilerpoᴋ uterniarnerminik Mazedôniakut.
4Asia tikilugole ilaulaukput tâpsomunga Sopater Berêamiok; Tessalônikamiugle Aristarᴋuse Sekunduselo; Gâjuselo Derbemiok, Timôteuselo; Asiamiugle Tikukuse Trofimuselo.
5Tâpkoa sivorlerivavut, utaᴋivâtigullo Trôaseme.
6Uvagulle umiaktorpogut Filippimit pudjusauteᴋangtunik ᴋaᴋᴋôjaktorviub uvlungita kingorngatigut, uvlullo tallimangane tikipavut Trôaseme, tagvanelo piniarveᴋarpogut uvlunik 7 nik.
7Vogible uvlungita sivorlerpângane ilinniartut katimalermatta ᴋaᴋᴋôjaᴋ avgorlugo, Paulusib oᴋâlavigivait, aᴋagotsomagame; sorairane oᴋâlavoᴋ unnuab ᴋeterarninga tikidlugo.
8Iglullo ᴋolerpângane, katimavigilauᴋtangane, nannergoaᴋalaukpok unuktunik.
9Inôsuktorlo Eutiᴋusemik atilik, igalâb sângane iksivajoᴋ, akpaivlune sinilartok, Pauluse akunit, oᴋâlatilugo, siningnermut ochogame, ijukkarpok iglut ᴋolerêngita pingajuanit, toᴋungatilugolo kiviktauvok.
10Paulusele atersârpok, ᴋolangerdlugolo, erᴋilâllo oᴋarlune: Uimajârase; tarninga iluanêngmat.
11Ama majorarlune ᴋakᴋôjak avgorpâ nerrilarmelo, oᴋâlavigivaillo ama akunit uvlub ᴋaulerninga tikidlugo. Taimaiᴋardlune aularpok.
12Inôsuktorlo ômardlune ᴋaipât, mikijôngitomiglo manigortaulerdlutik.
13Uvagulle umiaksoakut sivorliovogut Assusemut aularluta, tagvangat Pauluse ikimaᴋatikumavlugo; taimâk perᴋojilaungmat, nunakut pisugomagame nangminek.
14Assuseme tikinamitigut ikovigivâtigut, Mitilênemullo pivogut.
15Tagvangallo umiaktorpogut, ᴋaungmallo Kiosib akianut pivogut; ᴋaungmingmallo Sâmosemut tikipogut, Trogilliumelo nokᴋarpogut, uvlublo aipangane Milêtusemut pivogut.
16Pauluse isumasimagame Efêsuse ᴋângeromavlugo, Asiame akunit itsomanane; tuavidlune Penteᴋostib uvlungane Jerusalemêtsomagame, ajornangipat.
17Milêtusemit tiliklerpok Efêsusemut ᴋaiᴋovlugit ilagêktut angajoᴋângit.
18Tikinamitsuglo oᴋautivait: Kaujimavapsinga, ᴋanok iliormangârma naliutome ilûnâne, najulaurapse, uvlormit taimangat, Asiamut tikitainarama;
19Nâlegarlo kivgartulaukpara angijomik nalopᴋotijunga, ᴋugviorlarmalo unuktunik, kapiasuktitaularmalo Jûdinut, unangmiklertunut uvamnik;
20(Kaujimavapsingalo) angigutilaunginapse idluartomik sumiglônêt oᴋâlatigijaksamnik ajoᴋertûtigijaksamniglo ilipsingnut katimatiluse iglupsingnelo.
21Jûdillo Grîkillo oᴋautilaukpakka, sâgiarᴋovlugit Gûdemut, okperᴋovlugillo Nâlegaptingnut Jêsuse Kristusemut.
22Mânalo ahâk, anernerme ᴋelaksorsimajunga Jerusalemut aivunga, nalolarmalo, sumut taikane tikitaulârmangârma;
23Tamattominga kisianik Anernek ajunginek iglugasaksoarne tamaine kigligiutsingmat oᴋarlune: Kelarutillo kappianarnerillo utakᴋingmanga taikane.
24Tamakkoale tamaita sivôragingilakka, inôseralo nangminek ivleringilara, ᴋuviasuklunga nunamênera nâniaromavlugo, kivgartorneralo Nâlekamut Jêsusemut perᴋojaumanera, oᴋautigivlugo Gûdib saimarsautâ oᴋautsinut tusarnertunut.
25Mânalo ahak, nalungilanga, kênara takoniarungnairapsiuk, ilûnase arvertarvigilauktakka oᴋâlavigijakkalo Gûdib nâlegauvianik.
26Tamanna pivlugo uvlome kigligiksarvigivapse, pasitiksaᴋanginama ilûnapse ause pitjutigilugo,
27Angigutilaunginapse, oᴋâlavlungale Gûdib perᴋojanginik tamainik.
28Tagva mâna udsertoritse ilipsingnik ilagêktuniglo ilûnainik, Anernerub ajunginerub ajoᴋertuijungortilaungmase tâpkoninga, Gûdib ilagêktitangit pairilugit aungminut pisiarilauktangit.
29Tamanna nalunginapko, amargut kêsuktoᴋsuit kingunamne akunapsingnut pijomârmatta, ilagêllo kênginiangilait.
30Ilipsingnittauk angutit sakᴋeromârput, ajoᴋertosiâlungnik oᴋartut, ilinniartut kajumiksarniardlugit nangminermingnut.
31Tamanna pivlugo pivâritse erᴋailuselo, sorairnanga ilûnase kaibladlalaurapse jârine pingasune uvlôtilugolo unnuamelo, ᴋugviorlunga.
32Mânalo ᴋatangutikka, Gûdemut saputijauᴋovapse, oᴋautsemullo saimarsautânik, pitsartuneᴋartomut aglisiktitsungnarluse, tunitjivigivluselo kingormgutijaksapsingnik, ivsornaititaujomârtut ilagivlugit.
33Silberemik goldemiglônêt pigijapsingnik annorâpsingniglônêt ᴋenulaungilanga.
34Kaujimavapsingale, aggamnut tâpkonunga pinialaurama atoriaᴋalauktamnik ilamalo piksanginik.
35Nangminek ᴋaujitilaukpapse tamainik, taimâk sanajuksaugapta, sangêtut ikajorlugit, Nâlekablo Jêsusib oᴋausingit erᴋarlugit, oᴋarmat: Tunijinek piloringnarnersauvok pilitaunermit.
36Taimaglo oᴋarêrame sêrᴋortulerpok tuksiaᴋatigilugillo tamaita.
37Ilûnatik tâva ᴋeavaksoadlalerput, Pauluselo ᴋongasingagut erᴋilerpât kunilâllo.
38Tamanna oᴋausek kiksautigiluarpât, kêname takojaujungnairninganik oᴋarmat; umiaksoarmullo ᴋanilârpât.
S'ha seleccionat:
Apostelit Piniarningit 20: LIHB08
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Labrador Inuttitut Heritage Bible © Canadian Bible Society, 2008.