Mateo 3
3
Bautizakuq Juan willakunqan
Marcos 1.1-8; Lucas 3.1-9, 15-17; Juan 1.19-28
1Tsë watakunam Judea provinciachö këkaq chusyaq jirkachö Bautizakuq Juan willakur 2kënö nirqan: <<¡Teyta Diospa mandakïnin chämushqanam! ¡Jutsa rurëta jaqirir Teyta Dios munashqannöna kawayë!>>#Mat. 4.17; Mar. 1.15.
3Tsënö willakunanpaqmi profëta Isaías qellqanqanchö nin:
<<Juk nunam chusyaq jirkachö qaparipa willakur nikan:
<Teyta Dios shamunanpaq nänita altsayë.
Wiksu nänikunata derechayë> >>.#Isa. 40.3.
4Juanpa ratashninqa karqan camëllupa aqtsanpita awashqam. Wachukunpis karqan camëllupa qaranpita rurashqam.#2Rey. 1.8. Mikïninpis pintiq kurukunawan mielmi karqan.
5Juan willakushqanta wiyaqmi Jerusalénpita, Judeapita y Jordán mayu nöpan markakunapita nunakuna ëwayarqan. 6Teyta Diosta perdonta mañakuyaptinmi Jordán mayuchö tsë nunakunata Juan bautizarqan.
7Tsëman atskaq fariseukuna y saduceukuna bautizakuq chäyashqanta rikarnam Juan kënö nirqan: <<¡Culebra casta nunakuna!#Mat. 12.34; 23.33. ¡Pitaq qamkunata niyäshurqunki Teyta Diospa castïgunpita safayänëkipaq kashqanta! 8Jutsëkikunata rasunpa jaqishqa karqa Teyta Dios munashqannöna kawayë. 9Ama yarpäyëtsu Abrahampa castan kayashqëkipita#Juan 8.33. Teyta Dios salvayäshunëkipaq kashqanta. Noqam niyaq: Teyta Dios munarqa kë rumikunatapis Abrahampa castanman tikraratsinmanmi. 10Mana wayukuq montikunata sipinpita#3.10 Wakin nunakunaqa watsinpita o jawanpita niyanmi. muturir ninaman jitëkuqnömi jutsa ruraqkunata castigananpaq Teyta Dios listu këkan.#Mat. 7.19.
11<<Jutsa rurëta jaqir Teyta Dios munashqannö kawayänëkipaqmi yakuwan bautizayaq. Qepäta shamuqqa Espíritu Santuwan y ninawanmi bautizayäshunki. Noqapita mas puëdiq kaptinmi llanqinta apanällapaqpis sirwïtsu. 12Trïguta wawyananpaq jorquitan tsarashqanam këkan. Wawyarirnam trïguta wayinman churanqa. Päjantanam imëpis mana upiq ninaman jitëkunqa>>.
Jesústa Juan bautizanqan
Marcos 1.9-11; Lucas 3.21-22
13Juan bautizananpaqmi Jesúspis Galileapita Jordán mayuman ëwarqan. 14Chäriptinnam bautizëta mana munar Juan kënö nirqan: <<Teyta, manam qamta bautizaqmantsu, sinöqa qammi bautizamankiman>>.
15Jesúsnam yaskirqan: <<Imanö kaptinpis bautizamë. Bautizamänëkitam Teyta Dios munan>>.
Tsënö niptinnam bautizarqan. 16Bautizakurir yakupita yarqëkämuptinnam ciëlu kichakärirqan. Tsëchömi Jesús rikarqan Espíritu Santu imëka urpënö jananman urëkämuqta. 17Tsënöllam ciëlupita Teyta Dios kënö nimurqan: <<Pëqa kuyë tsurïmi. Pëpitam kushikü>>.#Sal. 2.7; Mat. 17.5; Mar. 1.11; Luc. 9.35.
S'ha seleccionat:
Mateo 3: qwhB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2018, Wycliffe Bible Translators, Inc. All rights reserved.