Mateo 4
4
Jesústa Satanás tentëta munanqan
Marcos 1.12-13; Lucas 4.1-13
1Tsëpitanam diablu tentananpaq Espíritu Santu chusyaq jirkaman Jesústa pusharqan.#Heb. 2.18; 4.15. 2Tsëchö chusku chunka (40) junaq y chusku chunka paqas ayunariptinnam Jesústa wanïparaq mallaqë tsarïkurqan. 3Tsëmi diablu chärir nirqan: <<Diospa Tsurin karqa mä kë rumikunata tantaman tikratsi>>.
4Jesúsnam nirqan: <<Teyta Diospa palabranchö kënömi qellqarëkan: <Manam tantata mikurllatsu nuna kawan, sinöqa Teyta Dios llapan nishqankunata cäsukurpis kawanmi> >>.#Deut. 8.3.
5Tsëpitanam sagrädu Jerusalén markaman Jesústa diablu aparqan. Tsëchönam templupa mas altunman shëkatsir 6kënö nirqan: <<Diospa Tsurin karqa mä këpita jeqarkï. Diospa palabranchö kënömi qellqarëkan: <Angelninkunatam Teyta Dios kachamunqa imapitapis tsapëkuyäshunëkipaq. Pëkunam tsariyäshunki chakikillatapis rumikunachö mana tsaktanëkipaq> >>.#Sal. 91.11-12.
7Jesúsnam nirqan: <<Jina Teyta Diospa palabranchö kënömi qellqarëkan: <Teyta Diosta ama tentankitsu> nir>>.#Deut. 6.16.
8Tsëpitanam jatun jirkaman diablu pushëkur jinantin nacionkunata riquëzankunatawan rikätsir 9nirqan: <<Qonqurikur adoramaptikiqa kë llapan rikashqëkitam qoykushqëki>>.
10Jesúsnam nirqan: <<¡Këpita witikï, Satanás! Teyta Diospa palabranchö kënömi qellqarëkan: <Teyta Diosllatam adorayanki. Y pëllatam sirwiyanki> nir>>.#Deut. 6.13.
11Tsënö nïkuptinnam diablu ewkurqan. Tsëpitanam angelkuna chärir Jesústa yanapayarqan.
Galileachö willakur Jesús qallëkunqan
Marcos 1.14-15; Lucas 4.14-15
12Carcelchö Juan llawirëkashqanta musyarmi#Mat. 14.3; Mar. 6.17; Luc. 3.19-20. Galileaman Jesús kutikurqan. 13Nazaret markachö täränanpa rantinmi Capernaúm markaman ewkur tsëchö täkurqan. Tsë markaqa karqan Galilea qocha kuchunchömi y Zabulón y Neftalí trïbu nunakuna täräyashqan kaqchömi. 14Capernaúmchö Jesús täraptinmi profëta Isaías kënö willakushqan cumplikarqan:
15<<Zabulón trïbu y Neftalí trïbu nunakuna,
qamkuna täräyashqëkipam lamar kuchunpa y Jordán mayu wak tsimpanpa näni pasëkan.
Mana Israel nunakunapis qamkuna täräyashqëkichömi atskaq täräyan.
16Paqaschönö kawarpis atsikyëta rikaqnömi salvayäshuqnikita rikäyanki.
Tutapëchönö kawayaptikipis salvayäshuqnikiqa aktsinömi kanqa>>.#Isa. 9.1-2.
17Capernaúmchö tëkarmi willakur qallëkur Jesús kënö nirqan: <<¡Teyta Diospa mandakïnin chämushqanam! ¡Jutsa rurëta jaqirir Teyta Dios munashqannöna kawakuyë!>>#Mat. 3.2.
Discïpulun kayänanpaq pescadorkunata Jesús qayanqan
Marcos 1.16-20; Lucas 5.1-11
18Galilea qocha kuchunpa ëwëkashqanchömi Jesús rikarqan ishkaq nunakunata. Pescädu tsariq karmi atarräyankunata yakuman jitëkäyarqan. Pëkunaqa kayarqan Simónmi y wawqin Andrésmi. Simónpa juk kaq shutinmi karqan Pedro. 19Pëkunatam Jesús kënö nirqan: <<Qatiyämë. Noqam yachatsiyashqëki nunakunata pescayänëkipaq>>.
20Tsënö niptinmi atarräyankunata jaqirïkur Jesúswan ewkuyarqan.
21Tsëpita mas wak läduchönam Santiaguta y wawqin Juanta rikarqan. Pëkunaqa tëtan Zebedeuwanmi barcunkunachö atarräyankunata remendëkäyarqan. Pëkunapis Jesús qayaptinmi 22tëtankunata y barcuta jaqirir juklla ewkuyarqan.
Qeshyaqkunata Jesús kachakätsinqan
Lucas 6.17-19
23Jinantin Galileapa Jesús purirmi Teyta Diospa mandakïninpa alli willakïninta sinagögakunachö yachatsikurqan y tukïläya qeshyawan qeshyaqkunata kachakätsirqan.#Mat. 9.35; Mar. 1.39. 24Tsëtam Siria nación markakunachöpis musyariyarqan. Tsëmi pëkunapis Jesús kaqman apayarqan tukïläya qeshyawan qeshyaqkunata, supë jipatsishqan nunakunata, atäquiwan qeshyaqkunata y invälidukunatapis. Tsë qeshyaqkunata llapantam Jesús kachakätsirqan.
25Atskaqmi Jesústa qatiyarqan. Tsë nunakunam kayarqan Galileapita, Decápolispita, Jerusalénpita, Judeapita y Jordán mayu wak tsimpanpitapis.
S'ha seleccionat:
Mateo 4: qwhB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2018, Wycliffe Bible Translators, Inc. All rights reserved.