Mateo 2
2
Qoyllur estudiaqkuna Jesústa adoraq chäyanqan
1Rey Herodes mandakushqan witsanmi Judea provinciachö këkaq Belén markachö Jesús yurikurqan. Yurikuptinmi qoyllur estudiaq nunakuna inti yarqamunan kaq lädupita Jerusalénman chëkur 2kënö tapukuyarqan: <<¿Mëchötaq Israel nunakunapa reynin kananpaq yurikuq llullu këkan? Qoyllurnin yurimuqta rikarmi pëta adoraq shayämurqü>>.
3Tsëta wiyëkurmi rey Herodes y Jerusalénchö täraqkunapis alläpa yarpakachëchö tikrakuriyarqan. 4Tsëmi mandakuq sacerdötikunata y ley yachatsikuqkunata qayëkatsir Herodes tapurqan: <<Salvamaqnintsik Cristo ¿mëchö yurikunanpaqtaq këkan?>>
5Pëkunanam niyarqan: <<Tëtë, Judea provinciachö këkaq Belén markachömi. Tsëchö yurikunanpaqmi Teyta Diospa profëtan kënö qellqarqan:
6<< <Belén marka, Judáchö këkaq wakin markakunapita mas takshalla kaptikipis
qamchömi Israel nunakunapa reynin yurikunqa.#Miq. 5.2.
Pëmi Israel nunakunata üsha mitsiq cuenta täpanqa> >>.
7Tsëta musyarirmi qoyllur estudiaqkunata pakëllapa Herodes qayatsirqan. Chäriyaptinnam tsë qoyllurta imëpitana rikäyashqanta tapurqan. 8Willariyaptinnam Herodes kënö nirqan: <<Belénman ëwar tsë wamrata ashiyämï. Tarïkurqa willayämanki noqapis adoraq ëwanäpaq>>.
9Belénman ëwayaptinnam tsë rikäyashqan qoyllurpis pëkunapa puntankunata ëwarqan. Wamra këkashqan wayi jananman chärirnam qoyllur pärarirqan. 10Tsëta rikarmi alläpa kushikuyarqan. 11Wayiman yëkurirnam wamrata y mamänin Maríata tariyarqan. Tsëmi wamrapa nöpanman qonqurikur adorayarqan. Tsëpitanam apayashqan qorita, inciensuta y mïrrata qarayarqan.
12Herodes kaqman manana kutiyänanpaq Teyta Dios suëñïninkunachö revelaptinmi juk nänipana markankunaman kutikuyarqan.
Egiptuman Jesústa José safatsinqan
13Qoyllur estudiaq nunakuna ewkuyaptinnam Joséta suëñïninchö Teyta Diospa angelnin nirqan: <<Herodesmi wamrata wanutsinanpaq ashitsinqa. Jina höra sharkur wamrata mamänintawan Egiptuman pusharkur ewkï. Tsëchö täkuyanki yapë willashqaqyaq>>.
14Tsëmi tsë höra riyarkur patsa manaraq waraptin wamrata mamänintawan aparkur Egiptuman ewkuyarqan. 15Tsëchömi täräyarqan Herodes wanushqanyaq. Tsënöpam Teyta Diospa profëtan kënö qellqashqanta cumpliyarqan: <<Tsurï kaptinmi Egiptupita qayamurqä>>.#Ose. 11.1.
Belénchö wamrakunata wanutsiyanqan
16Qoyllur estudiaqkuna pëman mana kutiyaptinnam rey Herodes alläpa piñëkurqan. Tsëmi soldädunkunata kacharqan Belén markachö y lädun estanciakunachö ollqu wamrakunata wanutsiyänanpaq. Qoyllurta imë rikäyashqantapis willayashqanpita cuentata jorqurirmi wamrakunata wanutsiyarqan tsëraq yurikushqapita ishkë watayuqyaq. 17Tsënö wanutsiyaptinmi profëta Jeremías kënö qellqashqan cumplikarqan:
18<<Ramá markachö llakikur waqashqanmi wiyakëkämun.
Tsëqa Raquel waqashqanmi.
Wawankuna wanushqa kaptinmi shoqayaptinpis mana pärëta waqëkan>>.#Jer. 31.15.
Egiptupita kutiyämunqan
19Herodes wanuriptinnam Egiptuchö José këkaptin Teyta Diospa angelnin suëñïninchö 20nirqan: <<Wamrata mamänintawan aparkur Israelman kutikuyë. Wamrata wanutsita munaqkuna wanuyashqanam>>.
21Tsënö niptinnam wamrata mamänintawan aparkur Israelman kutikuyarqan. 22Kutikïkarnam José musyarirqan Judeachö rey Herodespa rantin tsurin Arquelauna mandakuq këkashqanta. Tsëta musyarirmi Judeaman kutita mantsarqan. Tsëmi suëñïninchö Teyta Dios willaptin Galileamanna ewkuyarqan. 23Tsënöpam Nazaret markaman täraq ewkuyarqan.#Mar. 1.24; Luc. 2.39; Juan 1.45. Tsëchö täkuyaptinmi Teyta Diospa profëtankuna kënö niyashqan cumplikarqan: <<Nazareno kashqantam nunakuna niyanqa>>.
S'ha seleccionat:
Mateo 2: qwhB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2018, Wycliffe Bible Translators, Inc. All rights reserved.