Números 14
14
Israelita aina Yuusa chichamen umikcharu aina
1Tuinakai antukar sapijmainak nu kashitin uu útainakua tsawararu ainawai. 2Tumaina asar Moisésan Aarónjai pegkerchaun chicharainak, Egiptonmag jinumaina nu, tura aya nugkanmag jinta wesar jinamusha pegkeraiti. 3Yuus jui inka maaniamunam jinawarti, tura nita nuwe ainan, uchiri ainancha achirar yarutkarti tusa imajaigka ikatmakji. Nekaska Egiptonam aya waketmainaitji, tusa tuina.
4Tusar nitak chichainak: Egipto nugkanam ina juramki ejétammain chikichik shuar apu anaikami, tusa tuina. 5Nuna tusa tuinakai Moisés Aarónjai ashi israelita aina emtin nugkan antiastatuk tsuntsumawaru. 6Nugka nekatarma tusa akupkamu ajakarua nuiya Josué tura Calebjai kajekar jaanchrin jakaru ainawai. 7Tumawar ashi israelita ainan nita chicharainak: ¡Ii ainati nugka nekattsa werimaj nuka shir pegkerayi! 8Yuus ijai pujau asa, ni yainmasmatai nugka pegker asamtai árak aina pegker tsapauwa nui wayattaji. 9Yuuska pegkerchau chicharkairpa, nuiyasha nitan yaimainka pegke atsawai, antsu inka Yuus yainmaktatji. Tuma asamtai nu nugkanmaya shuar ainaka ashamkairpa, tusar tiaruiti.
10Tusa tuinamsha Josuén tura Calebnasha kayajai tukurartasa chichaina. Tuinakai Yuus, ni ememattasa iruuntai aaknum taa israelita aina emtin tsaaptin jasuiti. 11Tuma Moisésan Yuus chicharuk: Ju shuar aina juka wina pachitas pegkerchaun chichaskeka pujumainchau nekapenawai. Nuiyasha wainchatai aina iwaintamsha tuke utujimainawai. 12Wii nitanka jinati tusan jatan akuptukan ijinattajai, turamu asar nitan nugkan anajmatawaitaj nuigka jeachartatui. Antsu aminka nukap napamkattajme, tusa Yuus Moisésan tinaiti.
13Takai Yuusan Moisés aujeak: Yuusru, ame etegkamuram aina ijinawakminka, egiptonmaya aina nuna antukar, 14ame israelita ainajai pujamun, nita paan wantintukam tsawaika yuragmia numamtinnum wejakuitam nuna, tura káshika ji keawa numamtinnum wejakuitam nunasha Canaánnumia shuar ainan ujakartatui. 15Ame etegkamuram aina nu ju tamauwaik ashi ijinawakminka, ame turamuram aina nuna antukaru ainaka, 16amina pachitmasar pegkerchau chichartamainak: Yuuska ni etegkamuri ainanka nugkan anajmatawa nui ejé apujsataj tukama tujintak ijinayi, tusar turamiartatui.
17Turammain asarmatai, apuru, ame ashi turinaitam nu yamai iwainmamkata. Ame chichakum tinaitme: 18Wika wári kajechuitjai, wina anegkrattairka tuke atinaiti, tura shuar tunaun takasu akusha tsagkurturta, tusa turutkaigka wika tuke tsagkurnaitjai. Turasha shuar tunaun takasaru ainan, tura nita uchiri ainan, tiragke ainan, tiragke uchiri ainan tura nuna tiragke ainancha waittan suwaitjai, tusam tinaitme. 19Ju shuar aina juka Egiptonmaya nagkamsam kuitamkam imajai itawarume, tura asam nekas ame nita aneakmeka, amina shir senchi anegkrattairmijai, nita tunau takasmauri ainasha tsagkurarta, tusa Moisés Yuusan tinaiti.
20Tama Yuus Moisésan chicharuk: Takuminka ijintsuk tsagkurartatjai. 21Wika Yuusaitjai, tumau asamtai wii pegker aina takamurnaka ashi nugkanam nekainawai. 22Egipto nugkanam tura aya nugkanmasha wina tsaaptintrun, tura wainchatai ainan wii iwainamun nukapea wainkaru ainaksha, winaka nukapea nekaprusaru, wina chichamrun umirtukcharu ainaka, 23tura wina pegkerchaun chichartukaru ainasha, nita uuntri ainan nugkan anajmatawaruitaj nunaka wainkachartin ainawai. 24Antsu Caleb chikich aina wina chichamrun umirtuinachkaisha nigka metek umirtuku asa, nugkan wii anajmatawaitaj nunaka wainkattawai. 25(Amalecita aina tura cananeo ainasha nugka pakanam pujuinawai.) Antsu atumka kashin káshikmasrum atum tamaunmani aya nugkanmag nayants Kapantunmani wetatrume. 26Yuus Moisésan Aarónjai chicharuk:
27“Israelita aina pegkerchau asar inaitsuk wina pachittsar pegkerchau chicha yujaina nuna antukjai. 28Tumaina asarmatai ame weme wii titatjam nu ujakum: Wii, Yuus asan tajai, nita chichainamun anturkamaj nunisarag nitanka umintuktatui. 29Ashi shuar uun aina veinte uwí aramu tura nuna inagkas aramu nita naari papiinum aatmamtikramu aina wina pachittsar pegkerchau chichartukaru ainaka jinawar nita iyashi ainaka aya nugka juig utsankattawai. 30Antsu Caleb tura Josué nugkan amastasan wii anajmatawaitjarme nui wayawartatui. Turasha chikich ainaka pegkesha wayachartatui.
31Atum chichakrum ina shuari aina ina mantamainak ina uchiri ainan yaruakartatui timarum nuka turachartatui. Wii atumi uchiri ainanka atum nugka nakitrau ainarum nui yaruakan apujsartatjai, turawaram arakan arakmawar yuinak shir aneasar pujusartin ainawai. 32Antsu atumka aya nugka juig jinattarme. 33Atum wina nekaspapita tusarum turutchau asaakrumin atumi uchiri aina oveja ainan kuitamin jasar aya nugkanmag cuarenta uwí yujasartatui. Nunaka atumin aya nugkanmag ashi jinati tusar nakarmainak tumawartatui. 34Nugka nekattsarum cuarenta tsawan yujasuitrume, tuma asarum atum chicham umikchamunam nu waitat juakrum cuarenta uwí pujuttarme. Chiki chikichik uwítin chikichik tsawan waitat jutattrume. 35Wii, Yuus asan taja nunaka ashi metek umiktatjai. Wina pachittsar pegkerchau chichartukaru aina nuka ju aya nugka juig jinawartatui”, tusa Yuus tinaiti.
36Nugka nekata tusa Moisés akupkamu aina waketrar jeawar nugkaka pegkerchauwayi tusar etserkaru ainawai. Nu tusa etsermaun antukar pegkerchau chichakaru ainawai. 37Nu shuar tu chichakaru aina nuka Yuus waitat susam jinawaru ainawai. 38Nugka nekatarma tusa doce shuar akupkamua nuiya Josué Calebjai jakacharu ainawai.
Hormá nugkanam israelita ainan ijinamu
39Moisés israelita ainan Yuus timaun pachis ujakuiti. Turawaram ashi wake mesekaruiti. 40Tura kashin tsawaarar káshikmas nantarar wear nainnum wakaruiti. Tumawar chichainak:
“Ika nekas tunau takasuitji, tuma akursha Yuus ina nugkan anajmatramawaitaj ai wearmi, tusa tiaru ainawai.
41Turasha Moisés nitan chicharuk: Atumka Yuusa chichamegka umirtsurme. Tuma asarum atum wakerarum nuka metek uminkashtatui. 42Yuus atumjai pujachu asamtai werpa. Nui weakrumnaka chikich shuar aina atumjai maaninak ijitmattarme. 43Atum chichame umirkachmau asa Yuuska atumjaigka pujatsui. Tuma asamtai atum ai weakrumnaka amalecita aina, tura cananeo aina ijitmattarme”, tusa Moisés tinaiti.
44Tamaitiat nainnum wakaruiti. Turasha Moiséska nita matsamamunmag juakuiti, tura Yuus chicham umikmau egkeamu arca ajakua nunasha jukicharuiti.#He 3.12-19 45Tumawaru asarmatai amalecita aina, cananeo aina, israelita ainan patatukar maa mainakua Hormánam ejéniaruiti.
S'ha seleccionat:
Números 14: hubDBL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2010, Wycliffe Bible Translators, Inc. All rights reserved.