Números 20
20
Entsa muchignumia jiinkimu
1Aya nugkanmag yuja yujakua cuarenta uwí ejéniar, Zin nugkanam jeawaruiti. Tumawar Cadésnum matsamsaruiti. Tura matsatmaunam María jakamtai ikusaruiti 2Entsa umumain atsau asamtai shuar aina kajekar Moisésan, Aarónjai 3chicharainak: Ii shuar ainan Yuus ijinamia nuig jina akurka imajnikrika waitu yujamaitsuji. 4-5¿Urukamtai kitakai jinati tusarmesha uchirtuk, tura tagkurtuksha Egiptonmayasha jiikratkimarme? Juigka nugkasha árak araa juumainkisha, tura umumainkisha pegke atsawai, tusa tiaruiti. 6Tuinakai Moisés Aarónjai, Yuus ememattasa iruuntai aaknum jeawar Yuusan aujaina. Tumainai Yuusan senchiri tsaaptin wantintukaruiti. 7Tura Yuus Moisésan chicharuk:
8Shuar ainan Aarón irumrati. Turamtai ushukrutai jukim muchig a nui jeaam, entsa jinta tusam titá. Tama entsa jiinmatai shuar aina, tura tagku ainasha ashi umararti, tusa tinaiti. 9Tutai Moisés Yuus tina turusag umiak ushukrutain juki, 10Moisés, Aarónjai shuar ainan irumar muchig amaunam chicharuk: Chichaman umichu ainata antuktarma: Atum umartin entsa muchignumia jiimaintika ii ainatsji, tusa tinaiti.
11Nuna tusa ushukrutaijai muchigkin jimaraa awatnaiti. Turamtai entsa muchignumia nukap jinnaiti. Tumamtai shuar aina, tura tagku ainasha ashi umararuiti. 12Turasha Yuus Moisésan Aarónjai chicharuk: Atumka wina nekaspapita tusa turutchau asarum, israelita emtincha winaka umirtukchau asarum, wii nitan nugkan anajmatawaitaj nuigka, ju shuar ainajaigka atumka jeashtattrume. Antsu nita wii nugkan susartataj nuigka jeawartinaiti, tusa tinaiti. 13Nu entsaka Meribá tutai ajakuiti, Meribá ta nunaka chichamrukmau taku tawai, israelita aina Yuusan umirtsuk pegkerchau chicharujakaruiti. Tu chichakaru ainakaisha Yuus nina pegkerin iwaintukuiti.
Edomnumia aina Israel shuar ainan inagkatan nakitramu
14Moisés Cadésnum pujus, chichaman etserin ainan akupeak, Edomnumia apu chicharkurum: Amina yatsum israelita aina waittanam matsataina nuka nekainame. 15Ina uuntri ajakarua nu Egiptonam shiakar nukap tsawan matsamajakaruiti. Nui matsatun egiptonmaya aina waitkajakarua numamtuk incha waitkarmainaji. 16Yuus ii seammaun anturtamak chikichik nayaimpinmaya shuaran akupturmakmatai nu yainmasmatai Egiptonam matsatuti jiintrarji. Tumar yamaika yaakat Cadésnum amina nugkem tesamua nui matsatji. 17Wait aneasam nagkamaktarma tusam tukartita, amina nugkemini nagkamaktatji. Tumakrisha árak arakmaunumka nagkamatsuk, tura yumirmataisha umutsuk jintanmag wea weakuar amina nugkem nagkaikittsar taji tusar tuina.
18Turasha Edomnumia apu ayak: Wina nugkaruigka nagkamakirpa. Tamaitiatrum umiachkurminka wina suntaarujai maaniattaji, tusa tinaiti. 19Tusa takaisha akupkarmau aina apun ayainak: Jinta weamunmag nagkamaktasa taji. Antsu ii ainati, tura ina tagkurigsha kitamainak entsan yumirmatainmayan umuinakaigka, urutam akikkit turusrik akikmaktatji, tusar tiaruiti. 20Turasha Edonnumia apu ayak: Takurmesha nagkamakchattarme tusa nina suntaari ainajai shir umintsar israelita ainan jinturuiti. 21Tura nagkamamainchau amajsamu asa, israelita ainaka chikich jintanam weartasa eakaruiti.
Aarón jakamu
22Tumawar Cadésnum matsatu jiinkiar we wenakua Hor nugkanam jeawaruiti. 23Tuma nui matsatun Moisésan, Aarónjai Yuus chicharuk: 24“Entsa Meribánam wina nekaspapita tusa umirtukchau aina asaakrumin, israelita ainan nugkan susatjarme tusan anajmatawaitaj nuigka, Aarónka jeatsuk jakattawai. 25Tumatin asamtai, Aarón nina uchiri Eleazarjai jukim Hora naintrin iwakta. 26Turam Aarón sacerdote asa nugkuara nu awiikam nina uchiri Eleazar anugkrata”, tusa tinaiti.
27Yuus timaun turusag Moisés umiak, shuar ashi wainainamunam Aarónkan nina uchirijai juki, Hora naintrin iwakuiti. 28Tura nui Moisés Aarónkan sacerdote asa jaanch nugkuarmaurin jurus Eleazaran anugkrauwaiti. Turamtai Aarón jakauwaiti. Tumamtai nuig ikusar Moisés Eleazarjai nainnumia waketkiaruiti. 29Tuma israelita ainan ujainak, Aarónka jakayi tusa tiaruiti. Nuna antukar chikichik nantu útuk matsamsaruiti.
S'ha seleccionat:
Números 20: hubDBL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2010, Wycliffe Bible Translators, Inc. All rights reserved.