Éxodo 12
12
Jiisat Pascua pachisa timau
1Moisésan Aarónjai eke Egipto nugkanam pujaun, Yuus chicharuk: 2Ju nantua juka uwí yama nagkamchak achiamunam atatui, tura nu nantutinka atum eme anentsa iiyakrum jiistamin atatrume. 3Tuma asamtai israelita aina ashi chicharkum: Ju nantu diez tsawan tsawaarmatai, shuar jeentin aina chiki chikichik ovejan aishmagkun nuwerman pegkeran iis chikichik uwí aramun, tura nu atsakaigka cabra aishmag yama tsakan achikar nita jeen apujsarti. 4Shuar nukap uchirtinchau asa, chikichik tagku maamun amumainchau akugka shuar nijai irutkau pujaujai iruunar tagkun maa namagken akantunaikar yuawarti.
5Nu tagkuka chikichik uwí aramu aishmag pegker nuweram, oveja tsakat tumachkusha cabraksha atatui. 6Iman iisrum etegkarum shir kuitamkarum apujsarum wii tajarum nuu nantutin catorce tsawan tsawarmatai etsa kiakai chiki chikichik uun ainatiram tagku maarum numpe jukitarma. 7Nutika nita jeen iruntrar pujusar yuamun waitirin yantamen tura yakinisha tagku numpejai yakararti.#He 11.28 8Nu káshi atata nuigka tagku namagken jinum pegka inaraamun, nupa yapau yutai ainajai tura pannasha levadurajai pachimtsuk inaraamujai yuawarti.
9Tagku namagke painka inaraamu turachkusha unutakuksha pegkesha yuawairpa. Tagku namagkenka ashi mukesha makui aina tura ampuje ainasha jinum pegka inaraamu atatui. 10Namag juakmataisha kashin tsawaku yuatin tusarka ikukcharti. Nunaka turutsuk namag juakmataigka ekemaktarma. 11Jaanchin nugkurar, zapaton weamakar, tura ushukrutaincha takusar wári yuawarti. Nuka jiisat Pascua asamtai wina ememattruinak tumawarti.
12Nu Pascua tsawantin káshi ajampek jasmatai, egiptonmaya ainan jeen wii wayakai uchi aishmag iwairi aina, tura tagku aishmag yama nagkamchak akiinkaru ainasha jinaattawai. Nuiyasha egiptonmaya aina yuusrimtairi ainancha ashi tsaiktatjai. Nuna taja nunaka wii Yuus asan turattajai. 13Egiptonmaya ainan waittan suaknasha atumin jeen waitiri numpajai yakarmaun wainkan waitsuk nagkamaktatjai. 14Nu tsawanka pegkesha kajinmattsuk uwíjai metek tuke jiistamtinaittrume. Tura atumin uchiri ainasha tuke jiistamiartin ainawai. 15Tura nu jiistamkurum levadurajai pachimtsuk pan najanamu yusa pujusrum siete tsawan ejétinaitrume. Jiisat Pascua tutai tsawan tsawakaigka pan levadurajai pachimra najanamu akaigka yutsuk ajapatin ataarma tusam ujakarta, tusa Yuus Moisésan tinaiti.#Mt 26.17; Mr 14.1-2, 12; Lc 22.1-7; 1Co 5.7-8
16Nu tsawanka pegker asamtai ashi israelita ainatirmeka jiisat Pascua atin tsawarmataigka tura jiisat inagnamu tsawantincha wina emematrakrum tuke iruntsarmeke atinaittrume. Nu tsawantinka pegkesha takastin airpa, antsu jiistamkurum pujusrum yuatna nuke inareakrum takastin ataarma. 17Egipto nugkanam pujarmin nu tsawantin atumnaka jiirmiajrume, turamu asarum atumka tuke jiistamtin ataarma. Juka atum ainatirmesha tura atumi uchiri ainasha tuke jiistamiartin ainawai. 18Chiki chikichik uwítin yama nagkamchak nantun achiakaigka pan levadurajai pachimtsuk inaraamu yutai tsawan catorcetin etsa kiarai nagkamarum veinti uno tsawantin etsa kiarai inagnatarma. 19Jiistameakrum siete tsawan pujuttarum nuigka atumi jeenka levaduraka atsuttawai. Nu tsawantin chikich shuarkesha tumachkusha israelitaksha pan levadurajai pachimra najanamun yuakka jiiki ajapeam atatui. 20Turam aij takurmeka atum tui pujusrumek jiisat Pascua jiistamatnuk ainarum nuigka levadurajai pachimra najanamuka yuatin airpa, tusa Yuus tinaiti.
Jiisat Pascua tsawarmau
21Moisés shuaran israelita apuri aina ikankata tusa akupkauwaiti. Turam ikankamtai Moisés nitan chicharuk: Wetarma, tumarum ashi uun ainatiram chiki chikichkitiram chikichik cordero turachkurmesha cabra aishmag tsakat akanka juki atumi jeen apujsamu jukirum itatarma. Turarum Yuus numpajai shuar ainatin uwemtikramratin asamtai, etsa kiarai jiisat Pascuatin yuatin maatarma. 22Turakrum tagku numpegka tazónnum jukitarma. Turarum númi hisopo tutai kanawe aina jukirum numpanam ajugkrum numpa amajsarum waiti yantame ainaka ashi yakartarma. Nu kashi atata nuigka eke tsawatsaigka chikichkitirmeksha aagka jiinkirpa. 23Nayaimpinmaya shuar Egiptonmaya uchi aishmag yama nagkamchak akiinkaru ainan ijinkusha atumin jeen waitiri numpajai yakarmaun wainak waitsuk yakig nagkamaktatui. 24Nu tsawanka pegkesha kajinmattsuk uwíjai metek tuke jiistamtinaittrume. Tura atumin uchiri ainasha tuke jiistamiartin ainawai. 25Yuus atum pujustinan nugkan anajmatramawa nui jearum pujakrumsha, ju jiistaka tuke inagkaitin ataarma.
26Atumi uchiri aina chichainak: ¿Ju jiistatincha urukamtai tagku maarsha yuaji? tusa ininmainakaisha, 27atum ayakrum: Ju tagku maar yuaj juka numpajai Yuus uwemtikramrau asamtai, nu enentaimtuinakur jutikaji. Nayaimpinmaya shuar Egiptonmaya uchi aishmag yama nagkamchak akiinkaru ainan ijinkusha israelita ainatin jeen waitiri numpajai yakarmaun wainak waitsuk yakig nagkamakna nuu tsawan asamtai Yuus emematkur juniaji, tusarum titin ainarme, tusa tinaiti. Nuna antukar israelita aina Yuusan emematainak tsuntsumawaru ainawai. 28Moisés Aarónjai israelita apuri ainan Yuus timaun ashi ujakaruiti. Turawaram timaun metek uminak, tsawan jeaamtai chiki chikichik jeentin aina, tagkun maawar nuna numpejai jeen waitirin yakararuiti.
Uchi iwairi aishmag aina tura tagku aishmag yama nagkamchak akiinkaru aina jinaamu
29Egiptonmaya uchi aishmag iwairi ainan, faraónka uchiri aishmag iwairi apu jastasa pujaun, shuar cárcelnum egketun uchiri aishmag iwairin tura tagku aishmag yama nagkamchaku petsakmau ainancha ijinati tusa, ni turatin tsawan jeamtai nayaimpinmaya shuaran káshi ajampek, Yuus akupkauwaiti. Turam Egipto nugkanam jea waitiri numpajai yakarchamu ainan iis, wayaa uchi iwairi ainan, tura tagku yama nagkamchaku petsakmau ainancha ijinawaiti. 30Turamtai nu kashitin faraón, nijai takau aina tura ashi egiptonmaya ainajaimak nantarar wake mesemar nekapenak útainak senchi pampaina. Egiptonmagka uchi aishmag iwairi ainaka chikichik jeanmayagsha juakchauwaiti.#He 11.28
31Tumainakai faraón tura nijai takau ainajai, nu káshia nuig shuaran Moisés Aarónjai utitarma tusa akupkauwaiti. Turam juki itarmatai faraón nitan chicharuk: Yamaika nuwartuk, uchirtuk, wári jiintrarum wetaarma. Tumarum atum timarum turusrumek Yuus atum umirtai ememattarma. 32Nuiyasha atum wakerimarum tumasrumek atumi ovejari aina, vaca aina tura burro ainasha yaruakrum wetaarma. Tumakrum winasha Yuus aujtursatarma, tusa tinaiti.
33Egiptonmaya aina israelita ainan ina nugken pujuina nuna wári jinar wenachkaigka ashi jinawaij tusar ashamaina asar, jiintrarum wári wetaarma tusar imatruina. 34Israelita aina harina nanekmau levadurajai pachimrachmaun, harina egkea namutaijai irumar jaanchrijai pempearar yanakiar jukiaruiti. 35Tura nuiyasha Moisés turatarma timau asar, egiptonmaya ainan: Warí orojai najanamu ainan, kuit tutaijai najanamu ainan tura jaanch ainancha seawar yarutkaru ainawai. 36Yuus egiptonmaya ainan pegker enentaimtikrauwaiti. Turamu asar israelita aina warí ainan seamainakai suinak nitaka ishichik warijaig juakaru ainawai.
Israelita aina Egipto nugkanam pujuina jintramu
37Israelita aina yaakat Ramsésnum pujuina jiintrar nugka Sucotnumani wearu aina nuka, nuwa aina tura uchi ainasha nekapmatsuk aya untak nekapmaram seiscientos mil ajakaruiti. 38Israelita aina jiintrar wenakai, chikich shuar ainasha nitajai iruuntrar wenak, oveja ainan tura vaca ainancha nukap yaruakaru ainawai. 39Egiptonmaya aina nita nugkenia jiiki akupeamu asar, nita yumaintri yurumak inarmain tsawan atsursaru ainawai. Turamu asar harinan Egiptonmaya jukimujai tortan levadurajai pachimtsuk inarkaru ainawai. 40Israelita ainaka Egipto nugkanam cuatrocientos treinta uwí pujusaru ainawai. 41Cuatrocientos treinta uwí ejeawaru aina nu tsawantinig israelita aina, Egipto nugkanam pujuina jiintraru ainawai. 42Nu káshi asauwa nuigka Yuus israelita ainan Egipto nugkanam pujuinan jiirtin asa kuitamkauwaiti. Tuma asamtai atakea nuisha atumi uchiri aina tura nuna uchiri artina nusha nu káshia nuigka Yuus Egipto nugkanam pujarin jiirmaruitaj nuna enentaimtuinak kanutsuk tsawaitin ainawai.#Ex 12.46 Turasha ukunchinka kupirkacharti.#Jn 19.36 43-51(-)
S'ha seleccionat:
Éxodo 12: hubDBL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2010, Wycliffe Bible Translators, Inc. All rights reserved.