Éxodo 11
11
Egiptonmaya uchi iwairi aina tura tagku yama nagkamchak akinkau aina jinattawai tusa timau
1Yuus Moisésan chicharuk: Faraónkan tura ashi egiptonmaya ainan waittan susartataj nu eke chikichik awai. Nu waitat susamka wearti tusagka ayatkika turamchattarme. Antsu ima nigki jiintrarum wetaarma, tumarmeka atak waketkirmeka tawairpa, tusa turamtatrume. 2Turasha eke Egiptonmaya jiintsuk israelita aishmag aina tura nuwa ainasha umintsarti tumainak, egiptonmaya aishmag ainan nuwa ainan nitajai irutkau pujuinan warí orojai najankamu ainan tura kuit tutaijai najanamu ainancha seawarti, tusa tinaiti.
3Yuus egiptonmaya aina israelita ainan wait anentrarti tusa pegkernum enentaimtikrauwaiti. Nuiyasha faraónjai takau ainasha tura ashi egiptonmaya ainaka nitan nagkasau senchirtin Moisésan iisaruiti. 4Moisés faraónkan atak waketkinka tashtatjai, tusa tinaitak faraón pujamunam ataksha waketki jeawaiti. Tuma faraónkan chicharuk: Yuus chichaak, chikichik káshi ajampek jasa ai ashi jea Egiptonam iruna nuna waintawartatjai turamui. 5Wii jeanam wayakai chiki chikichik egiptonmaya uchi aishmag yama nagkamchak akinkau ainaka jinattawai. Faraónkan uchiri aishmag yama nagkamchak akina apu jastasa puja nu, nuwa inatai araka jigkai nekeetai ukurin puja nuna uchiri yama nagkamchak akinawa nusha jakattawai. Tura tagku aishmag yama nagkamchak akiinkaru aina nusha ashi jinattawai. 6Nu tumakai egiptonmaya ainaka wake mesemar nekapenak shir senchi útiartatui. Yaunchuksha tumachmaun tura atakea nuisha tumachtinan shir senchi waittsartatui.
7Tura israelita ainatirmeka egiptonmaya ainajaigka metekchau asaakrumin atumi uchiri aishmag iwairi ainaka tura atumi tagkuri aishmag yama nagkamchak akinkaru ainasha chikichkiksha jakashtatui. Tura chikichik yawagkesha jiakratkashtatui. 8Apu shuar aina amijai takau aina pujuina juka nu tumakai wika tatsaig nitak tawar tikishmatrurar chichartuinak: Yamaika jui pujutsuk ame, tura amina pataim ainajaimak jiintrarum ashi shiaktarma tusa turutiartatui, tusa Moisés kajek faraón pujamunmaya jiinki wuwaiti. 9Tuma nukap tsawan pujus Yuus Moisésan chicharuk: Apuka atum tusa ujamsha nekaspapita turamchattarme. Tumakai yaunchuksha wainkachmau ainan wii nitan iwaintukartatjai, tusa tinaiti.
10Moisés Aarónjai faraón pujamunam wearu ainawai. Tuma jeawar, Yuus turatarma tusa timaun faraón wainai yaunchuksha wainkachmau ashammain ainan iwainakaruiti. Turasha faraónka Yuus enentaimkachu amajsamu asa israelita ainan jiintrar wearti, tusa tichauwaiti.
S'ha seleccionat:
Éxodo 11: hubDBL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2010, Wycliffe Bible Translators, Inc. All rights reserved.