MATEO 28
28
O Jesu ki mauri aporo
(Mk 16.1-10; Lk 24.1-12; Jn 20.1-10)
1I murina na Tangiana ni Mamaroha, igê na mahogohogotana na Sate, ka Maria Matalena ma tani ka Maria karu râ, karu rigia na matiku. 2Ki parama, ma ki nunu raha. Na angero iana na Araha, i râ me tenia God, ki purisia râ na purupuru na hê, ma ki oga so igê. 3Na bâbâhana ki bâ manga na marangeia, ma na tuguni iana ki siki ahuru ngavê. 4Na mane ni me, ga anumasia na matiku, ka bubununuga, ka tata ma ka bagamame.
5Na angero ki tamasi tangarerua na gete, ki vi: “Siana kamuru magu. Inê kê bani girara, vi igamurua kamuru bâbâ renia o Jesu, ga bani rapusia igê na kuruse. 6Ngaia ki mareha ikê. Ngaia ki bani mêri aporo, manga i bani visia. Muru arâ me ikê, ma kamuru rigia na agua, i tâ igê. 7Hoi, muru râ rêrê ma kamuru hagarongora na kariana, kamuru vivi, ‘Ngaia ki bani mêri aporo tenia na mera, ma i ngekê ngaia ki nanago tarami i Galilea, ma i ngekana igamu kamu page bâsia igê.’ Ngaia ma ngekê na marâ, gê obania, vi gê hagarongogamurua renia.”
8Ngekana ngairerua karu hatani pania na matiku. Henaka vi ngairerua karu magu, ma ngairerua karu vagevage bâraha nikâ, ma karu tango, hanana vi garu hagarongora na kariana.
9Ki parama o Jesu, ma ki râ me vurusirerua, ma ki vi: “Na marapeha henigamurua.” Ngairerua karu ura me i pasina, karu susure i maana, ma karu ruigi na êgana. O Jesu ki vi tangarerua, ki vi: 10“Siana kamuru magu. Muru arâ ma kamuru hagarongora na goaku, ka arâ i Galilea, ma i ngekana ngaira ka page bâsiê igê.”
Na mane ni me ka hagarongo
11Matena garu bani râ na gete ngegana, tani na mane ni me, ga anumasia na matiku, ka aporo i hinua raha ma ka hagarongora na mane ni vogasiha ga teha renigi na ara ni marâ, ga bani vora me. 12Na mane ni vogasiha ga teha ma na meraha ka hekarigi ma ka harikato. Ngaira ka vatera na mane ni me na haga raha, 13ma ka vi tangara, ka vi: “Mu vivi, vi na kariana kaniga râ me igê na bungiana ma ka hanagoa na gahuana, matena mu mêru igamu. 14Manga vi na Gavumane, ma ki rongoa na tarana ngekê, igami kami page hagabeka, ki tangatanga monari. Manga ngekê, siana kamu takotako bâraha renia.”
15Na mane ni me ka tora na haga ma ka kato, manga hanana ga bonasira. Na hagaparunga ngekê ki râhira na Siu, ma ki mataro me i ngekê, na sihonga ngekê ki arâ mênga.
O Jesu ki vora tangara na kariana
(Mk 16.14-18; Lk 24.36-49; Jn 20.19-23; Tag 1.6-8)
16Na kariana tangahuru matare tage ka râ i Galilea tanga na hungana, i bani visia o Jesu tangara, vi ga arâ igê. 17Matena ga bâsia, ngaira ka bêtuhia, henaka tani na hitangita ka tako tugupu renia. 18O Jesu ki ura hagarangira, ma ki vi tangara, ki vi: “God ki bani kasiê, kê marungira na ara ni marâ hato i pasina ma i maveta. 19Hoita, mu arâ nga tangara na enoni hato i maveta hagenani, ma kamu hagesurira, ka voravora re na kariaku: mu hagabatesimora igê na raramohana Vaemana mo Karena ma na Higona Apu, 20ma kamu hagesurira, hanana ga arâ surigi na ara ni marâ, gê bani hagatoragamu renigi. Mu rongo! Inê be tamanigamu tare, mataro me na hatongina na maveta.”
S'ha seleccionat:
MATEO 28: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific