MATEO 27
27
Na Siu ka torea o Jesu i pasina o Pilato
(Mk 15.1; Lk 23.1-2; Jn 18.28-32)
1Matena i tangi mahogo, ngaira hato na mane ni vogasiha ga teha ma na meraha i pasita na Siu ka harikato, hanana vi ga hagamesia o Jesu. 2Ngaira ka rakua renia na seni ma ka torea vê, ka mahatangenia tanga o Pilato, na gavumane.
I me o Juta
(Tag 1.18-19)
3Matena o Juta, i bani hagavuringenia o Jesu, ki girara, vi ga bani suria o Jesu ki me, ngaia ki angi i parongana, ma ki toregi aporo na maani na haga tangahuru gi oru tangara na mane ni vogasiha ga teha ma na meraha. 4Ngaia ki vi: “Inê kê tasi, suria gê hagavuringenia na mane koro tanga na mera.” Ngaira ka arami, ka vi: “Ma ki vi gami hega? Igo ma!” 5O Juta ki arihatenigi na haga igê na agua apuna i Ruma ni Rotu, ma ki panira. Ma hemuri ngaia ki râ ki rigo.
6Na mane ni vogasiha ga teha ka ruguni na haga ma ka vi: “Na vatevate ngekê, ma na Ramata iaka i na Buka Apuna ka manimanigia, vi siana ka bagia henigi na haga tanga na Ruma ni Rotu.” 7Ngaira ka hekarigi, ma ngaira hato ka aganaria, hanana vi ga vuria renia na mako tenia na mane, i hagatotogi na apira na hê, hanana vi ga nahunia na matahuta na enoni mahuara. 8Tahema na mako ngekana ka hêtana renia vi na “Mako ni Gapu”, mataro me i ngekê.
9Vikê ngaira ka hagamonaria na tamasinga iana o Jeremia na poropete, i vi:
“Ngaira ka toregi na maani na haga tangahuru gi oru:
(na mena na Ai ni Isiraele ga bani naka tanga.)
10Ma ka vuria renia na mako tenia na mane,
i hagatotogi na apira na hê,
suria na Araha ki bani bonasiê renia.”
O Pilato ki hagatea o Jesu
(Mk 15.2-5; Lk 23.3-5; Jn 18.33-38)
11O Jesu ki ura i maana na gavumane, ma na gavumane ki hagatea, ki vi: “Na araha iata na Siu vari kanigo?” O Jesu ki arami, ki vi: “Ngaia kani go visia.” 12Ma ngaia ki pe aramira râ bê aporo rârâ na mane ni vogasiha ga teha ma na meraha, ga tuguria.
13Ngekana o Pilato ki vi tanga o Jesu, ki vi: “Go pe bani rongogi na ara ni marâ, ga visigi renigo?” 14Mo Jesu ki usi, vi ge arami bê aporo rârâ. Vikana na Gavumane ki kone bâraha.
Ga suria o Jesu ki me
(Mk 15.6-15; Lk 23.13-25; Jn 18.39, 19.16)
15Igê na ara ni Tangiani Raha na Paseka na Gavumane ki kasia hura tare tenia na ruma ni hagaitangiha na anima na enoni, na Siu ga atea. 16I na matena ngekana ki oga i ruma ni hagaitangiha ta na mane, na enoni ka bani girara. Ngaia ki no Jesu Baraba. 17Vikê matena na enoni ka haku me, o Pilato ki hagatera, ki vi: “O ti na hitangiterua kani mu obania, vi gê kasia hura tenia na ruma ni hagaitangiha: o Jesu Baraba, se o Jesu, ga hêtana vi o Kirisito?” 18Ngaia ki bani girara bâkoro, vi ngaira ka mahatangenia o Jesu tanga, suria ngaira ka hengari.
19Matena o Pilato ki oga so i ruma ni kotiha, kaniana ki kasi tamasinga me tanga, ki vi: “Siana ko bêbanu igê na tamasinga renia na mane koro ngekana; suria na maruteha iaku i na bungi inê kê hatamia bâraha na mamasiaganiha renia ngaia.”
20Na mane ni vogasiha ga teha ma na meraha ka vi tangara na enoni, ka nungia o Pilato, hanana vi kasia hura o Baraba, ma ki suria o Jesu ki meme. 21Ma na Gavumane ki hagatera, ki vi: “O ti na hitangiterua kani mu obania, vi gê kasia hura tangagamu?” Ngaira ka arami, ka vi: “O Baraba!” 22O Pilato ki hagatera, ki vi: “Ma o Jesu ga hêtana vi o Kirisito, kê henaka?” Ngaira hato ka arami, ka vi: “Rapusia igê na kuruse!”
23Mo Pilato ki hagate, ki vi: “Na marâ era ta kani erasia?” Ma ngaira ka haganega ka ngerengere raha ngavê, ka vivi: “Rapusia igê na kuruse!”
24O Pilato ki girara, vi bara tanga, vi ge katoa nikâ ta na marâ renia, ma na enoni ka haga ni katoa nga na perenga. Tahema ka torea me na ve tanga, ma ngaia ki tananigi na rimana i maata na enoni, ma ki vi: “Na mera iana na mane ikê ki pe takeê inê. Ma igamu ma hete!” 25Ngaira hato na enoni ka arami bê aporo, ka vi: “I koro ma i takegami, igami ma na karemami, na hagaitangiha renia na mera iana!”
26Ma hemuri o Pilato ki kasia hura o Baraba tangara; ngaia ki bonasira na mane ni me iana ka ramusia o Jesu, ma ki mahatangenia tangara, ka rapusia igê na kuruse.
Na mane ni me ka memarabe o Jesu
(Mk 15.16-20; Jn 19.2-3)
27Hoi, na mane ni me iana o Pilato ka mebanu o Jesu i ruma raha iana na Gavumane, ma na hakuta hagenani na mane ni me ka râ me, ma ka urarihia. 28Ngaira ka tasigi na gahu iana ma ka hagatugunia renia na gahu rotorotoaga memera. 29Ma ngaira ka hêria na mahe renigi na varo kakaruga ma ka bagia i bêna, ma ka vatea na vato, ki têa i rimana i otona; ma ka susure tanga ma ka kasi rurunga huria. Ngaira ka vi: “Mauru koro, Araha raha iata na Siu!” 30Ngaira ka musuria ma ka tavoa na vato ma ka tahurua na bêna renia. 31Matena ga memarabe hato, ngaira ka tasia râ na gahu tenia, ma ka hagatugunia aporo renigi na gahu iana marena. Ma hemuri ka mehura, hanana ga rapusia igê na kuruse.
Ga rapusia o Jesu igê na kuruse
(Mk 15.21-32; Lk 23.26-43; Jn 19.17-27)
32Ma i tara ngaira ka tarahua o Simone, na mane ni Sairini, ma ka bahenia me, ki torea na kuruse iana o Jesu. 33Ngaira ka mataro me igê na agua, ga hêtana vi Gologota, i vivi “Na Agua ni Ratana Bê”. 34Ma i ngekana ngaira ka hagatonomia o Jesu renia na vaini, ga bani toraria henia na marâ, i mahe. Ngaia ki namia anaki ma ki usitenia.
35Ngaira ka rapusia igê na kuruse. Ma hemuri ngaira ka tongani na gahu iana, ma ka pile taisi renigi, hanana ga girara, vi o ti kani nahunia na hitangini na gahu. 36Hemuri ngaira ka oga so ma ka bâsuria. 37I avorana na bêna ngaira ka naka na segesegeha, ga visigi igê na marâ, ga tuguria renigi. Na segesegeha i vi: “O Jesu ngekana, na Araha raha iata na Siu.” 38Hemuri ngaira ka rapusirerua na manero gi rua igê na kuruse, tani i otona o Jesu ma tani i mahana.
39Na enoni, ga heraonge i tara, ka babaringe ma ka guharia o Jesu. 40Ngaira ka vi: “Vego, go hogea na Ruma ni Rotu ma ko torea aporo surigi na tangiani gi oru! Gu hagatahigo so maremu, manga vi o Karena God kanigo! Gu so me tenia na kuruse!”
41Ma ka kato vikana nogata na mane ni vogasiha ga teha, na meraha, ma na mane ni hagesuringa ni rotu. Ngaira ka kasi rurunga huria, ka vi: 42“Aige, ngaia ki bani hagatahira na enoni getera, ma ki asa iana, vi ge hagatahia so marena! Ngaia ki na Araha raha ni Isiraele iê? Manga vi ngaia, ma ki soso me tenia na kuruse i ngekê, ua, igia ka kahu tongesuria! 43Ngaia ki hagêguritogo renia God, ma ki vi, vi ngaia ki no Karena God. Hoita, ge bâ, manga vi God ki obania, i hagatahia i ngekê!” 44Ma ngairerua na manero, ga rapusirerua henia o Jesu, karu guharia nogaterua.
I me o Jesu
(Mk 15.33-41; Lk 23.44-49; Jn 19.28-30)
45Igê na ritovagana na roto hono ki buhia na agua hagenani, rârâ mataro me ki pane na arito. 46Na ararina i pane na arito, o Jesu ki ngere raha, ki vi: “Eli, Eli, lema sabagatani?”, i vi, vi “God iaku, God iaku, renia ta ko paniê?” 47Tani na enoni, ga ura i ngekana, ka rongoa, ma ka vi: “E, ngaia ki avarasia o Elia!” 48Ta na hitangita ki gaha ototo râ, ki têa na rumurumu, ki anomia igê na vaini, ki naka igê na bogona na apinige, ma ki uhungia, vi hagatonomia o Jesu renia. 49Ma tani ka vi: “Gu naka noga, ke bâsia, manga vi o Elia ki arâ me ma ki hagatahia!” 50O Jesu ki ngere raha nikâ, ma ki me.
51Ma na gahu raha, i kuku i Ruma ni Rotu, ki tatari hagenani, ki so i gupu. Ma ki nunu, ma na hê ka apapa, 52ma na anoano ka avagavaga, ma ka rako era na kariana God, ga bani me, ka mêri aporo. 53Ngaira ka hurakê me tenigi na anoanota. Ma na matena o Jesu ki bani mêri aporo, ngaira ka banu i Hinua Apuna, ma i ngekana ka rako na ai i hinua, ga bâsira. 54Matena na maneraha iata na mane ni me ma na me iana, ga bâsuria o Jesu, ka hatamia na nunu ma ka bâsigi na marâ hato getigi, ga vora me, ngaira ka magu bâraha, ma ka vi: “I monari, o Karena God ngekana!”
55I ngekana ka rako na gete, ga bani takua o Jesu tenia i Galilea ma ka tamania. Ngaira ka ura hagatê, ma ka bâbâ râ. 56I berarogata ka oga ka Maria Matalena, ka Maria kenaterua o Jakobo mo Josepo, ma na kenaterua o karena o Sebeteo.
Ga naka o Jesu
(Mk 15.42-47; Lk 23.50-56; Jn 19.38-42)
57Matena i bungi me, ta na mane ruruguha i Arimatea ki ata me. Ngaia ki no Josepo, ma ngaia nikâ ki na kariana o Jesu. 58Ngaia ki râ i pasina o Pilato, ma ki nungia renia na gahuana o Jesu. O Pilato ki bonasira na mane ni me iana ka vatea o Josepo. 59Vikana o Josepo ki torea ma ki baraia renia na gahu haoru, i siki. 60Ma ngaia ki bagia na gahuana igê na matiku iana marena, ga kahu karua ma igê na hê. Hemuri ngaia ki purisia na apena na bagahê raha tanga na maana na matiku, ma ki songoa renia, ma ki râ pania. 61Ka Maria Matalena ma tani ka Maria karu oga so i ngekana, karu maatia na matiku.
Na mane ni me ga anumasia na matiku
62Igê na tangiana i muri, i murina na tangiana ga hagarêa igê na Tangiana ni Mamaroha, na mane ni vogasiha ga teha ma na Pariseo ka metamasi o Pilato. 63Ngaira ka vi: “Araha, igami kami girara, matena i mauri mênga na mane ni hagaparunga ngekana, ngaia ki vi, ‘Inê kê page mauri aporo i murini na tangiani gi oru.’ 64Tahema, gu bonasira na mane ni me, ke anumasia maninga na matiku, mataro me igê na oruta na tangiana, i era ma na kariana ka râ ka hanagoa, ma ka hagarongora na enoni, vi ngaia ki mêri aporo tenia na mera! Manga ngekana, na hagaparunga ngekê ki page era ngavê teharia na ani i nago.”
65O Pilato ki vi tangara, ki vi: “Mu merarâ na mane ni me, hanana ga anumasia na matiku igê na tarana, mu takusia, vi i koro.” 66Vikana ngaira ka râ tanga na matiku, ma ka naka na giraraha igê na purupuru na hê, ma ka nakara so na mane ni me, hanana ga anumasia.
S'ha seleccionat:
MATEO 27: KCB
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2011 Bible Society of the South Pacific