Isaías 10
10
1¡Ay, imaynaraq kankichik,
mana allin kamachikuykuna decretaqkuna,
ñakarichinaykichikpaq kamachikuykunata qellqaqkuna!
2Qamkunaqa wakchakunatapas manam nanachikunkichikchu,
llaqtaypi ñakariqkunapaqpas manam allin arreglotaqa ruwankichikchu,
viudakunapa kapuqnintam suwakunkichik,
mana tayta-mamayuqkunapa kapuqnintam qechunkichik.
3¿Imatataq castigo punchawpi ruwankichik?
¿Karumantaraq sasachakuy hamususqaykichik punchawpi,
pimantaq yanapasunaykichikpaq hapipakunkichik?
¿Maypitaq qori-qollqekichikta saqenkichik?
4Preso pusasqakunawan kuska mana humillakuspaqa
wañuymanñam wichinkichik.
Chaywanpas Tayta Diosqa hinallam piñasqa kachkan
atiyninwan castigananpaq.
Runankunata Asiriawan castigananmanta
5 #
Is 14.24-27; Nah 1.1—3.19; Sof 2.13-15. ¡Ay, imaynaraq kanqa Asiria nacionpa reynin!
Payqa castiganaypaq makiypi kaspim,
piñakuyniytam makinman churani.
6Paytaqa kamachini,
mana kasuwaspa qepanchawaqniy llaqtapa contranpim,
piñachiwaqniy runakunamanta qori-qollqenkuta suwaspa qechumunanpaqmi,
callepi mituta hina sarumunanpaqmi.
7Chaywanpas Asiria nacionpa reyninqa
manam chaynatachu tantean,
sonqonpipas manam chaynatachu yuyaymanan.
Aswanqa achka nacionkunata tuñichispa chinkachiyllatam munan.
8Paymi nin:
Nacionkunapa reyninkunaqa nisqayta ruwaqkunallam.
9Ñoqapaqqa Calno llaqtapas Carquemis llaqta hinallam,
Hamat llaqtapas Arfad llaqta hinallam,
Samaria llaqtapas Damasco llaqta hinallam,
chay llaqtakunaqa vencenay llaqtakunallam.
10Achka-achka idolokunata yupaychaq nacionkunatam hapikuykurqani.
Jerusalén llaqtamantapas Samaria llaqtamantapas,
aswan achka idoloyuq nacionkunatam hapikuykurqani.
11Imaynam Samaria llaqtata chaynataq idolonkunatapas ruwasqayta hinam
Jerusalén llaqtata chaynataq idolonkunatapas ruwarusaq, nispa.
12Tayta Diosñataqmi Sión moqopi hinaspa Jerusalén llaqtapi
ruway munasqankunata tukuruspan,
Asiria nacionpa reyninta,
hatun tukuq kayninwan ruwasqanmanta,
alabakuspa, hatunchakuspa ruwasqanmanta
castiganqa.
13Asiria nacionpa reyninmi nirqa:
“Atiyniywanmi chaykunata ruwarqani,
yachayniywan hinaspa yuyaysapa kasqayraykum.
Nacionkunapa linderonkunatam asuchirqani,
qori-qollqenkutam qechurqani.
Ñoqaqa munaychakuq hinam
kamachiqninkutapas wischurqani.
14Qesanpi saqesqa runtukunata hurqochkaq hinam
runakunapa qori-qollqenta hapikuykuni,
Mana pipa sayapakusqantam llaqtakunapi munaychakuruni,
manam pipas rapranta kicharirqachu
manataqmi tuspakunta kicharispa chilakyaqpas karqachu”, nispa.
15¿Yaqachu hacha alabakunman paywan kuchuqmanta masta?
¿Serruchopas hatun tukunmanchu paywan kuchuqninpa contranpi?
¿Kaspimanta tawnaqa yaqachu kamarachinman apaqninta?
16Chayraykum Tukuy Atiyniyuq Diosqa
kallpasapa runankunata eqoyachinqa,
hatu-hatunllaña kaynintam
lenwachkaq ninawan hina ruparachinqa.
17Israelpa achkiqnin Tayta Diosmi
lenwachkaq ninaman tikrakunqa,
huk punchawllapi ruparuspam
nacionpi tukuy rikchaq kichkakunatawan qorakunatapas chinkarachinqa.
18Sumaqllaña montekunatawan
tukuy imapa wiñanan chakrakunatapas
pasaypaqtam chinkarachinqa,
manaña kallpayuq onqosqa runata hinam saqerunqa.
19Montepi sachakunapas asllañam puchurunqa,
warmapapas yupanallanñam kanqa.
Israelmanta puchuqkunamanta
20Chay tiempopiqa, Israel castakunamanta puchuqkunapas,
Jacobpa mirayninkunamanta lluptiqkunapas
wichichiqninkupiqa manañam hapipakunqakuñachu,
aswanqa Señorllapiñam hapipakunqaku,
Israelpa Chuya Diosllanpiñam hapipakunqaku.
21Jacobpa castanmanta as puchuqkunallam
Atiyniyuq Diosman kutirikunqaku.
22Israel miraykuna,
qamkunamanta lamar qochapi aqo hinaña kachkaspapas,
asllañam kutimunqaku.
Citasqañam kachkankichik allin arregloman hina
chinkachisqa kanaykichikpaq.
23 #
Ro 9.27-28. Tukuy Atiyniyuq Tayta Diosmi
tantearun chayna chinkachiytaqa.
Imam tanteasqantaqa lliw nacionpim ruwanqa.
24Tukuy Atiyniyuq Tayta Diosmi kaynata nin:
Sión moqopi yachaq llaqtalláy,
Asiria runakunataqa ama manchakuychikchu,
Egipto runakuna hina tawnawan waqtasuptikichikpas.
25Manapas unaymantam contraykichikpi piñakuyniy tukurunqa,
piñakuyniyqa enemigoykikunatañam pasaypaqta chinkachinqa.
26Tukuy Atiyniyuq Tayta Diosmi
Asiria nacionta castiganqa,
Madián runakunata Oreb sutiyuq qaqapi
castigasqanta hina.
Egipto nacionmanta hamusqanku ñanpi
lamar qochapa hawanman tawnan
hoqarisqanta hinam castiganqa.
27Chay punchawpim wasaykiman llasaq qepi
churkususqayki qechusqa kanqa,
servichikusunaykipaq matankaykiman yugo churasusqaykipas
pakisqam kanqa,
qamqa akllakusqay llaqtay kasqaykirayku.
Asiria tropakuna hichpamusqanmanta
28Enemigom Ajat llaqtaman chayaramun,
Migrón llaqtakamam pasaramun,
Micmas llaqtapim tropanta yupaykun.
29Mayuta chimparuspam Geba llaqtapi samarunku,
Ramá llaqtapi runakunam katkatatachkanku,
rey Saulpa llaqtan Gabaapi kaqkunam ayqekuchkanku.
30Galim llaqtapi warmikuna qapariychik,
Lais llaqtapi yachaqkunapas uyarinankukama.
Anatot llaqtapi yachaqkuna ¡imaynaraq kankichik!
31Madmena llaqtamantam lluptiypawan lloqsinku.
Gebim llaqtapi yachaqkunam pakakuchkanku.
32Kunanpunim enemigoqa Nob llaqtapi samaykun,
Sión llaqtatawan Jerusalenta atacananpaqmi makinta hoqariykun.
33Tukuy Atiyniyuq Tayta Diosta qawariychik,
manchakuypaq atiyninwanmi sachakunata kallmanqa,
hatunnin sachakunatam kuchunqa,
takyasqa sachakunatam pampaman kumparunqa.
34Montey-montey sachakunatam hachawan chaqorunqa,
Líbano orqom qaparillawanña wichinqa.
Chuya Qellqa Revisión @ Sociedad Bíblica Peruana, 2012