2 Ko 9
9
1Chirix li tenq'aal a'in cho'q reheb' laj santil paab'anel tz'aqal xintz'iib'ak eerik'in, 2xb'aan naq ak ninnaw naq chi anchal eech'ool nekeraj xtenq'ankileb'. A'an a'in li ninnima wi' wib' chiruheb' laj Macedonia. Xinye reheb' naq ak laa'ex aj Akaya chalen junhab'er ak kawresinb'ilex chi xtenq'ankileb' laj santil paab'anel. Ut naab'aleb' aj Macedonia xe'eek'asiik xch'ool xb'aan leerahom.
3Ab'anan nintaqla anaqwan laj Tito ut eb' li wiib' chi qiitz'in re naq li k'aru naqanima wi' qib' cherix laa'ex ink'a' chikanaaq chi maak'a' rajb'al. Kama' ak xinye eere, yo'oon wanqex chi yaal. 4Mare anchal eb' laj Macedonia te'xik wochb'een ut toxextaweb' chi ink'a' kawresinb'ilex; chi jo'kan xutaanal tookanaaq xb'aan naq xqanima qu cherix. Yal ink'a' nawaj xyeeb'al naq laa'ex xutaanal texkanaaq.
5Jo'kan utan, xink'oxla naq tento xtz'aamankil chiruheb' li qiitz'in a'an naq che'xikaq eerik'in xb'enwa, toj moqon tinxik laa'in, re xkawresinkil leekub'siil ak yeechi'inb'il eeb'aan. Chi jo'kan yo'oon wanq jo' tz'aqal mayej ut ink'a' jo' yal k'eeb'il xb'aan xpixil eech'ool.
Li usilal li taachalq sa' xk'ab'a' li kub'sink
6K'ehomaq reetal: li ani b'a'b'ay ajwi' naraw, b'a'b'ay ajwi' tixq'ol; ut ani na'awk chi yo'oon, yo'oon ajwi' tixq'ol. 7Li junjunq chixk'ehaq jo'nimal na'alaak sa' xch'ool, ink'a' chi ka'b'rix xch'ool chi moko chi minb'ilaq ru, xb'aan naq li Yos naxra li nasihok chi sa sa' xch'ool.#9,7 Cf. Pr 11,24-25; 19,17; 22,8. 8Li Yos wank xwankil chenujob'resinkil rik'in chixjunil li rusilal re naq maajun sut texwanq sa' majelal ut texruuq ajwi' xb'aanunkil chixjunil li chaab'il k'anjel chi yo'oon rik'in li k'aru na'ela'ank cheru, 9jo' tz'iib'anb'il sa' li Santil Hu:
“Kijek'ink ut kixk'e reheb' li neb'a';
li xtiikilal xch'ool wanq chi junelik”.#9,9 Sal 112,9.
10Li nak'ehok iyaj re laj awinel jo'wi' li wa re tzekaak, tixk'e ajwi' eeriyaj ut tixtamb'resi; tixk'ihob'resi li naruuchin li xchaab'ilal leech'ool.#9,10 Cf. Is 55,10; Os 10,12. 11Jo'kan naq b'ihomaqex rik'in chixjunil re naq chexsihinq chi yo'oon. Ut naab'aleb' ajwi' li te'b'anyoxinq chiru li Yos sa' xk'ab'a' li tenq'aal li xetaqla chiqix.
12Xb'aan naq rik'in xb'aanunkil li santil k'anjel a'in moko ka'aj ta wi' taak'eemanq reheb' laj santil paab'anel chixjunil li neke'raj ru, taa'eek'asiiq aj b'an wi' xch'ooleb' chi yoxink chiru li Yos chi anchaleb' xch'ool. 13Naq te'xk'e reetal li k'anjel a'in, te'xnima xloq'al li Yos, xb'aan naq taak'utunq naq laa'ex nekepaab' li xChaab'il Esil li Kriist, li nekech'olob'. Te'xnima ajwi' ru li Yos xb'aan naq xexkub'sink chi yo'oon cho'q reheb' a'an ut reheb' chixjunil. 14Te'tijoq cherix ut te'xk'ut chanru nekexraheb' sa' xk'ab'a' li rusilal li Yos li xhoye'k sa' eeb'een chi numtajenaq.
15B'anyox re li Yos! K'ajo' xnimal li xsimaatan,#9,15 Li xnimal xsimaatan a'an xb'enwa li tenq'aj ib' sa' xyanqeb' li Iklees li kik'utunk rik'in li kub'sink cho'q reheb' laj santil paab'anel. ut maa'ani truuq xch'olob'ankil li rusilal!
S'ha seleccionat:
2 Ko 9: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.