2 Ko 8
8
Li xchaab'ilal xch'ooleb' laj Macedonia
1Ex was wiitz'in, anaqwan naqak'e chenaw li rusilal li Yos k'eeb'il reheb' li Iklees sa' xteepal Macedonia:#8,1 Cf. 1 Ko 16,1. 2us ta q'axal xe'yale'k rix xb'aan li rahilal xe'xk'ul, ab'anan q'axal numtajenaq li xsahilaleb' xch'ool, ut li xnimal xneb'a'ileb' xk'ihank cho'q b'ihomal xb'aan xchaab'ilal xch'ooleb'. 3Laa'in ninye chi yaal naq xe'kub'sink rik'in jo'ch'inal jo'nimal wank reheb', ut yo'oon chik xe'xk'e chiru li xe'xkuy raj xb'aanunkil, chi yal xchalk sa' xch'ooleb'; 4xe'xtz'aama ut xe'relaji chiqu li usilal a'in, li okenk chi k'anjelak chirixeb' laj santil paab'anel.#8,4 A'aneb' laj paab'anel aj Jerusalén.
5Ut moko ka'aj ta wi' xe'xb'aanu jo' chanru naq xqak'oxla laa'o, xe'xq'axtesi aj b'an wi' rib'eb' xb'enwa chiru li Qaawa' ut moqon chiqu laa'o sa' xk'ab'a' li Yos. 6A'an rajb'al naq xqatz'aama chiru laj Tito, jo' naq xtikib' junxil, jo'kan ajwi' naq chixraq sa' eeyanq li chaab'il k'anjel a'in.
7Laa'ex xo'numtaaq eerik'in chixjunil: leepaab'aal, leeraatin, leek'a'uxl, chixjunil li chaab'ilal jo'wi' li rahok li xqak'ut cheru. Jo'kan naq chinumtaaq ajwi' li chaab'il k'anjel a'in eerik'in.
8Ink'a' xinye a'in re eetaqlankil; ka'aj b'an wi' nawaj teenaw xchaab'ilaleb' xch'ool li junch'ol, re naq teek'ut naq laa'ex nekexrahok chi anchal eech'ool. 9Laa'ex nekenaw li xchaab'ilal li rusilal li Qaawa' Jesukriist: a'an b'ihom naq kiwank chaq, ut kineb'a'o'k sa' eek'ab'a' re naq texb'ihomo'q rik'in li xneb'a'il.#8,9 Cf. Mt 8,20; Fil 2,6-8.
10Chekuy inmaak, nawaj xk'eeb'al eena'leb' chirix a'in re eerusilankil. Chalen chaq junhab'er laa'ex li xb'enwa xetikib' li kub'sink, ut xeb'aanu ajwi' chi anchal eech'ool. 11Choyomaq b'i' xb'aanunkil li na'leb' a'in anaqwan re naq, kama' xeyoob' a'in chi anchal eech'ool, jo'kan ajwi' naq teechoy xb'aanunkil, a' yaal chanru naxk'e rib' cheru. 12Xb'aan naq wi wank k'aru na'alaak sa' xch'ool anihaq, a'an k'ulb'il chi chaab'il xb'aan li Yos sa' xk'ab'a' li jo'ch'inal jo'nimal wank re; ink'a' napatz'mank li maak'a' wank re.
13Moko ninye ta a'in re naq laa'ex ra wanqex ut eb' li junch'ol sa wanqeb', re b'an naq juntaq'eetaqex chejunilex sa' li na'leb' a'in. 14Anaqwan li xyo'oonil li k'aru eere laa'ex yo chi xtenq'ankileb' li wankeb' sa' rajb'al ru, re naq te'ruuq ajwi' eb' a'an chetenq'ankil naq wanqex sa' rajb'al ru, rik'in li xyo'oonil li k'aru reheb'. Chi jo'kan juntaq'eet wanqex, 15ut taatz'aqloq ru li tz'iib'anb'il sa' li Santil Hu: “Ani xxokok naab'al, maak'a' x'ela'ank chiru; ut ani kach'in ajwi' xxok, xtz'aqlok chiru”.#8,15 Ex 16,18.
Eb' li xtaql laj Pablo
16B'anyox re li Yos naq xreek'asi xch'ool laj Tito cheraab'al jo' naq q'axal nekexinra laa'in: 17xk'ul xch'ool li b'arwan xintz'aama chiru ut rik'in xnimal eeraab'al x'alaak sa' xch'ool xik eerik'in. 18Rochb'een a'an xqataqla li qiitz'in li q'axal napatz'mank xk'ab'a' sa' chixjunileb' li Iklees xb'aan li chaab'il k'anjel naxb'aanu chirix li Chaab'il Esilal.#8,18 Ink'a' naqanaw ani a'an. Mare a'an San Lukas. 19A'an xxaqab'aak ajwi' xb'aaneb' li Iklees cho'q qochb'een sa' li chaab'il k'anjel a'in li yooko chi xb'aanunkil re xnimal xloq'al li Qaawa', jo'wi' re xk'utb'al li naqeek'a sa' li qaanm. 20Chi jo'kan naqaj naq maajun yooq chi xwech'b'al rix xk'ihal li kub'siil a'in li yooko chi xk'anjelankil. 21Naqayal qaq'e chi xb'aanunkil li us, moko ka'aj ta wi' chiru li Qaawa', chiruheb' aj b'an wi' li tenamit.#8,21 Pr 3,4; Ro 12,17.
22Xqataqla ajwi' chirixeb' a'an jun chik li qiitz'in: k'iila wa xqak'e reetal naq a'an naxk'e xch'ool chi tz'aqal, ut anaqwan q'axal chik yalyo xq'e chi k'anjelak xb'aan naq kaw xch'ool cherix laa'ex.#8,22 Ink'a' naqanaw ani a'an. 23Laj Tito a'an wochb'een ut aj tenq' we sa' eeyanq laa'ex; ut eb' li wiib' chik aj paab'anel a'aneb' xtaql eb' li Iklees ut xloq'al li Kriist. 24Chek'utaq b'i' chiruheb' leerahom ut chek'utaq ajwi' xyaalalil li k'aru naqanima wi' qib' cherix chiruheb' li Iklees.
S'ha seleccionat:
2 Ko 8: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.