1 Ko 6
6
Li jitok rik'ineb' laj raqol aatin li moko xkomoneb' ta li Iklees
1Wi wank junaq sa' eeyanq wank xch'a'ajkilal rik'in jalan chik, ma truuq tab'i' taaxik rik'ineb' laj raqol aatin re li ruuchich'och' a'in? Ma ink'a' raj tento naq rik'ineb' laj paab'anel taaxik? 2Ma ink'a' nekenaw naq eb' laj paab'anel te'raqoq aatin sa' xb'een li ruuchich'och'? Ut wi laa'ex texraqoq aatin sa' xb'een li ruuchich'och', ma ink'a' tab'i' eek'ulub' raqok aatin sa' xb'een li kok' na'leb'? 3Ma ink'a' nekenaw naq tooraqoq aatin sa' xb'eeneb' li ánjel?#6,3 Mare a'aneb' li ánjel li ke'maakob'k (cf. Judas 5-6). Ma toja' ta chik ink'a' tqaraq aatin sa' xb'een li k'a'aq re ru re li ruuchich'och' a'in? 4K'a'ut naq nekexaqab' cho'q aj raqol aatin eb' li moko xkomoneb' ta li Iklees, naq wank junaq ch'a'ajkilal sa' eeyanq?
5Xk'utb'al eexutaan ninye wi' a'in. Ma maak'a' junaq sa' eeyanq wank xna'leb' re raqok aatin sa' xb'eeneb' li ras riitz'in? 6Laa'ex rik'in leerech aj paab'anelil nekejit eerib', ut a'an nekeb'aanu sa' xraqleb'aal aatin eb' li ink'a' neke'paab'ank.
7Wi nekech'a'ajki eerib' cherib'il eerib', naraj naxye naq toj maji' neketaw xyaalal. Ma ink'a' raj us naq xekuy li rahilal? K'a'ut naq ink'a' xekuy li elq'aak? 8Laa'ex b'an chik nekexrahob'tesink ut nekex'elq'ak, ut a'an reheb' leeras eeriitz'in nekeb'aanu.
9Ma ink'a' nekenaw naq li ink'a' tiikeb' xch'ool ink'a' te'reechani li xnimajwal awab'ejihom li Yos? Meeb'alaq'i eerib'! Eb' laj ko'b'eet aj yumb'eet, eb' laj loq'oninel li yal k'oxlanb'il yos, eb' laj muxul sumlaak, eb' li ixqiwinq, eb' li neke'xb'aanu li maa'usilal rik'ineb' li rech winqilal rech ixqilal, 10eb' laj elq', eb' laj rahinel ru b'ihomal, eb' laj kalajenaq, eb' laj majewanel, eb' laj maq'ol re ab'i e ink'a' te'reechani li xnimajwal awab'ejihom li Yos. 11Jo'ka'in naq xe'wank junjunq sa' eeyanq. Ab'anan xexch'ajob'resiik, xexsantob'resiik ut tiikob'resinb'il chik leech'ool sa' xk'ab'a' li Qaawa' Jesukriist ut rik'in xMusiq' li qaYos.
Li tz'i'b'eetalil b'aanuhom
12Wank neke'yehok: “Chixjunil naru ninb'aanu!”. Yaal a'an, ab'an moko chixjunil ta us xb'aanunkil. Chixjunil naru ninb'aanu, ab'an moko tink'e ta wib' rub'el xwankil junaq k'a' re ru. 13Wank ajwi' neke'yehok: “Li tzekemq cho'q re li sa'ej ut li sa'ej cho'q re li tzekemq!”, ab'an li Yos tixsach chi xkab'ichaleb' a'an. Li tz'ejwalej moko re ta li ko'b'eetak ut li yumb'eetak, re b'an li Qaawa', ut li Qaawa' cho'q re li tz'ejwalej. 14Li Yos li kiwaklesink re chi yo'yo li Qaawa', tooxwaklesi ajwi' chi yo'yo laa'o rik'in xnimal xwankil.
15Ma ink'a' nekenaw naq leetz'ejwal a'an xcha'al li Kriist? Ma tinchap tab'i' xcha'al li Kriist re xk'eeb'al cho'q xcha'al junaq aj yumb'eet? Maajoq'e b'i'an! 16Ma ink'a' nekenaw naq li naxlaq'ab' rib' rik'in junaq aj yumb'eet, jun aj chik chi tz'ejwalej nakanaak wi' rik'in? Xb'aan naq naxye li Santil Hu: “Junajeb' aj chik chi tz'ejwalej te'kanaaq chi xkab'ichaleb'”.#6,16 Gn 2,24. 17Ut li naxlaq'ab' rib' rik'in li Qaawa', jun aj chik chi musiq'ej nakanaak rik'in.
18Chetz'eqtaana li ko'b'eetak ut li yumb'eetak! Chixjunil li k'a'aq chik chi maakil tixb'aanu junaq winq, yal chirix nakanaak, ab'an laj ko'b'eet ut laj yumb'eet a' ajwi' li xtz'ejwal naxmux.
19Ma ink'a' nekenaw naq leetz'ejwal a'an rochoch li Santil Musiq'ej li wank eerik'in ut eek'ulum rik'in li Yos? Moko laa'ex ta yaal eere sa' eeb'een. 20Loq'b'ilex chi terto eetz'aq!#6,20 1 Ko 7,23; 1 P 1,18-19; Ap 5,9. Loq'onimaq b'i' li Yos rik'in leetz'ejwal.
S'ha seleccionat:
1 Ko 6: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.