1 Ko 5
5
Xq'usb'al li jo'maajo'il na'leb'
1Yalaq b'ar na'ab'imank resil naq wank li jo'maajo'il na'leb' sa' eeyanq, k'ajo' xyib'al ru a'an. Chi moko sa' xyanqeb' li maak'a'eb' xpaab'aal na'uxmank chi jo'kan! Wank jun sa' eeyanq li wank cho'q rixaqil li xkab' xna'!#5,1 Wank rik'in li xkab' na'b'ej, a'an ramro xb'aan xChaq'rab' laj Moisés (cf. Lv 18,8). Ramro ajwi' xb'aan xchaq'rab'eb' laj Roma. 2Ut laa'ex toj nekeq'etq'eti eerib'! Ma ink'a' us naq xraho'k raj leech'ool ut xerisi raj sa' eeyanq li xb'aanunk re a'an? 3Us ta maa'anihin sa' eeyanq chi tz'ejwalejil, ab'anan wankin eerik'in rik'in linmusiq'. Us b'i', chanchan wi' wankin sa' eeyanq, ak xinraqok aatin sa' xb'een li xb'aanu chi jo'kan: 4sa' xk'ab'a' li Qaawa' Jesus, jo'q'e ch'utch'uuqex ut linmusiq' wanq eerochb'een, rik'in xnimal xwankil li Qaawa' Jesus, 5q'axtesimanq li winq a'an sa' ruq' laj tza re naq taasachq li xtz'ejwal, ab'an chikole'q li xmusiq' sa' xkutankil li Qaawa'.
6Maak'a' xyaalal li xnimob'resinkil eerib'! Ma ink'a' nekenaw naq kach'inaq xyu li q'em naxsipob'resi chixjunil? 7Isihomaq sa' eeyanq li najter ch'amal q'em re naq laa'exaq ak'il q'em, xb'aan naq laa'ex li wa maak'a' xch'amal. Li Kriist, a' li qakarneer re li Paswa, kimayejaak.#5,7 Sa' xninq'e li Paswa eb' laj Israel neke'xtz'eq chixjunil li najter ch'amal q'em (cf. Ex 12,15), neke'xmayeja junaq karneer (cf. Ex 12,6) ut neke'xtzeka li wa maak'a' xch'amal (cf. Ex 12,18-20). 8Jo'kan utan, ninq'ehiqo ink'a' rik'in najter ch'amal q'em chi moko rik'in xch'amal li lab'al malaj li maa'usilal, rik'inaq b'an li wa maak'a' xch'amal, naraj naxye chi saqaq ru li qach'ool ut sa' xyaalal.
9Xintz'iib'a sa' linhu#5,9 A'an jun li hu li xsachk chiqu. naq meejunaji eerib' rik'ineb' laj ko'b'eet ut laj yumb'eet. 10Ab'anan ink'a' xinye: Tik ink'a' texwanq sa' xyanqeb' laj ko'b'eet ut eb' laj yumb'eet li wankatqeb' sa' li ruuchich'och' a'in malaj rik'ineb' laj rahinel ru b'ihomal, rik'ineb' laj elq', laj loq'oninel li yal k'oxlanb'il yos. Wi ta jo'kan, tento raj tex'elq sa' ruuchich'och'! 11Ink'a'! Li xintz'iib'a a'an a'in: Meejunaji eerib' rik'ineb' li “qas qiitz'in” neke'xk'ab'a'in, ut a'aneb' aj ko'b'eet, aj rahinel ru b'ihomal, aj loq'oninel li yal k'oxlanb'il yos, aj majewanel, aj kalajenaq malaj aj elq'. Chi moko chexwa'aq rik'ineb' a'an!
12-13K'a' tab'i' naq tinraqoq aatin chirixeb' li moko aj paab'aneleb' ta? A' li Yos taaraqoq aatin sa' xb'eeneb'. Ab'an laa'ex tento xraqb'al aatin sa' xb'eeneb' leerech aj paab'anelil. Jo'kan naq “isihomaq sa' eeyanq li ink'a' us xch'ool”,#5,12-13 Dt 13,6; 17,7; 22,21. chan li Santil Hu.
S'ha seleccionat:
1 Ko 5: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.