1 Ko 13
13
Li rahok a'an q'axal loq'
1Us ta ninnaw raatinob'aaleb' li winq ut eb' li ánjel, ab'anan wi ink'a' ninrahok, chanchanin jun li ch'iich' natzintzotk malaj junaq wajb' natzanb'ak xyaab'. 2Wi wank ta inmaatan re aatinak jo' propeet, wi ninnaw ta chixjunileb' li xmuqmuukil na'leb' li Yos ut chixjunil li k'a'uxl, wi ta tz'aqlojenaq ru linpaab'aal re xjalb'al xna'aj eb' li tzuul, ab'anan wi ink'a' ninrahok, maak'a' nin'ok wi'. 3Wi ta tinjek'i chixjunil linjunkab'lal reheb' li neb'a' ut tinq'axtesi ta wib' sa' xam, ab'anan wi ink'a' ninrahok, maak'a' ninra chirix a'an.
4Li rahok wank xkuyum sa' chixjunil; a'an chaab'il. Li rahok ink'a' nakaqalik, ink'a' naxk'e xwankil xjunes, ink'a' naxq'etq'eti rib', 5ink'a' naxb'aanu li ink'a' us, ink'a' naxsik' xchaab'ilal xjunes, ink'a' napo'k, ink'a' naxk'e sa' xch'ool li ink'a' us naxk'ul, 6ink'a' nasaho'k sa' xch'ool rik'in li xmaak'a'il li tiikilal, nasaho'k b'an rik'in li yaal. 7Li rahok chixjunil nariiqani, chixjunil naxpaab', chixjunil naroyb'eni, chixjunil naxkuy.
8Li rahok maajoq'e na'oso'k. Taaraqe'q li maatan re aatinak jo' propeet, taaraqe'q li maatan re aatinak sa' jalanil aatin. Taawulaq xq'ehil naq ink'a' chik taak'anjelaq li maatan re xtawb'al ru chixjunil. 9Xb'aan naq kach'in li qak'a'uxl ut kach'in ajwi' li naqanaw chi musiq'anb'il li qach'ool xb'aan li Yos. 10Naq tol'elq li tz'aqal yaal, taa'oso'q li ink'a' tz'aqal re ru.
11Naq toj ch'ina'alin chaq, nin'aatinak jo' li ch'ina'al, nink'oxlak jo' li ch'ina'al ut ninna'leb'ak jo' li ch'ina'al. Ab'an naq xinwinqilo'k, xintz'eq chirix linch'ool chixjunil li k'a'aq re ru re li kach'inal. 12Anaqwan nokoo'ilok yal jo' sa' junaq lem moymoy ru, ab'anan sa' jun kutan toxqaka'ya li Yos jo' tz'aqal chanru na'ilok. Anaqwan kach'in ajwi' ninnaw, ab'anan sa' jun kutan toxinnaw ru, kama' naq li Yos naxnaw wu.
13Anaqwan junelik xaqxookeb' li oxib' a'in: li paab'aal, li oyb'enink ut li rahok. Ab'an li q'axal nim xwankil sa' xyanqeb', a'an li rahok.
S'ha seleccionat:
1 Ko 13: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.