1 Ko 12
12
Li xmaatan li junjunq k'eeb'il xb'aan li Musiq'ej#12.1-31 Sa' xtiklajik li Santiklees wan naq nak'utunk xwankil li Santil Musiq'ej rik'in sachb'ach'oolej, ab'an ink'a' tz'aqal natawmank ru. San Pablo naxch'olob' b'ar wank li qamaatan k'eeb'il qe xb'aan li Musiq'ej ut b'ar ink'a' (12,4-30), k'a' aj e li maatan k'eeb'il xb'aan li Musiq'ej (12,4-30). Li apóstol naxterq'usi ajwi' xloq'al li rahok (13), naxye naq loq' ajwi' li aatinak jo' propeet (14,1-25) ut naxchaq'rab'iheb' laj paab'anel re naq chixjunil taa'uxq sa' xyaalal sa' li loq'laj ch'utub'aj ib' (14,26-40).
1Ex was wiitz'in, chirix li maatan naxk'e li Musiq'ej twaj teetaw xyaalal.
2Nekenaw chi us naq, jo'q'e maak'a' chaq leepaab'aal, nekek'e eerib' chi k'ame'k yalaq chanru chirixeb' li memil yos. 3Jo'kan naq nink'e chenaw naq maajun junaq li na'aatinak rik'in xMusiq' li Yos naru tixye: “Maa'usinb'ilaq taxaq li Jesus!”, ut maajun ajwi' naru tixye: “Li Jesus a'an li Qaawa'!”, wi ink'a' musiq'anb'il xb'aan li Santil Musiq'ej.
4Jalan jalanq li qamaatan, ab'an li Musiq'ej a'an ajwi'. 5Jalan jalanq li qak'anjel, ab'an li Qaawa' a'an ajwi'. 6Jalan jalanq li qab'aanuhom, ab'an jun ajwi' li Yos li naxb'aanu chixjunil rik'in chixjunileb'. 7K'eeb'il re li junjunq li xmaatan li nak'utunk wi' li Musiq'ej, re rusilankileb' chixjunil.#12,7 1 Ko 12,28-30; Ef 4,11; Ro 12,6-8. 8Wan xmaatani rik'in li Musiq'ej xnimal xk'a'uxl re aatinak; jun chik xmaatani aatinak chirix chaab'il k'a'uxl li nachalk rik'in ajwi' li Musiq'ej; 9wan chik xmaatani xpaab'aal, rik'in ajwi' li Musiq'ej. Wan k'eeb'il xmaatan re k'irtasink rik'in li jun chi Musiq'ej; 10wan chik xmaatani re xb'aanunkil sachb'ach'oolej; wan k'eeb'il xmaatan re aatinak jo' propeet; wan xmaatani xnawb'al ruheb' li musiq'ej; wan ajwi' xmaatani aatinak sa' jalanil aatin li ink'a' natawmank ru; wan chik k'eeb'il xmaatan chi xch'olob'ankil xyaalal eb' li aatin a'in.
11Ab'an chixjunil a'in a' ajwi' li jun chi Musiq'ej nab'aanunk re, ut A'an naxjek'i re li junjunq jo' chanru naraj.
12Jo' naq li tz'ejwalej junaj chirib'il ut wank naab'al li xcha'al, ut chixjunileb' li xcha'alil a'an us ta naab'aleb', ab'an jun ajwi' chi tz'ejwalej naq wankeb', jo'kan ajwi' li Kriist. 13Xb'aan naq kub'sinb'il qaha' rik'in jun chi Musiq'ej re xk'uub'ankil ru jun chi tz'ejwalej chiqajunilo laa'o, us ta aj judiiy malaj aj griego, eb' li loq'b'il moos ut eb' li ach'ab'anb'ileb'. Ut chiqajunilo xoo'uk'ak rik'in jun chi Musiq'ej.
14Jo'kan ajwi' li tz'ejwalej moko yal jun ta xcha'al wank, naab'al b'an. 15Wi ta li oqej tixye: “Laa'in maawa'in li uq'ej; jo'kan naq moko xcha'alin ta li tz'ejwalej”, ma maawa'aq tab'i' xcha'al li tz'ejwalej yal xb'aan a'an? 16Ut wi li xikej tixye: “Laa'in maawa'in xsa' uhej; jo'kan naq moko xcha'alin ta li tz'ejwalej”, ma maawa'aq tab'i' xcha'al li tz'ejwalej yal xb'aan a'an? 17Wi ta chixjunil li tz'ejwalej a'an xsa' uhej, chan raj ru naq too'ab'inq? Ut wi chixjunil ta xikej, chan raj ru naq taqutz' li k'a'aq re ru?
18Ab'anan li Yos kixk'e sa' xna'aj li junjunq chi xcha'al li tz'ejwalej, jo' chanru kiraj xch'ool. 19Wi ta chixjunileb' li xcha'al li tz'ejwalej junaj ta ru, b'ar raj wank li tz'ejwalej? 20Us b'i', naab'aleb' li cha'alej, ab'an jun ajwi' chi tz'ejwalej.
21Ink'a' naru tixye xsa' li uhej re li uq'ej: “Maak'a' nakat-ok wi' we!”. Chi moko li jolomej naru tixye reheb' li oqej: “Maak'a' nekex'ok wi' we!”. 22Ink'a', a'eb' b'an chik li xcha'al li qatz'ejwal li maak'a' neke'ok wi' naq naqak'oxla, a'aneb' li q'axal neke'k'anjelak. 23Eb' li maak'a'eb' xloq'al naq naqak'oxla, a'aneb' li q'axal raarookeb' qab'aan; ut eb' li xcha'al li qatz'ejwal li nokooxutaanak xb'aan, q'axal tiqtookeb' chi chaab'il qab'aan. 24Xb'aan naq eb' li qacha'al li ink'a' nokooxutaanak xb'aan, ink'a' neke'raj a'an.
Li Yos kixk'uub' li tz'ejwalej, ut q'axal chik xloq'al kixk'e reheb' li xcha'al li maak'a'eb' xloq'al, 25re naq maak'a'aq jachok ib' sa' li tz'ejwalej, chixjunileb' b'an li cha'alej te'xtenq'a rib' chirib'ileb' rib'. 26Wi ra naxk'ul junaq xcha'al li tz'ejwalej, chixjunileb' li cha'alej neke'raho'k rochb'een. Wi junaq cha'alej na'oxloq'iik, chixjunileb' neke'saho'k rochb'een.
27Laa'ex xtz'ejwal li Kriist, ut xcha'alex chejunjunqal. 28Jo'ka'in li Yos kixxaqab' xk'anjel li junjunq sa' li Iklees: xb'een xb'een eb' li apóstol, sa' xkab' eb' li propeet; sa' rox eb' laj tzolonel; chirix a'an k'eeb'il li maatan re xb'aanunkil sachb'ach'oolej; chirix chik a'an k'eeb'il li maatan re k'irtasink, re tenq'ank, re jolomink, re aatinak sa' jalanil aatin.
29Ma chixjunileb' tab'i' apostoleb'? Ma chixjunileb' tab'i' propeeteb'? Ma chixjunileb' tab'i' aj tzoloneleb'? Ma chixjunileb' tab'i' aj b'aanuhom sachb'ach'oolej? 30Ma chixjunileb' tab'i' k'eeb'ileb' xmaatan re k'irtasink? Ma chixjunileb' tab'i' neke'aatinak sa' jalanil aatin? Ma chixjunileb' tab'i' neke'xch'olob' xyaalal eb' li aatin a'in?
31Cheq'axtesi leech'ool chi xsik'b'al li xninqal ru eemaatan. Ut toj tink'ut cheru jun li b'e q'axal wi' chik chaab'il.
S'ha seleccionat:
1 Ko 12: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.