1 P 3
3
Is cuybanil eb yetbixa ba
1Ex istzilej, yikem che yut e ba bay e yichamil, yujtol ayex c'amto chi yaoc e yichamil c'ul yin k'anej Dios. Caxc'al c'am tzet ok e yal bay e yichamil tu', palta tekan ok monchaj oc eb e yuj. 2Yujtol ok yil eb tol tojol e beybal, cax tol caw wal chex xiw bay Dios. 3Ayokab e watx'il, palta manak e watx'nen aj e yili chi wala'. Manokab ayxa mayok che yut e xil. Manchak e yaoc e nabal yin ch'en oro che k'anbalnej, tamwal yin pichilej ayxa may tojol. Yujtol manak yetok juntzan tu' ok ex watx'jok ocok. 4Palta aokab e c'ulbal che yak' e yip e watx'nen ocok, yet watx', watx' e yili yul sat Dios. A watx'il e c'ulbal tu', c'am bak'in ok etaxtok. Tatol manso ex, tatol numumi ex, miman ton yelapnok yul sat Cham. 5A yet payxa, ay juntzan eb xal ix tol yet-xa Dios yayji. Watx' yili c'ulbal eb xal yul sat Cham, yujtol asan Cham yanak oc eb xal yipok is c'ul, cax yikemc'al max yut ba eb xal bay yichamil. 6Ilab xal Sara, yikemc'al max yut ba xal bay Abraham: Ach wetbi, ẍi xal bay.*fn* Watx'c'al che yut e nabal ayex ti' xin ex istzilej. C'amokab junok tzet bay chex xiw jabok. Ta axca tu', lajan e nabal axca xal Sara chi yal tu'.
7Ac'ala' c'apax ayex ex ichamilej ex ti', watx' che yut e c'ul yin e yistzil. Ojtaknejek elok, tol lajan eb ix axca junok vaso c'un poji. Ayokab yelapnok eb ix yul e sat, yujtol aj satakwom c'apax eb ix yin k'inalej max yak' Dios ayon yuj is watx'c'ulalil. Caytu' che yut e c'ul yin eb xin, yet watx' c'am jabok tzet chi tenon oc wanaj e txaj yetok eb ix.
Ay bay chi jil yailal yujc'al co watx' beybal
8Yetok c'apaxok, chi waltok junxa ti' ayex: tol jun lajanxanejokab chi jut co nabal co masanil. Tatol ay eb chi cusi, colwajokonek bay eb. Co camc'ulnelejek co ba, yujtol jet creyenteal co ba. Ok'okab co c'ul jin junjun on. Yaynakilokab chi jut co ba ayon junjun on. 9Ta ay eb yob chi yut ba ayon, manokab yobok chi jut co ba bay eb. Tatol ay eb chon buchoni, manchak on buchwaj yin eb. A ti jet, tol chi co k'an watx'c'ulalil Dios yiban eb. Yujtol awtebil on yuj Cham, yuj joccan yetok, yuj tx'oxon is watx'c'ulal ayon, 10yujtol tix wal yalon yul tx'an Un ti':
Ta ay mac chi yal c'ul chi najatilbi is k'inal, ta chi yochej tzalojc'ulalc'al chi ec' junjun c'u yuj, c'ayokab el aloj yobal k'anej. C'amokab chi yak' lek'tial.
11Besokab el ba bay yobtakil, axa watx'ilal chi yunej; c'amokab owal chi yunej, beybalnejokab junc'ulalil.
12Yujtol a Cham Jajawil, chi taynen eb anima watx' beybal, cax chi yacbaj txiquin yet chi yalon ba eb bay, palta ow chi yut Cham sat yin mac chi unen yobal, ẍi.
13Ta asan watx' beybalej chi el co beybalneni, ¿mactax junok ok ak'on yobtakil ayon? 14Palta ta chi jab yail yujc'al co watx' beybal, caw wal watx' jet. Yuj tu', manchak ex xiw yin tzet bay chi xiw eb, manchak e yak' somchaj el e nabal, ẍi tx'an Un. 15Jiek can Cristo Jajawilok. Co naek tol asanxanej oc Cham. Tx'ijanokabc'al chi jut co ba jalon yab mactaktxel chi k'anlej yab ayon tzet yuj xan chi jaoc Cristo yipok co c'ul. Yin mansoc'ulalil, c'al yin c'ununi k'anejal chi jut jalon bay eb. 16Ay eb chon buchon yuj co watx' beybal, yujtol ayoc Cristo yin co c'ul; palta watx' chi jut co beybal yet watx' c'am chon tzulay yuj yikbomal co nabal, xan a yet chon buchon eb, ok q'uixwok aj eb. 17Caw wal watx' ta chi jab yail yuj co watx' beybal, tatol axca tu' chi el yin c'ul Dios. Palta ta yuj co yob beybal xin, cax chi jaben yail, nabac'al toni.
18Yujtol asan junel max yab yail Cristo cam yuj co yobtakil. A Cham, caw wal watx' ton Cham. Ayon ti' xin, caxc'al man watx'ok on, palta max yab yail Cham juj, yuj con yion apnok Cham bay Dios. A is mimanil max cami, palta max ictzonelay pax aj yin yespíritu. 19A yespíritu tu', betnak ec' yalon el k'anej Dios bay is pixan eb presoxa yayji. 20A eb tu', man yikemok yutnak ba eb bay Dios yet yalantok yul tiempoal Noé. A yet jun tiempoal tu', mimanc'al max yut Dios is c'ul yin eb, yet max yechbanen watx'ji jun miman barco. A yul jun barco tu' max colchajcan el jaywan anima bay a' aej. Waxakwan eb max colchajcanok. 21A jun tzet ujnak tu', tx'oxbanilej yayji ocok, yujtol a yuj a' aej yet bautismo chon colchaj tinani' yujtol max ictzoj aj Jesucristo. A jun bautismo ti', man yopisook yion el tz'ilal co mimanil, palta a yuj tx'oxon el jochwan tol c'am chon tzulay yuj yikbomal co nabal satak Dios. 22Max paxaj Cham bay satcan. A tu' ayic' Cham bay watx' k'ab Dios tinani'. A' chi ikban eb ángel, yetok juntzanxa eb ay yikbej, c'al eb ay yipalil.
S'ha seleccionat:
1 P 3: ATBYK89
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Kanjobal (Q’anjob’al) © Sociedad Bíblica de Guatemala 1989