Romio 1
1
Subheccha
1Ingdo Khrisṭo Jisuren das, prerit hoʹ laʹte ingdo ṭâhu hokana. Ingdo Polkâning, Rom sohorren pâtyuonkhoiʹṭheʹ niâ ciṭhi olding.
Sanam âdmikoṭheʹ Issoraʹ manja khobor lâilaʹte ingdo aladaketeʹ bachongelidinge. 2Issor sedere niâ manja khobor pâhcugiriaʹ rikitkade. Issorte Aiʹren nâbiko beboharkaʹkoe jate Pobitro Sastrore Aiʹaʹ rikitnaʹ katha olako ar menako. 3,4Niâ manja khobordo hoʹkana aboren Issorren hopontetʹ Probhu Jisu khrisṭoaʹ. Ânido âdmi lakaketeʹ Dâudaʹ bongsore janamlene, ar Ânioaʹ nispap atta hate khoiʹ Ânido Pobitro attaoaʹ suktite goiʹ khoiʹ jiuitʹ rakabketeʹ Issorren hopontetʹ hisâbte sodorlene.
5Khrisṭo laʹte Issorte ingdo Preritaʹ niâ bises kâmi laʹte dayakâdinge, jate sanam jâtkoren âdmiko ingtedo pâtyu ar baddhotanaʹ ḍahartora idi darekoing. 6Angko âdmiko talare apeho menaʹpeya. Jisu Khrisṭoren âdmi hoʹ laʹte Issortigi ape ṭâhukaʹpeye.
7Rom shorren ekeko pobitro âdmi Issorte dulârkoe ar Aiʹren âdmi hoʹ laʹte ṭâhukaʹkoe
Aboren baba Issor ar Probhu Jisu Khrisṭote ape daya ar sânti mapemane.
Pol Romre caʹlaʹ namde.
8Palherigi ingte ape sanamkhoiʹ laʹte Jisu Khrisṭoaʹ talate ingren Issor dhonnobad maikâning. Karon Âni cetanre apeyaʹ pâtyunaʹ katha goṭa dhârtire pasnongekana. 9,10Ingâʹ sanam koijong somai ingte ape disâpeing. Issor baṛegie je niâ kathado sârigiâ. Ingdo Âniren hopontetaʹ manja khobor lâiaʹ talate attate Issoraʹ seoeing. Ingdo Issorṭheʹ sanam somai koijongding jate ape sanamkhoiʹṭheʹ ca darening, Issor judi moneye tahalekheʹgi ca dareninghâʹ. 11Ingdo ape saote napamoʹlaʹ namding, karon ingte ape âttiknaʹ dan mapelaʹ namding jate ape suktisâli darenape. 12Ananaʹ manedo niâkana, abo jate sanamkhoiʹgi miʹhoraʹ pâtyu khoiʹ armiʹhor hub namabo.
13Boiha ar mesrako, ing koing je ape baṛepe ingdo aima jhikâ apeṭheʹ caʹlaʹ kurumuṭukâding, kheʹ badha namkâding. Ingdo apeṭheʹ caʹlaʹ namkâding jate ape atta hatete hararakaboʹte goro darepeing. Eṭaʹonkhoiʹ Ojihudi âdmiko ingte alka gorokaʹkoing, engkagi ingte apeho goropelaʹ namding.
14Ingdo Grikren âdmikâning sanamkhoiʹaʹ seoelaʹ baddhogiying, sobbho se osobbho, geni se bemaʹ. 15Niâ laʹtigi Romre apeṭheʹ manja khobor lâi laʹte ing nâniʹ agroholining.
Manja khobornaʹ sukti
16Manja khobor laʹte ingdo gorboʹing. Manja khoborgiâ ana sukti, akaṭaʹ suktitedo Issor Aiʹren pâtyuonkhoiʹ bacokoe, Palheredo Jihudiko ar tayomtedo Ojihudiko. 17Alkate Issorte âdmiko Aiʹ nijeṭheʹ atanglakakaʹkoe, anado niâ manja khobornaʹ talatigi uduʹ hokana. Palhe khoiʹ mucitʹ dhâbiʹ pâtyunaʹ talatigi âdmi Issorṭheʹ nirdos mente atangkanako. Sastro alka mene, "Pâtyunaʹ talate eke dhârmikgie ânido ononto jiui namheʹ."
Sanamkhoiʹgi onnaikadako
18Issoraʹ edre sorgo khoiʹ sodoroʹkana sanam lakanaʹ pap kâminaʹ ar angkoko âdmiaʹ biruddhe ekeko kharap kâmite sâriaʹ dapal doheyako. 19Karon Issor somporke akako baṛe jutuʹa anako angkodo manjatigi baṛekadako karon Issorte angko uduʹkaʹkoe.
20Issoraʹ akako gun metʹte bang lel namoʹa, mane Ânioaʹ jaijugnaʹ khomota ar Issorio sobhab sirjunaʹ ehob khoiʹ manjatigi lelnamkana. Ânioaʹ sirju khoiʹgi âdmido manjate bujhu dareʹako. Niâ tayom khoiʹ âdmite Issor bang baṛeyaʹ jahan banha bang dareʹako.
21Âdmite Issor baṛeisanako, kheʹ angkodo Issoraʹ bang gourobkadako ar dhonnobadho bang makâdiako. Âdmikoaʹ cintâdhara orthohinngekantakoa ar angkoaʹ bemaʹ mon nutngekantakoa. 22Angkodo akogi geni mente lâioʹreho angkodo bemaʹgiâko. 23Angkodo jaijugren Issoraʹ bang gourobketeʹ ananaʹ badalte, âdmi laka leloiʹ murti, cere, janoar ar lengonkhoiʹaʹ murtiaʹ upâsoneyako.
24Angkotedo Issor bang atangkâdiâko anate Issorte angkodo akoaʹ mon laka papnaʹ ḍaharte caʹ laʹte ar akoaʹ ontornaʹ kamona basona laka kharap kâminaʹ tire jimâkeʹkoe. Anate angkodo miʹhor salaʹ armiʹhoraʹ giuʹ lakanaʹ chutaʹ kâmiketeʹ akoaʹ hormo osonmankedako. 25Issoraʹ sâri giṛiketeʹ angkodo âuṛionaʹgi atangkadako, Ar sirjuiʹ bâgiketeʹ borong angkodo Ânioaʹ teyar jinisnaʹgi upâsona ar seoakadako, kheʹ sanam Prosongsa cirokal âni Issoraʹgiâ. Amen.
26Issorte angko kharap kâminaʹ tire jimâkeʹkoe. Kurihoponho kurihopon saote osabhabik giuʹgoiʹ kharap kâmikadako. 27Ṭhik engkaketeʹgi korahoponho kurihopon saote sabhabik bang beboharketeʹ eṭaʹ korahopon laʹte laloketeʹ giuʹonaʹ kâmikadako, ar niâ pap kâminaʹ sâsti angkodo akoaʹ hormorigi namkadako.
28Angkodo Issoraʹ bisoite gen tahedo thoṛaho bang gurupto moneledako. Anate Issorte angkodo onucit kâmire jimâkaʹkoe ar akako kâmi angkoaʹdo bang ucita anako kâmiako. 29Sanam lakanaʹ onnai, kharap, lobh, kâṭijoʹ, hingsâ, goiʹ, dal, jhagṛa, âuṛi ar eṭaʹuniʹaʹ khutiaʹ icchâte angkodo pereʹngekanako. Angkodo eṭaʹonkhoiʹaʹ bisoi laite aloconeyako, 30eṭaʹonkhoiʹaʹ nindiako ar Issor ghinâiako. Angkodo bodmejaji, ohongkâri ar gorbote pereʹgiâko. Onnai kâmi laʹte angkodo naoa naoa upâi oṛogako. Angkodo âiâ babaoaʹ obaddhogiâko, 31angkoaʹdo manja kharapnaʹ gen bânuʹtakoa, ar angkodo binpâtyugiâko. Angkoaʹ ontorre dulâr ar daya maya bânuʹtakoa. 32Angkodo Issoraʹ bicârnaʹ katha manjatigi baṛeyako je, nangkanaʹ ekeko kâmiako angkodo gojoʹren upojuktogiâko. Nako katha baṛeketeʹho eken je nako kâmitigi tahenako anado bang, kheʹ ekeko kharap kâmiako angkoho sommoti makoako.
S'ha seleccionat:
Romio 1: EKL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©️2025 Bible Students Fellowship of Bangladesh