Johon 12
12
Moriomte Jisu jangare so sunum ojoʹodie
(Mothi 26:6-13; Mark 14:3-9)
1Bacoaʹ porob ehobnaʹ chodin laha Jisu Boithoniâre cane. Jisute eke goiʹ khoiʹ jiuitʹ beretlidie âni Lasardo aṛe basoʹsane. 2Ar angkodo Jisu laʹte aṛe miṭiʹ bhojnaʹ bebosthakedako, ar Marthate angkodo jom nuilaʹ makosane. Jisu saote ṭebilre ekeko jom nuilaʹ duruʹlenako angko talare Lasarho tahalene. 3Natayom Moriom miʹ liṭâr aima dâmi, mohoyonaʹ khâṭi so sunum âguketeʹ Jisuoaʹ jangare ojoʹodie ar nijeyaʹ bohoʹnaʹ upte Âniaʹ janga jotʹkeʹtaye, ana mohokoyonaʹ so sunumnaʹ sote goṭa oraʹ pereʹngena.
4Kheʹ Jisuren celako talaren miʹhor, eketedo Jisu dusmânkoaʹ tire sabsoiheʹ, âni Jihuda Iskariot menkede, 5" Niâ so sunum peso dinârte#12:5 Miʹ dinâr mane hoʹkana miṭiʹ âdmi miʹso dinre je ṭaka kâmiketeʹ name. âkringketeʹ rangeʹ oreʹ âdmiko ma bang jutuʹahoteʹ?" 6Jihuda je rangeʹ âdmiko laʹte cintuʹe analaʹte je na katha mende anado bang, ceklaʹbang ânido tahelene miṭiʹ komro. Ar âniṭheʹ ṭhepnaʹ bakso dohensana ar ana khoiʹ ânido aiʹ laʹte komresane.
7Jisu menkede, "Apedo âniaʹ monre kosṭo alo maʹape. Ceklaʹ bang Ing topang somai sajonglaʹte ânido na doholede. 8Apetedo rangeʹ âdmiko sanam somai sorre namkopehaʹ, kheʹ apete Ingdo sanam somaido oho namengape."
Lasaraʹ biruddhe soṛojontro
9Jisu Boithoniâre miniâ baṛe dareketeʹ Jihudiko tala khoiʹ aima âdmi aṛe hiʹnako. Angko je khâli Jisu laʹte aṛe hiʹlenako anado bang, kheʹ ekedo Jisute goiʹ khoiʹ jiuitʹ beretʹlidie âni Lasarho leleilaʹ hiʹlenako. 10Tâkhni marang purohitkodo miʹsaote soṛojontrokedako je Lasarho gojeilaʹ hoʹhaʹ. 11Ceklaʹbang Lasar laʹte Jihudiko talare aima âdmigi Jisuṭheʹ caʹsanako ar Âni pâtyuisanako.
Jisu Raja hisâbte Jirusalemre bolone
(Mothi 21:1-11; Mark 11:1-11; Luk 19:28-40)
12Porahiluʹ ekeko âdmi porobre hiʹlenako angkodo aten namkedako je Jisudo Jirusalemre hijuʹkane. 13Tâkhni angkodo khijur sakam engeketeʹ Âni leleilaʹ canako ar garjo garjoteʹ menlaʹlagonako,
"Hosanna!
Ânido dhonnogie, Ekedo Probhuoaʹ nutumte hijuʹkane Âniaʹ gourob hoʹtaiman,#Siringko 118:25-26
Ânigi Israyelren Rajakane."
14Pobitro Sastronaʹ katha lakagi Jisutedo miṭiʹ juân gadha lelnamkidie ar âni cetanre duruʹne, sastrore ol menaʹa 15"Alo botoroʹam Sion sohor, lelme, amren Raja miṭiʹ juân gadha cetanre duruʹketeʹ hijuʹkane."#Sokhorio 9:9
16Jisuren celako palheredo nako bisoi bang bujhu dareledako, kheʹ Jisuoaʹ mohima jâkhni sodorlentaya, tâkhni angkodo disâkedako je, Pobitro Sastronaʹ ana katha Jisuoaʹ bisoitigi ol holena ar niâkodo Âni saotigi ghoṭolena.
17Jisute jâkhni Lasar topa khoiʹ oṛoʹ hijuʹlaʹ metalidie tâkhni ekeko âdmi Âni suliʹ tahalenako angkogi Lasaraʹ jiuitʹ beretʹnaʹ bisoite sakkho maʹlaʹ lagonako. 18Ana laʹtigi âdmikodo Jisu suliʹ napamlaʹ calenako, ceklaʹ bang angkodo atenledako Jisugi ana asarjo cinhât kâmido rikâlede. 19Na lelketeʹ Forisikodo akoaʹ talare menlaʹ lagonako, "Lelpe bhalaʹ, apedo itâʹgi bang cikâ dareʹkanape, lelpe, goṭa dhârtite Ânido panjadiâko."
Jisu Aiaʹ goiʹnaʹ bisoite bhobisotbâni makede
20Ana porobre ekeko koijong laʹ hiʹlenako angko talare koekṭeʹ âdmi Grikren tahalenako. 21Angkodo Filipṭheʹ canako ar âni kulikidiako, "Probhu, alete Jisu leleilaʹ namdale." Nâi Filipdo tahalene Gâlilnaʹ Boithsoida ṭolaniʹ âdmi. 22Filipte caketeʹ Andrio metakidie, ar Andrio Filip saote caketeʹ Jisu metakidie.
23Uttorre Jisute ângkin metakeʹkine, "Âdmi Hoponaʹ mohima sodornaʹ somai hiʹkana. 24Ingte ape sârigi metapekâning, guhumnaʹ bicân hasre ujuʹketeʹ judi bang gojoʹa tahale anado miṭiʹgi bicân tahana, kheʹ judi gojoʹa tahale aima fosol janamoʹa. 25Eke aiaʹ nijeoaʹ jiui dulâre, ânido ana adheʹ, kheʹ ekedo niâ dhârtire aiaʹ jiuiʹ ghinie ânido onontokal laʹte jiui baceheʹ. 26Keho judi Ingâʹ seoelaʹ name tahale ânido Ingâʹ ḍaharte caʹmane. Ing akare tahanhuʹ Ingren seoaiʹho aṛegi tahanheʹ. Eketeho judi Ing seoangako tahale Babate âniho sonman maiheʹ.
Jisu Aiaʹ gojoʹ bisoite menkede
27"Ingâʹ mon nitoʹ osthirkantingâ. Ingdo itâʹ menliʹ? Baba, na somainaʹ ti khoiʹ Ingdo bacong? Kheʹ niâ laʹtigi Ingdo niâ somai dhâbiʹ hiʹkâning. 28Baba, Amaʹ nutumnaʹ mohima sodorme."
Tâkhni sorgo hate khoiʹ nia katha atennamna, "Ingdo Ingâʹ mohima sodorkâding ar arho ana sodorhuʹ."
29Eke âdmiko aṛe tengoketeʹ atenledako angkodo menkedako, "Nado serma saṛekana."
Ekekodo menkedako, "Sorgodut Âni suliʹ katha menkede."
30Uttorre Jisu menkede, "Na kathado Ing laʹte bang menhokana, kheʹ ape laʹtigi men hokana. 31Nitoʹ na dhârtiren âdmiko laʹte bicârnaʹ somai nitoʹ hiʹkana, ar na dhârtiren sasoniʹdo#12:31 Dhârtiren sasoniʹ mane hoʹkana Soitan. Johon 14:30 podreho ol menaʹa. tâṛyugiriyiheʹ. 32Ar jâkhni Ingdo dhârtinaʹ tala khoiʹ cetanre rakapnge hoʹhaʹ, tâkhni Ingṭheʹ sanam âdmiko ṭano âgukoinghâʹ." 33Niâ kathanaʹ talate Ânite angko bujhusokolaʹ namkede je, akalakate Ânido gojoʹheʹ.
34Tâkhni âdmikote Jisu metadiako, "Aledo Mosiaʹ ân khoiʹ atenkadale Khrisṭodo cirokal tahanheʹ. Amdo kalkate mendam je, "Âdmi Hopondo cetanre rakapnge hoʹhaʹ? Tahale nâi Âdmi Hopondo ekekane?"
35Tâkhni Jisute angko metakeʹkoe, "Ar thoṛa somai laʹte marsal ape suliʹ menaʹa. Tinâʹkhaniʹ marsal apeṭheʹ menaʹa ape caʹtigi tahanpe, jate ape nutre bang tahanpe. Eke nutre calobanoʹe ânido akate caʹkane anado bang baṛeye. 36Marsal apeṭheʹ tahan somaigi marsal cetanre pâtyuʹpe jate apedo marsalren hopon ho darenape." Jisu nako sanam katha menkede ar cane ar angkoṭheʹ khoiʹ nije bai tahane.
Binpâtyu Jihudiko
37Judiho Jisudo angko lahare cinhât hisâbte aima asarjo kâmilede taoreho âdmiko Âni cetanre bang pâtyulenako. 38Nado holena jate nâbi Jisaioaʹ menonaʹ niâ katha puronoʹa,
Probhu, aleyaʹ procar eke pâtyukanako?
Ar ekeṭheʹ Probhuoaʹ suktinaʹ ti sodorkana?#Jisaio 53:1
39Na laʹtigi angkodo bang pâtyukanako, karon Jisaiodo arho menkade,
40"Issorte angkoaʹ metʹ ândhuâkaʹtakoe.
Ar Ânitedo angkoaʹ ontor keṭeʹkaʹtakoe ar bangkheʹ angkotedo metʹte leleiakohoteʹ,
ontorte bujhiakohoteʹ ar Ingṭheʹ âcur hiʹjuʹakohoteʹ
ar Ingte angko manjakoinghoteʹ."#Jisaio 6:10
41Jisaiodo Jisuoaʹ mohima lelkade mente Âniaʹ bisoite niâko katha menkade.
42Taoreho netako talare aima âdmigi Âni cetanre pâtyunako, kheʹ Forisikote somaj oraʹ khoiʹ angkodo oṛoʹgirikokohaʹ ana botorte angkodo ana bang sikârledako. 43Angkodo Issorṭheʹ khoiʹ gourob namkhoiʹ borong âdmikoṭheʹ khoiʹ gourob namlaʹte aima ḍer dulârsanako.
Jisuoaʹ cedaʹtigi âdmiko bicârkoheʹ
44Jisu jorte garjoketeʹ menkede, "Ekedo Ing cetanre pâtyuʹe ânido je kebol Ing cetanre pâtyuʹe anado bang kheʹ Ekete Ing kolkâdinge Âni cetanreho pâtyuʹe. 45Ar ekete Ing lelenge, ânitedo Ekete Ing kolkâdinge Ânigi leleye. 46Ingdo niâ dhârtire marsal hisâbte hiʹkâning eke Ing cetanre pâtyuʹe ânido nutre bang tahane.
47Jahe judi Ingâʹ katha atene kheʹ bang manongeye, Ingdo âniaʹ bang bicâring, karon Ingdo dhârtiren âdmiaʹ bicâr laʹtedo bang hiʹkâning, kheʹ dhârtiren pâpi âdmiko bacokolaʹte hiʹkâning. 48Jahete judi Ing baginge ar Ingâʹ katha bang atene, âni laʹtedo bicâriʹ miniâ. Aka katha Ing menkâding ana kathatigi mucitʹ dinre ânido dusi mente bicâriheʹ. 49Karon Ingdo Ingâʹ nijeoaʹ khomota khoiʹdo itâʹgi bang menkâding. Kheʹ Ekete Ing kolkâdinge Âni Babatigi Ingdo hukum makâdinge itâʹ menhuʹ ar kalkate menhuʹ. 50Ingdo baṛeing je Âniaʹ hukumgi ononto jiuikana, niâ laʹte Ingdo akako bisoite katha mening ana Ingren Babaoaʹ hukum lakagi mening."
S'ha seleccionat:
Johon 12: EKL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©️2025 Bible Students Fellowship of Bangladesh