Johon 11
11
Jisute goiʹ Lasar jiuitʹ beretʹkâdie
1Lasar nutumte miṭiʹ âdmi aima ruâ tahelene. Ânido Boithoniâ ṭolare tahensane. Ana ṭolarigi Moriom ar aiʹren mesra Marthaho tahensane. 2Ânido hoʹkane Lasarren mesra Moriom, eketetedo Probhuoaʹ jangare so sunum ojoʹolidie ar nijeyaʹ bohoʹnaʹ upte Âniaʹ janga jotʹleʹtaye, âniren boiha Lasargi ruâlene. 3Niâlaʹte âniren ângkin mesrado Jisu niâ katha lâioi laʹte miṭiʹ âdmiṭheʹ lâikolkedakin, "Probhu, Amte eke dulâriâm ânido aima ruyuʹkane."
4Jâkhni Jisu niâ katha atenkede, "Ânido menkede, "Niâ ruâ âniaʹ goiʹ laʹtedo bang hokantaya kheʹ Issoraʹ mohima sodor laʹte hokantaya. Jate na talate Issorren Hoponaʹ gourob sodoroʹa." 5Jisute, Lasar ar âniren mesra Moriom ar Martha aima dulârkosane. 6Jâkhni Jisu atenkede Lasardo ruâkane, tâkhni Ânido aka jagare tahalene aṛegi arho bar din tahengene. 7Natayom Jisute celako metakeʹkoe, "Dela, abodo arho Jihudiâre caʹbo."
8Kheʹ celakote Jisu metakidiako, "Guru, thoṛa din lahare Jihudi netakote Am dirite capatʹmilaʹ namledako, ar Am arho aṛegi âcur caʹkanam?"
9Uttorre Jisu menkede, "Miʹ dinre ki baro ghonṭa marsal bânuʹa? Jahe judi dinnaʹ marsalre caʹe ânido oho tohodoʹe, ceklaʹ bang ânido niâ dhârtinaʹ marsal lel name. 10Kheʹ jahe judi nindâ caʹe, ânido tohodoʹe ceklaʹbang marsal âni talaredo bânuʹa."
11Jisu niâko sanam katha men tayom celako metakeʹkoe, "Aboren gate Lasar jâpitʹkade, kheʹ Ingdo caʹkâning jate âni jâpitʹ khoiʹ beretʹ dareʹing."
12Tâkhni celakote Âni metakidiako, "Probhu, âni judi jâpitʹkade tahale ânido manjagenheʹ." 13Jisu Lasaraʹ goiʹnaʹ katha menlede, kheʹ celako monekedako je, Jisudo âniaʹ thoṛa jâpitʹnaʹ katha menkade.
14Tâkhni Jisute angko isposṭoketeʹ metakeʹkoe, "Lasardo goiʹngekane. 15Kheʹ Ingdo apelaʹte huboʹkâning je, Ingdo aṛe bang tahelining jate ape pâtyuʹape. Nitoʹ dela, Abodo Lasarṭheʹ caʹabo."
16Tâkhni Thoma, ekedo jama menhoʹa, ânitedo aiʹren saoren celako metakeʹkoe, "Dela, aboho caʹabo, jate Jisu saote goiʹ darenabo."
Jisute Lasarren mesra jiuilareʹ makeʹkine
17Jisudo jâkhni Boithoniâre hiʹne Ânido aten namkede, pon din hona Lasar topakâdiako. 18Jirusalem khoiʹ Boithoniâ pe kilomiṭâr sâhingre tahekana. 19Ar Jihudiko tala khoiʹ aima âdmigi Martha ar Moriomṭheʹ hiʹlenako ângkinren boihaʹ goiʹkane ana laʹte jiui lareʹ makinlaʹ.
20Jâkhni Martha atenkede, Jisu hiʹkane ânido caketeʹ Jisu suliʹ napamne, kheʹ tâkhniho Moriom oraʹre duruʹtahalene. 21Marthate tâkhni Jisu metakidie, "Probhu, Am judi naṛe tahanamhoteʹ ingren boiha bang gojoʹehoteʹ. 22Kheʹ nitoʹ ingdo baṛeing, Am jahanaʹgi Issorṭheʹ koimahaʹ, Amdo Issorte anagi mamheʹ."
23Jisute âni metakidie, "Amren boihado arho jiuitʹ beredoʹheʹ."
24Tâkhni Marthate Âni metakidie, "Ing baṛeing mucitʹ hiluʹ goiʹ khoiʹ jiuitʹ beredoʹ somai ânido arho jiuitʹketeʹ beredoʹheʹ."
25Jisute Martha metakidie, "Inggiying goiʹ khoiʹ jiuitʹ beretʹ ar jiuido, jahetigi Ing pâtyunge, ânido goiʹlenkheʹho baco tahanheʹ. 26Ar ekedo jiuitʹ miniâ ar Ingre pâtyuʹe ânido tisho oho gojoʹe. Na kathado am pâtyukanam?"
27Marthate Jisu metakidie, "He Probhu, ing pâtyuʹkâning Amgiâm Âni Khrisṭodo, Issorren Hopontetʹ Ekedo na Dhârtire hiʹkane."
Jisu raʹkede
28Nako sanam katha menketeʹ Martha caketeʹ aiʹren mesra Moriom gan gante ṭâhukidie. Martha menkede, "Guru naṛe miniâ ar amdo ṭâhumkane." 29Jâkhni Moriom na katha atenkede ânido saṭlaka beretʹketeʹ Jisuṭheʹ cane. 30Jisu tâkhniho ṭola talare bang hiʹkane kheʹ akare Martha Âni suliʹ napamlene ana jagarigi tahelene. 31Tâkhni eke Jihudiko Moriom suliʹ oraʹre tahalenako ar âni jiui lareʹ maisanako, angkote Moriom saṭlaka beretʹketeʹ barhehate caʹte lelkidiako tâkhni angkoho âniaʹ taynom taynom canako. Angkodo monekedako, Moriomdo topaṭheʹ raglaʹ caʹkane. 32Tâkhni Jisu akare tahalene aṛe Moriomdo cane, tâkhni Jisu lelketeʹ Âniaʹ jangare ḍoboʹketeʹ menkede, "Probhu, Am judi naṛe tahenamhoteʹ, ingren boiha oho gojoʹehoteʹ."
33Jisu jâkhni lelkede Moriom raʹde, ar âni suliʹ ekeko Jihudi hiʹlenako angkoho raʹdako tâkhni attare aima osthirne. 34Ânite angko metakeʹkoe, "Lasar akare dohokâdiape?"
Angkotedo Jisu metakidiako, "Probhu, hiʹketeʹ lel."
35Jisudo raʹkede.
36Tâkhni Jihudiko menkedako, "Lelpe, Jisute Lasar tinâʹ dulârisane."
37Kheʹ angko tala khoiʹ ekekodo menkedako, "Nâi horte andraoaʹ metʹ manjakaʹtae, Ânitedo ki Lasardo goi khoiʹ oho baco dareyehoteʹ?"
38Jisudo arho monre osthirne ar topaṭheʹ cane. Ana topa tahekana miṭiʹ guhâre ar ana cetanre miṭiʹ diri doho tahelena. 39Jisu menkede, "Ape na diri ochoʹgiripe."
Eke Lasar goiʹ kane âniren mesra Marthate Jisu metakidie, "Probhu, ana goiʹ hormo songekana ceklaʹbang âni goiʹketeʹ pondin hoʹkana."
40Jisute Martha metakidie, "Ingte ki amdo bang metakaʹming, am judi pâtyuʹam tahale Issoraʹ mohima lelnammahaʹ?"
41Tâkhni âdmiko ana diri ocoʹgirikedako. Natayom Jisudo serma hate koyoʹketeʹ menkede, "Baba, Am dhonnobad mamkâning, ceklaʹbang Amdo Ingâʹ katha atenkadam. 42Ingdo baṛeing Amdo sanam somai Ingâʹ katha atenam. Kheʹ naṛe ekeko âdmi Ingâʹ câryunakha tengo menaʹkoa nako laʹte niâ katha mending, angko jate pâtyuʹako je Amtigi Ingdo kolkâdingâm." 43Nako sanam katha mentayom, Jisudo jorte ṭâhukede ar menkede "Lasar, barhe hijup." 44Ar âni goiʹ Lasardo oṛoʹ hiʹne, âniaʹ ti ar janga topanaʹ lugrite pedhyo tahelentaya ar mocado gamchate tol tahalentaya.
Jisute angko metakeʹkoe, "Ânido laragiriyipe ar casoipe."
Jisu goiʹgiriyilaʹ soṛojontro
(Mothi 26:1-5; Mark 14:1-2; Luk 22:1-2)
45Tâkhni Moriomṭheʹ ekeko Jihudi hiʹlenako angko talare aima âdmigi Jisuoaʹ niâ kâmi lelketeʹ Âni cetanre pâtyunako. 46Kheʹ angko talare koyekṭeʹ âdmido Forisikoṭheʹ caketeʹ Jisu akako kâmi rikâlede anado lâikedako. 47Tâkhni marang purohitko ar Forisiko marang sobharen âdmiko miʹṭheʹ ṭahuketeʹ metakeʹkoako, "Abodo nitdo itâʹ cikibohaʹ? Nâi âdmito aima asarjo kâmide. 48Judi abote Âni nengkagi calo soiabo, tahale sanamkhoiʹ Âni cetanre pâtyuʹkohaʹ, ar Romiokodo hiʹketeʹ aboaʹ koijong oraʹ ar aboren jâtko dhongsokokohaʹ."
49Kheʹ angko talaren Kaiyafa nutumte miʹhor ana bochorren marang purohit tahalene. Ar angko metakeʹkoe, "Apedo itâʹgi bang baṛeyape. 50Ar apedo bang bujhu dareʹkanape je, aboren goṭa jât dhongso khoiʹ borong sanam âdmiko laʹte miʹhoraʹ goiʹgi aima manjaoa."
51Nako sanam katha je Kaiafa nije khoiʹgi menkade anado bang, kheʹ ânido tahalene ana bochorren marang purohit. Ana laʹte ânido bhobisotnaʹ katha menlede, Jihudi jât laʹtedo Jisugi gojoʹheʹ. 52Ar kebol Jihudi jât laʹtedo bang, Kheʹ Issorren je gidrâko câryunakha pasno menaʹkoa, angko sanamkhoiʹ jate jaoraketeʹ miʹṭheʹkoe.
53Ana din khoiʹgi Jihudi netakote Jisu goiʹgiriyilaʹte soṛojontrelaʹ lagonako. 54Tâkhni khoiʹgi Jisu sorasoriketeʹ Jihudiko talare âcurbera bondokede, kheʹ ana jaga bâgiketeʹ sansun jagare Ifroim nutumnaʹ miṭiʹ ṭolare cane. Aṛe celako saote tahenlaʹ lagone.
Baco porobre Jisu Jirusalem cane
55Tâkhni Jihudikoaʹ bacoaʹ porob sorre hiʹlentakoa ar aima âdmi nijegi sâfuʹ laʹte baco porobnaʹ laharigi disâm ar ṭola khoiʹ Jirusalemre calenako. 56Ar angkote Jisu sendraberailaʹ lagonako ar mundirre tengoketeʹ miʹhorte armiʹhor kulikolaʹ lagonako, "Apedo itâʹ moneyape? Ânido ki niâ porobre oho hijuʹe?" 57Ar marang purohit ar Forisikote hukum maleʹkoako je, Jahe judi baṛeyako Jisudo akare miniâ, tahale âniaʹdo khobor maʹa ucitʹ ar angkote jate Jisu sab dareyako.
S'ha seleccionat:
Johon 11: EKL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
©️2025 Bible Students Fellowship of Bangladesh