مَرقُسِ انجیل 3
3
شفای مرداکی کی اَنِ دَس لام بو
1عیسی ایوار دِه عبادتگا بدرون بامو. اویا ایتا مرداک بو کی اونِ ایتا دَس لامَ بوسته بو. 2بعضیان عیسیَ پاستیدی تا بیدینید مُقدّسِ شنبه درون اُ مرداکَ شفا دئه یا نه، تا اَطو ایتا گَزَک اونِ بُهتان زئن ره بیاوید. 3عیسی اُ مرداکیَ کی اونَ دَس لام بُبوسته بویَ بگفت: «بیا اَیا.» 4هو موقع اوشان جا واورسه: «مُقدّسِ شنبه درون خُبی کودن روا ایسه یا بدی کودن؟ اینفر جان نیجات دَئن یا اونَ کوشتن؟» ولی اوشان ساکت بئسائید. 5عیسی، برَزَخا بو و اوشانی کی اون دوروَر ایسابیدَ فندرست و ناراحت جه اوشانِ بیرحمی، اُ مرداکَ بگفت: «تی دَسَ درازا کون.» اون خو دَس درازا کود و اونِ دَس خُب بُبوست. 6هو موقع فَریسی فرقه عالمان بیرون بُشوئید و فِلفُور اوشانِ اَمرا کی هیرودیس پادشا دُمباله رو بید، کوکلا دیچه ئید کی چُطو عیسیَ بُکوشید.
پیله جمعیتی عیسی دُمبال بید
7بازین عیسی خو شاگردان مرا دریا کنار سمت بُشو. خَیلی جه جلیلیان 8و خَیلی جه یهودیه مردوم و اورشلیم و اَدومیه منطقه و اُردن روخان کنار دوروَر و صور و صِیدون سامانسرم عیسی دُمبالسر رادکفتید. وقتی کی تمان اونِ کاران خبرَ بیشتاوستید، عیسی ورجه باموئید. 9اَنه واسی کی جمعیت خَیلی زیاد بو، عیسی خو شاگردانَ بگفت ایتا لوتکا اونِ ره آماده کونید، تا مردوم اون سر زور ناورید. 10جه اویا کی عیسی خیلیانَ شفا بدَه بو، ناخوشان اونِ سر فوتورکستید تا عیسیَ دَس بزنید. 11هر موقع کی پلید ارواح عیسیَ دِئیدی، اونِ جُلُو زمین سر کَفتید و نعره زئیدی: «تو خُدا پسری!» 12عیسی اوشان دستور بدَه، تا هیکّسَ نَگَد کی اون کیسه.
دوازده رسول سیوا کودن
13عیسی ایتا کوه سر بُشو و اوشانیَ کی خواستی، خو ورجه دوخواد و اوشان اون ورجه باموئید. 14اون دوازده نفرَ سیوا بُکود و اوشانَ رسول دوخواد، تا اون مرا بأسید و اوشانَ روانه کونه کی موعظه بُکونید، 15و اَ قدرتَ بدَرید کی مردوم جا دیوانَ بیرونَ کونید. 16اُ دوازده نفر کی سیوا بُکود اَشان بید: شَمعون کی عیسی اونَ پِطرُس نام بنه؛ 17یعقوب و یوحنا زِبِدی پسران کی اوشانَ «بوآنِرجِس»، یعنی «گُرخانه پسران» نام بنه؛ 18آندریاس، فیلیپُس، بَرتولْما، مَتّی، توما، یعقوب حَلْفای پسر، تَدّای، شَمعون وطن پرست، 19و یهودای اَسخَریوطی کی عیسیَ دُشمند دَس فَدَه.
عیسی و بِعِلزِبول
20ایتا روج ده عیسی بخانه بُشو و ایوارده جمعیتی اون دور جمَ بوستید، اوجور کی عیسی و اونِ شاگردان حتی نتانستید خوشان غذایَ بُخورید. 21وقتی عیسی خویش و قوم اَنه بیشتاوستید، رادکفتید تا اونَ اوسانید و خوشان مرا ببَرید، چونکی گفتیدی: «تورا بوسته.» 22تورات آموجگارانم کی اورشلیم جا بامو بید گفتیدی: «بِعِلزِبول اونِ جلد درون بُشو،» و «اون دیوانَ، دیوانِ پیله ترِ یاری مرا، بیرون تَوَدِه.» 23پس عیسی اوشانَ دوخواد و نَقلانی اَشان ره باورد و بگفت: «چُطو به شیطان، شیطانَ بیرون تَوَده؟ 24اَگه مملکتی ضدّ خودش دسته دسته ببه، سر به نیست خوائه بوستن. 25اَگه خانه درونم ضدّ خودش دسته دسته ببه، اُ خانه خوائه فُگوردستن. 26اَگه شیطانم ضدّ خودش ویریزه و دسته دسته ببه، نتانه دوام باوره، بلکی نابودَ به. 27هیکّس نتانه ایتا قوی مرداکِ خانه بشه و اونِ مال و منالَ بدوزه، مگه اَنکی اول اُ قوی مرداکَ دَوَده. بازین تانه اونِ خانه یَ غارت بُکونه.» 28«حئیقتن، شمرأ گَم کی تمان آدمیزاد گُنائان و هر کُفری کی بگه ببخشه بِه؛ 29ولی هرکی روح القدسَ کُفر بگه، هرگس ببخشه نخوائه بوستن، بلکی تا ابد اونِ گُناه اونِ سر مانه.» 30عیسی اَنه واسی اَ گبَ بزه کی گفتیدی «اون پلید روح دَره.»
عیسی مار و براران
31بازین عیسی مار و براران باموئید. اوشان بیرون بئسائید و اینفرَ اوسِه کودید تا عیسیَ دوخوانه. 32خلقی کی عیسی دور نیشته بید، اونَ بگفتید: «تی مار و براران بیرون ایسائید و تی دُمبال گردیدی.» 33عیسی جواب بدَه: «می مار و براران کیسید؟» 34هو موقع اوشانی کی اونِ دور نیشته بیدَ، فندرست و بگفت: «می مار و براران، اَشانید! 35چون هرکی خُدا خواسته یَ بجا باوره، می برار و خاخور و می مار ایسه.»
S'ha seleccionat:
مَرقُسِ انجیل 3: GIL
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
@ 2024 Korpu Company