Roma 8
8
Nggyabiya Lagu Mambǝl
1Agabangau, numa nǝ tau aˈyi kabangǝkau ar kǝra njira wu daɓǝr kǝr ǝnga Kǝrsiti Yesu mai. 2Ara lagu Kǝrsiti Yesu ngǝ dlaɗǝ nǝ Mambǝl nǝ pi ngǝ nǝ ɗa kambǝkur ar kǝra dlaɗǝ nǝ nggyabiya bikau ǝnga tau.
3Ariya sǝra dlaɗǝ Musa gǝra ǝnga dǝnama nǝ mǝliya ara tǝtǝwakura dǝnama nǝ ndǝndǝkur. Ca ngǝ sǝra Hyal mǝl ar pǝcira ji sǝwa Zǝr nyi kǝra shili wu dzau ǝnggǝr namǝn ǝnga nggyabiya nǝ ndǝndǝkur aga ja sa lǝr piya ja ariya bikǝ nǝ ndapi. Lagu kǝ nga ji tuzhina dǝnama nǝ bikǝ ar kǝra nji. 4Hyal mǝliya abangau aga patǝr thlǝr nǝ tsapǝkur kǝra dlaɗǝ nana nja mǝl a uya nyabiya dzau wu mǝn, namǝn kǝra aˈyi nggyabiya nǝ ndǝndǝkur nga mǝnu nggya mai, ama nggyabiya nǝ Mambǝl.
5Njira nggyabiyar nda lagu nǝ ndǝndǝkur, ndu hǝ hangǝkala nda anǝ sǝra nǝ ndǝndǝkur. Ama tsu njira nggyabiyar nda nǝ lagu Mambǝl, ndu hǝ hangǝkala nda anǝ sǝra nǝ Mambǝl ngau. 6Lǝr hangǝkal ar kǝra sǝra nǝ dzau, wu shili ǝnga tau. Ama lǝr hangǝkal ar kǝra sǝra nǝ Mambǝl, wu shili ǝnga pi ba jamǝkur. 7Kalar njira lǝr hangǝkala nda anǝ sǝra nǝ dzau, a ɗar nda dawa nǝ Hyal, ariya nanda aˈyi lǝr kǝrnda anǝ dlaɗǝ Hyal mai, ǝnga tsu nandu mbari mai. 8Njira nggyabiyar nda lagu ndǝndǝkur ngau, nandu sǝni pina huɗa Hyal mai.
9Ama nahyi, aˈyi nggyabiya nǝ ndǝndǝkur nga hyu nggya mai ama nggyabiya nǝ Mambǝl, ma Mambǝl Hyal aˈyi wu ɗǝfuwa hyi. Kalar ndǝra aˈyi ǝnga Mambǝl Kǝrsiti mai, aˈyi ja nǝ Kǝrsiti mai. 10Ta Kǝrsiti aˈyi wu hyi, alaga ma dza hyi wu tǝ ara bikau, mambǝlǝr hyi aˈyi ja ǝnga pi ariya Hyal a dlǝwur hyi ri ar viya nji tsapǝu. 11Ma Mambǝl Hyal kǝra hyaˈana Yesu sara vir tǝ aˈyi wu nggya wu ɗǝfuwa hyi, naja kǝra hyaˈana Kǝrsiti sara vir tau, wu nda nǝ nyi pi anǝ dza hyi kǝra wu tǝ tsu, lagur Mambǝl nyi kǝra a vǝr nggya wu ɗǝfuwa hyi.
12Agabangau, wazha ama, sǝ aˈyi kǝra tsaˈa mǝna kyaga mǝl, ama aˈyi ǝnggǝr nǝ nggyabiya nǝ ndǝndǝkur mai. 13Ara ma nggyabiya nǝ ndǝndǝkur nga hyu nggya, hyu tau. Ama ma lagu dǝnama nǝ Mambǝl nga hyi tsǝya ɗǝfu nǝ bikau, hyu nggya ǝnga pi. 14Ara njira Mambǝl Hyal wu lǝ nda, wazha Hyal nga nda.
15Arya Mambǝl kǝra nji nǝ hyi aˈyi nǝ mafakur ngǝ mai kǝra hya ɓǝra nggya ǝnga hivǝr mai, ama Mambǝl kǝ nǝ nggya wazha Hyal ngau, ǝnga tsu lagu Mambǝl kǝ nga mǝnu ngga Hyal, ǝnga, “Abba! Tada!” 16Mambǝl Hyal ǝnga kǝrnyi daɓǝ ǝnga mambǝlǝr mǝn wu nar mǝn abǝr namǝn wazha Hyal ngau. 17Ta ɗa wazha nga mǝn, a ɗar mǝn njir faˈaki ja. A ɗari mǝn njir faˈaki nǝ Hyal ǝnga wu cir zǝmǝ wu faˈaki ǝnga Kǝrsiti, ma tsu mǝn lar ɓwaɓwatǝ daɓǝ ǝnga Kǝrsiti, aga mǝna nda uya kadakadarkur daɓǝ ǝnga ja.
Kadakadarkur Kǝra Wu Shili
18A sǝni yi abǝr ɓwaɓwatǝ nǝ kabangǝkau, aˈyi a sǝni gǝlabiya dzǝ ǝnga kadakadarkur kǝra wu nda cabiya dzǝ wu mǝn mai. 19Patǝr sǝra Hyal mǝliya nda vǝr sǝkǝ aga wazha Hyal nda cabiya dzau. 20Ariya patǝr sǝra Hyal mǝliya ndǝ tini nyabiya sǝra nji mǝl nda aga nyi. Aˈyi cimǝr nda ngau aga nda ɗa abangǝ mai, ama sǝra Hyal wu yiwu ja ɗa ngau, ariya Hyal ndǝra ǝnga dǝnama ngǝ cuwa nda a gwa, wu fǝrkǝr. 21Fǝrkǝr abǝr patǝr sǝra Hyal mǝliya ǝnga kǝrnyi wu nda uya kambǝkur sara wu mafakur nǝ ɗiya, ndu nda uya kambǝkur ǝnga kadakadarkur kǝra nju nda lǝri anǝ wazha Hyal.
22Mǝnu sǝni abǝr patǝr sǝra Hyal mǝliya, a vǝr ngguli ǝnggǝr mala ar tsǝkar ya, mbar tsu kaɗǝu baˈanǝ kabangǝkau. 23Aˈyi sǝra Hyal mǝliya wacu ngǝ wu ngguli kǝ mai, ama patǝ ǝkkǝˈyi namǝn ngau. Namǝn kǝra uya Mambǝl Cicau, kǝra naja ngǝ lǝr sǝ kurthlǝ nǝ tanggǝrma kǝra nji nǝ mǝn, mǝna vǝr ngguli wu ɗǝfuwa mǝn. Mǝna vǝr ngguli ǝnga mǝna vǝr sǝkǝ ǝnga caguli aga Hyal a shabiya mǝn aga wazha nyi nǝ jijiri ba ja dzǝgwa bǝlbiya mǝn. 24Ariya wu fǝrkǝr kǝ nga mǝn mbǝɗau. Ama sǝr fǝrkǝr kǝra nju lari aˈyi ɓǝra ɗa fǝrkǝr mai. Wa ngǝ wu sǝni fǝrkǝr ǝnga sǝra ju lara? 25Ama ma mǝn fǝrkǝr ǝnga sǝra tsu mǝn gǝra uya, mǝnu sǝkǝ ǝnga munya.
26Abangǝ tsu ngǝ Mambǝl wu dlǝwa mǝn wu kukufǝkur mǝn. Namǝn wu sǝni sǝra mǝna kyaga kǝdi Hyal ar kǝri mai, ama Mambǝl ǝnga kǝrnyi ngǝ a vǝr kǝdi Hyal ariya mǝn daɓǝ ǝnga ngguli kǝra ɗahǝ gǝra sǝni nana. 27Ənga naja kǝra wu sǝni ɗǝfuwa mǝn, ju sǝni ɗǝnga nǝ Mambǝl, ara Mambǝl a vǝr kǝdi ariya nji cici gǝ Hyal kǝra kakalǝ ǝnga sǝra Hyal wu yiwu.
28A sǝni mǝn abǝr patǝr sǝra Hyal wu mǝl, ju mǝl aga mǝnahǝkur njira cabiya nyi yiwukur, njira nji ngga kakalǝ ǝnga sǝra ju yiwu. 29Ariya njira Hyal sǝnibiya tsu kaɗǝu, nanda nga ji mbiya tsu kaɗǝu aga nda nggya a papa Zǝr nyi, aga ja ɗa nǝ tanggǝrma wu pama zamǝˈyar kǝra gangǝu. 30Njira ji mbiya tsu kaɗǝu, ba ji ngga nda tsu. Njira ji ngga, ba ji nǝ nda tsapǝr dzǝ tsu. Njira ji nǝ nda tsapǝr dzau, ba ji nǝ nda kadakadarkur tsu.
Katsalakur Hyi A Ɗari Gagaɗau
31Ya, mi nga mǝna kyaga na ǝnga culi naja ka sa? Ma Hyal aˈyi ǝnga mǝn, wa nga sǝni mǝl dawakur ǝnga mǝna? 32Hyal tsu aˈyi kar mǝn Zǝr nyi mai, ama ji lǝr nyi ariya mǝn patǝu. Ma Hyal sǝni nǝ mǝn Zǝr nyi, mi ngǝ sǝra ji gǝra sǝni nǝ mǝn ǝnga tsi papaha?
33Wa ngǝ wu sǝni shili ǝnga numa ar kǝra njira Hyal caɗǝbiya? Kǝja, Hyal ǝnga kǝrnyi ngǝ lǝr tsǝrpǝr dzau. 34Wa ngǝ ndǝra sǝni mǝliya nyi numa nǝ tǝ anǝ nda? Ndǝ aˈyi mai. Kǝja Kǝrsiti Yesu ngǝ ndǝra tau, ndǝra nji hyaˈana sara vir tau, ndǝra a vǝr nggya ar tsi mazǝma Hyal, ju kǝdi Hyal tsu ariya mǝn.
35Wa ngǝ wu sǝni tǝkǝbiya mǝn ǝnga yiwukur Kǝrsiti ka? Ɓwaɓwatǝ ya, ǝndǝga dzadzaukur ya, ǝndǝga ɗa ya, ǝndǝga wuɓǝ thlakǝr ya, ǝndǝga turusukur ya, ǝndǝga asar ya, ǝndǝga katsakǝr ya? 36Ənggǝr kǝra ja tsǝtsǝfau,
“Ariya gau, nga ˈyu lari tǝ cumu,
nju fǝ ˈya ǝnggǝr tǝmahǝ kǝra nju nda tsa.”
37Awau, wu patǝr sǝˈyar kau, namǝn ngǝ katsala kǝra a ndiya ǝnga sǝm tǝlkur lagu nyi ndǝra cabiya mǝn yiwukur. 38Ariya a sǝnibiyar yau, abǝr alaga tau, alaga pi, alaga waladiˈyar, alaga njir tǝɗǝmwa, alaga nggyabiya nǝ kabangǝkau, ǝndǝga kǝra a ndu mwa, alaga dǝnama pampamǝˈyar, 39alaga dǝnama kǝra dǝmǝlmau, ǝndǝga dǝnama kǝra gyi wu ˈyi, alaga alenyi sǝ pampamǝ kǝra Hyal mǝliya aˈyi kǝra sǝni tǝkǝbiya mǝn ǝnga yiwukur Hyal kǝra aˈyi wu Kǝrsiti Yesu Thlagǝr mǝn mai.
©2024 Initiative for the Translation and Development of African Languages and Margi Tiwi Nga Təm